පාසලේ දී තොරතුරු සන්නිවේදන තාක්ෂණ විෂය තෝරා ගැනීමේ ඇති වැදගත්කම - උසස්පෙළ තොරතුරු හා සන්නිවේදන තාක්ෂණය

පාසලේ දී තොරතුරු සන්නිවේදන තාක්ෂණ විෂය තෝරා ගැනීමේ ඇති වැදගත්කම

පාසලේ දී තොරතුරු සන්නිවේදන තාක්ෂණ විෂය තෝරා ගැනීමේ ඇති වැදගත්කම

පාසල්වල විෂයයක් ලෙස තොරතුරු හා සන්නිවේදන තාක්ෂණය(Information & Communication Technology - ICT) හඳුන්වා දී ගත වී ඇත්තේ වසර කිහිපයක් පමණි. 6 ශ්‍රේණිය සිට 9ශ්‍රේණිය දක්වා සියළුම සිසු සිසුවියන් හට මෙම විෂය දැනුම ඇතැම් පාසල් වල ලබා දෙන අතර අ.පො.ස (සා. පෙළ ) විෂය ධාරාව සඳහා තෝරා ගැනීමේ විෂයයක් ලෙස තොරතුරු සන්නිවේදන තාක්ෂණ (ICT) විෂය අධ්‍යයනය කිරීමේ අවස්ථාව ළමුන්ට උදාකර දී ඇත.මෙම විෂය තෝරාගැනීමේදී ඇතැම් සිසු සිසුවියන් අනවශ්‍ය භීතියක් දක්වනුයේ ප්‍රධානතම විෂයයන් වන ඉංග්‍රීසි සහ ගණිතය විෂයයන් කෙරෙහි දක්වන උදාසීන භාවයයි.එහෙත් මෙම විෂය සඳහා අවශ්‍ය වනුයේ සාමාන්‍ය ඉංග්‍රීසි , ගණිත දැනුමක් පමණි.විෂය අන්තර්ගතය සඳහා ලිඛිත සටහන් සහ ප්‍රායෝගික ක්‍රියාකාරකම් අන්තර්ගත වන අතර මෙම විෂය අධ්‍යයනය කිරීම ඉතාම පහසු වන අතරම විෂය කරුණු පහසුවෙන් මතක තබා ගැනීමේ හැකියාවද පවතී.මන්දයත් මෙම විෂය ප්‍රායෝගික විෂයක් වීම මෙහිදී මතකයට නැගිය යුතු වේ.



අ.පො.ස (සා. පෙළ ) විෂය ධාරාව සඳහාමෙම විෂය තෝරා ගැනීමෙන් අ.පො.ස (උ. පෙළ ) විෂයයක් සඳහා ද තොරතුරු සන්නිවේදන තාක්ෂණ විෂයතෝරාගැනීමේදී මහත්පහසුවක් වේ.මෙහිදී ඇති වැදගත්ම කරුණ වන්නේ උසස් පෙළ කළා , විද්‍යා වැනි අංශ සඳහා ද මෙම විෂය තෝරා ගැනීමට අවස්ථාව ලබා දීමයි.අ. පො.ස  (සා. පෙළ ) දී ලබා ගත් දැනුම උසස් අධ්‍යාපනය සඳහා පදනමක් වන්නේය.එපමණක් නොව විශ්ව විද්‍යාල අධ්‍යයන කටයුතු වලදී ද මෙම විෂය පදනම් පාඨමාලවක් ලෙස උගන්වනු ලබන අතර මෙහිදී ද මූලික පරිගණක දැනුම මහත් ප්‍රයෝජනයක් වනු ඇත.

වර්තමානයේ උසස් වැටුපක් සහිත රැකියාවක් ලබා ගැනීමට පරිගණක දැනුම අත්‍යවශ්‍ය වන අතරම අ.පො.ස  උසස් පෙළ විභාගයට පෙනී සිටි,  රැකියා අපේක්ෂකයින් හට තොරතුරු හා සන්නිවේදන තාක්ෂණ විෂය හදාරා තිබීම රැකියාවක් ලබා ගැනීම සඳහා මහත් පිටිවහලක් වනු ඇත. තවද, විශ්ව විද්‍යාල සහ උසස් අධ්‍යාපනය ලැබීමට අපේක්ෂා කරන සිසු සිසුවියන්ගේ අනාගත අධ්‍යයන කටයුතු සඳහා  මෙම විෂයය හැදෑරීම මහත් ප්‍රයෝජනවත් වනු ඇත.

පරිගණක ගුරුවරයාගේ භූමිකාව

පරිගණක තාක්ෂණයෙන් පිරිපුන් සිසු පිරිස් බිහි කිරීමෙහි ලා පාසලේ / පන්තියේ පරිගණක ගුරුවරයා ඇතුළු  අනෙකුත් ගුරු භවතුන්ට විශාල වගකීමක් පැවරී ඇත.මෙයට ප්‍රධානතම හේතුව වනුයේ බොහෝ නිවෙස් වල පරිගණක නොමැති වීමත් පාසලෙදී තනි තනිව පරිගණක යන්ත්‍ර භාවිතා කරන්නට තිබෙන කාලය සීමා සහිත වීමයි.අප පාසලේ වුවද මෑත කාලීනව 6 ශ්‍රේණියේ සිට 9 ශ්‍රේණිය දක්වා විෂයක් ලෙස පරිගණක විද්‍යාව උගන්වන අතරම එය හුදෙක් කළු ලෑල්ලට හා පොතට පමණක් සීමා නොවී හැකි සෑම අවස්ථාවකම ප්‍රායෝගික ක්‍රියාකාරකම් වල නිරත කිරීම අනිවාර්යයෙන්ම සිදුවේ.



එපමණක් නොව අ.පො. ස (සා.පෙළ ), අ.පො.ස (උ. පෙළ ) සහ සාමාන්‍ය තොරතුරු තාක්ෂණය විෂයද සිසුන් අතර ජනප්‍රිය වී ඇත.  මෙයට හේතුව වී ඇත්තේ මෙම විෂය ප්‍රායෝගික වීමත් ඉතාම කුඩා ප්‍රමාණයක් විෂය කරුණු පාඩම් කිරීමේ කටයුතු සිදු කිරීමටත් වීමයි.ළමයින් ප්‍රායෝගික ක්‍රියාකාරකම් වල නිරත කිරීම මෙම විෂයේ අනිවාර්යය කටයුත්තක් වේ.තවද විෂය කරුණු විෂය නිර්දේශයට පමණක් සීමා කළ යුතු නොවේ. දිනෙන් දින අළුත් වන ලෝකයේ විස්තර සහ තොරතුරු ළමයාට ඉදිරිපත් කිරීම ගුරු භවතාගේ කාර්යයභාරයයි.

පාසල්වල තොරතුරු සන්නිවේදන තාක්ෂණය  අධ්‍යයනය කිරීමේදී මුහුණපාන ගැටළු

පාසල්වල තොරතුරු සන්නිවේදන තාක්ෂණය විෂය හැදෑරීමේදී සිසුන් මුහුණපාන ප්‍රධානතම ගැටළුව වන්නේ පරිගණක සම්පත් වල ඌණතාවයි. නාගරික හා කොළඹ අවට පසල්වල මෙම ගැටළුව බොහෝ දුරට විසඳී ඇති අතර ග්‍රාමීය හා පිටිසර ප්‍රදේශ වල මෙය උග්‍ර ගැටළුවකි. මේ හේතුවෙන් ඇතැම් සිසුන් මෙම විෂය අ.පො.ස සාමාන්‍ය පෙළ සහ උසස් පෙළ සඳහා තෝරාගැනීමට මැළි කමක් දක්වයි.තොරතුරු හා සන්නිවේදන තාක්ෂණය විෂය හැදෑරීමේ දී පොතපතේ දැනුම හා කටපාඩම් ක්‍රමයෙන් ඉවත් වී ප්‍රායෝගික ක්‍රියාකාරකම් කිරීම අත්‍යවශ්‍ය වේ. තවද අන්තර්ජාල පහසුකම් ලැබෙන්නේ ද සීමිත පිරිසකට පමණි. 

තවත් කොටසකින් හමුවෙමු...