පාසල් සිසුන්ගේ පරිගණක දැනුම වර්ධනය කිරීමෙහි ලා දෙමව්පියන්ගේ දායකත්වය
පාසල් සිසුන්ගේ පරිගණක දැනුම වර්ධනය කිරීමෙහි ලා දෙමව්පියන්ගේ සහ ගුරුවරුන්ගේ දායකත්වය
පාසල් සිසු / සිසුවියන්ගේ පරිගණක දැනුම වර්ධනය කිරීම සඳහා පාර්ශවයන් තුනක් දායක විය යුතුවේ.එනම් ළමයා, දෙමව්පියන් සහ පාසල් ගුරුභවතුන් ය.මෙම පාර්ශ්වයන්ගේ අන්‍යෝන්‍ය සම්බන්ධය මගින් ළමයාගේ පරිගණක දැනුම ඉදිරියට ගෙනයාමට මහත් අත්වැලක් වනු ඇත.එනම් ළමයාගේ පරිගණක දැනුම වර්ධනය වන්නට නම් දෙමව්පියන්ගේ සහ ගුරුවරයාගේ නොමඳ දායකත්වය අත්‍යවශ්‍ය වේ.මෙහිදී දෙමව්පියන් සහ පාසල් ගුරුවරුන් ළමයාට සේවා සපයන්නන් ලෙස හැසිරිය යුතුවේ. එම සේවාවන් ප්‍රයෝජනයට ගෙන ළමයා පාසලේ දී සිදු කරනු ලබන ඉගෙනුම් ක්‍රියාවලියට දායක විය හැකිය.තොරතුරු තාක්ෂණයෙන් සන්නද්ධ සිසු පිරිසක් බිහි කිරීම සඳහා ගත හැකි ක්‍රියා මාර්ගයන් නම්, ළමයා පරිගණක ප්‍රදර්ශන වලට සහ වැඩමුළු වලට සහභාගි කරවීම.පරිගණක භාවිතා කරන රජයේ ආයතන සහ පෞද්ගලික ආයතන වලට ක්ෂේත්‍ර චාරිකා රැගෙන යාම, පරිගණක තාක්ෂණය පිළිබඳව ක්‍රමානුකූලව ඉගෙන්වීම(ඇතැම් පාසල් වල 6 ශ්‍රේණියේ සිට 13 වසර දක්වා තොරතුරු සන්නිවේදන තාක්ෂණය ඉගෙන්වීම් කටයූතු සිදු කරයි. මෙහිදී ලබන දැනුම උසස් අධ්‍යාපනයට අඩිතාලම වන්නේය). පරිගණක තාක්ෂණයෙන් ලියවුණු පොත්පත් / සඟරා පරිශීලනයට අවස්ථාව සැලසීමයි.එමගින් පරිගණක මගින් කළ හැකි දෑ පිළිබඳව සිතීමටත් ඒ ඔස්සේ විවිධ ක්‍රියාකාරකම් සිදු කිරීමටත් අවස්ථාව සලසා ගැනීමයි.
උසස් පෙළ විෂය මාලාවට තොරතුරු තාක්ෂණය හඳුන්වා දීම
වර්තමානයේ තොරතුරු සන්නිවේදන තාක්ෂණය සාමාන්‍ය පෙළ විභාගය සඳහා වෛකල්පිත විෂයක් ලෙස පවතියි. ඇතැම් සිසුන් තොරතුරු හා සන්නිවේදන තාක්ෂණය වෙනුවට වෙනත් විෂයයන් සඳහා පෙනී සිටී. නමුත් උසස් පෙළ විෂය මාලාවට සාමාන්‍ය තොරතුරු තාක්ෂණය විෂය හඳුන්වා දීමෙන් සෑම සිසු සිසුවියකටම පරිගණක දැනුම ලබා දීම අපේක්ෂා කෙරේ.ඇතැම් පාසල් වල මෙම විෂය ඉගෙන්වීමේ කටයුතු තවමත් අරඹා නැත.වර්තමානයේ උසස් වැටුපක් සහිත රැකියාවක් ලබා ගැනීමට පරිගණක දැනුම අත්‍යවශ්‍ය වන බව නොරහසකි.
පරිගණක පිළිබඳව දෙමව්පියන්ගේ අල්ප දැනුම
ශ්‍රී ලංකාව වැනි දියුණු වෙමින් පවතින රටවල්වල දෙමව්පියන්ගේ පරිගණක දැනුම දුර්වල තත්වයේ පැවතීම නිසා ළමුන් ඉන් අයුතු ප්‍රයෝජන ගැනීම මෑත කාලීනව දැකිය හැකි මහත් වූ ඛේදවාචකයකි. මින් මිදීම සඳහා කළයුතු වන්නේ වැඩිහිටියන් සහ දෙමව්පියන් දැනුවත් කිරීම සහ පරිගණකයෙන් ගත හැකි ඉගෙනුම් කටයුතු පිළිබඳව ළමයා දැනුවත් කිරීමයි.එවිට ළමුන්ට පරිගණකය භාවිතයෙන් විවිධ අකටයුතුකම් කිරීම සඳහා අවස්ථාවක් නොලැබෙන අතරම පරිගණකය භාවිතයෙන් කළහැකි කාර්යයන් / ක්‍රියාකාරකම් පිළිබඳව ළමයාට තේරුම් යනු ඇත.
රැකියාවන් සඳහා අමතර සුදුසුකමක් ලෙස පරිගණක දැනුමට මුල්තැන
මෑත කාලීනව රැකියා ක්ෂේත්‍රයේ සෑම රැකියාවක් සඳහාම අමතර සුදුසුකමක් ලෙස පරිගණක දැනුම අත්‍යවශ්‍ය වන අතරම පාසලේදී ලබා දෙන අධ්‍යාපනයට අමතරව ප්‍රායෝගික දැනුමෙන් පිරිපුන් පුද්ගලයින් තම ආයතනවලට බඳවා ගැනීම ඔවුන්ගේ අරමුණයි.මෙම ප්‍රවණතාව පෞද්ගලික ආයතන වල මෙන්ම රාජ්‍ය ආයතනවල ද දැකිය හැකිය.මෙම ආයතන ඉංග්‍රීසි දැනුමට අමතරව තොරතුරු තාක්ෂණික (පරිගණක ) දැනුම පිළිබඳව විශේෂ අවධානයක් යොමු කරයි.ඉංග්‍රීසි සහ තොරතුරු තාක්ෂණික විෂයන් පිළිබඳව හොඳ දැනුමක් තිබීම රැකියාවක් තෝරා ගැනීමේ දී බෙහෙවින් ප්‍රයෝජනවත් වන අතරම ඉහළ වැටුප් තලයක් සහිත රැකියාවකට මූලික අඩිතාලම වන්නේය.ආයතනයක කාර්‍යක්ෂමතාවය ඉහළ නැංවීම සඳහා කාර්යාල කටයුතු වලදී ඉතා නිවැරදිතාවයකින් වැඩ කටයුතු සිදු කිරීම සඳහා අවශ්‍යමූලික දැනුම තොරතුරු සන්නිවේදන තාක්ෂණ විෂය හැදෑරීමෙන් ඔබට ලැබෙනු ඇත.
