පරිගණක විද්‍යා පද විවරණය - 1 කොටස - උසස්පෙළ තොරතුරු හා සන්නිවේදන තාක්ෂණය

පරිගණක විද්‍යා පද විවරණය - 1 කොටස

පරිගණක විද්‍යා පද විවරණය - 1 කොටස


 

01. 16 bit:

දත්ත බසයක (Data bus) ප්‍රමාණය විස්තර කිරීමට යොදන පදයකි. ඕනෑම මොහොතක බිටු 16 ක දත්ත එක් ස්ථානයකින් තවත් ස්ථානයකට හුවමාරු කිරීමේ හැකියාව ඇත.

 

02. 8080:

Intel සමාගම විසින් සැලසුම් කරන ලද 8 bit මයික්‍රොප්‍රොසෙසරයකි.

 

03. ප්‍රවේශ කාලය (Access Time):

දත්ත බසය (Data bus) මත දිස්වන දත්තයන් ගෙන් ලබා ගන්නා පළමු දත්තය සඳහා ගතවන කාලයයි.

 

04. ඇකියුමිලේටර් (Accumulator):

අතරමැදි සහ අවසාන ගණනයන්හි දත්ත ගබඩා කිරීම සඳහා භාවිතා කෙරෙන රෙජිස්තරයකි. එය ක්ෂුද්‍ර සකසනයෙහි ප්‍රධාන අංගයක් වන අතර අංක ගණිතමය හා තාර්කික ඒකකයෙහි (ALU) කොටසකි.

 

05. ඇඩා (ADA):

1970 කාල වකවානුවේ දී ඇමෙරිකා එක්සත් ජනපදයෙහි ආරක්ෂක අමාත්‍යාංශයේ පරිහරණය සඳහා යොදා ගත් ඉහළ මට්ටමේ පරිගණක භාෂාවකි (High Level Programming Language). ළොව පළමු පරිගණක ක්‍රමලේඛිකාව සිහි වීම සඳහා මෙම ඇඩා යන නම යොදා ගෙන ඇත.

 

06. යොමුව (Address):

මතකයේ යම් ස්ථානයක් (Memory location) මේ මගින් විස්තර කරයි. මෙය ප්‍රාථමික මතකයේ හෝ ද්විතීයක මතකයේ විය හැකිය. යොමුවක් (Address) සාමාන්‍යයෙන් ෂඩ් දශමක සංඛ්‍යාවකින් දක්වයි.

 

07. යොමු බසය (Address Bus):

පරිගණක මතකයේ යම් කිසි දත්තයකට සම්බන්ධ වූ යොමු එහා මෙහා ගෙනයාම සඳහා යොදා ගනු ලබන බසයයි.

 

08. කෘතීම බුද්ධිය (AI – Artificial Intelligence):

බුද්ධිමත් මිනිසකුගේ ක්‍රියාකාරීත්වයට බොහෝ සෙයින් සමාන පරිගණකයක් නිපද වීම වර්ථමානයේ දී සිදු වෙමින් පවතියි. එකම අවස්ථාවේ දී වෙනස් සිතුවිලි කීපයක් කෙරෙහි අවධානය යොමු කර තීරණ ගැනීම, කටහඬවල් වෙන වෙනම හඳුනා ගැනීමේ හැකියාව වැනි සංකීර්ණ ක්‍රියාවලි මිනිසා හට සිදුකල හැකිය. අණුක පරිගණක සහ රොබෝ තාක්ෂණය සහ ජෛව පරිගණක ආදිය කෘතීම බුද්ධියට සම්බන්ධ කරුණු වේ.

 

09. ඇල්ගෝරිතමය (Algorithm):

දෙන ලද ගැටළුවකට විසඳුමක් සෙවීම සඳහා ඉදිරිපත් කරන පිළිවෙලින් ලබා දෙන උපදෙස් මාලාවකි.

 

10. අංක ගණිතමය හා තාර්කික ඒකකය (ALU – Arithmetic & Logical Unit):

මධ්‍ය සැකසුම් ඒකකයේ කොටසක් වන මෙය මගින් ගණිත කර්ම සහ තාර්කික සැසඳීම් ආදිය සිදු කරයි.

 

11. විස්තාරය (Amplitude):

සම්ප්‍රේෂණය කරන ලද සංඥාවක තරංග හැඩය පිළිබඳව මිනුමකි. සයිනාකාර තරංගයක විස්තාරය සංඥාවේ උපරිම ලක්ෂයේ සිට අවම ලක්ෂය දක්වා ගනු ලැබේ.

 

12. විස්තාර මූර්ජනය (AM – Amplitude Modulation):

සම්ප්‍රේෂණය කරන ලද දෑ පිළිබඳ සංඥාවන් හි විස්තාරයෙහි ඇතිවන වෙනස් කම් යොදා ගනිමින් කරනු ලබන සම්ප්‍රේෂණයකි.

 

13. ප්‍රතිසම පරිගණක (Analog Computer):

සංඥාවේ විචලනයන් අසීමිත සංඛ්‍යාවකට ප්‍රතිචාර දක්වන ලෙස සැලසුම් කරන ලද පරිගණකයකි.

 

14. ප්‍රතිසම සම්ප්‍රේෂණය (Analog Transmission):

තරංග හැඩ වශයෙන් පවත්නා අසීමිත විචල්‍ය සංඥාවන් යොදා ගනිමින් දත්ත සම්ප්‍රේෂණය කිරීමට යොදා ගන්නා ක්‍රමවේදයකි.

 

15. සජීවිකරන (Animation):

පරිගණක ක්‍රමලේඛනයක් අතරතුර සිදුවන චිත්‍රණ වස්තූන් (Graphic Objects) හි ක්‍රියාකාරීත්වයයි.

 

16. ANSI:

American National Standards Institute නමින් හඳුන්වන ඇමෙරිකානු ජාතික ප්‍රමිති ආයතනයකි. ASCII වැනි කේත ක්‍රම හඳුන්වා දී ඇත.

 

17. ඇපල් පරිගණක (Apple Computers):

1976 දී හඳුන්වා දුන් පරිගණක විශේෂයකි. Motorola ක්ෂුද්‍ර සකසනයක් යොදා ගනිමින් ඇමෙරිකාවේ ඇපල් පරිගණක සමාගම විසින් මෙය නිෂ්පාදනය කරන ලදී. ඇපල් සමාගමේ නිර්මාතෲ වන්නේ ස්ටීව් ජොබ්ස් සහ ස්ටීව් වොෂ්නියැක් ය.

 

18. යෙදුම් මෘදුකාංග (Application Software):

පරිගණකය මගින් විශේෂිත කාර්යයක් සිදු කිරීම සඳහා යොදා ගනු ලබන මෘදුකාංගයි.

 

19. ආකයිව් (Archive):

දත්ත ආරක්ෂා කර ගබඩා කර ගැනීම සඳහා යොදා ගනු ලබන ප්‍රදේශයයි.

 

20. ආරාව (Array):

දත්ත සමූහයක් පරිගණකයට යවනු ලබන්නේ පේළි සහ තීරු වශයෙන් සකසා ය. මෙසේ සකසන පේළි සහ තීරු ආරාවන් නම් වේ. ක්‍රමලේඛන භාෂාවන්ට විශේෂිත වූ විවිධ ආරාවන් දැකිය හැකිය.

 

තවත් කොටසක් බලාපොරොත්තු වන්න.