3 පාඩම, නොවරදින මග (ඉගැන්වීම් උපකාරක කෙටි සටහන්) - 8-වසර දහම් පාසල (බෞද්ධ)

3 පාඩම, නොවරදින මග (ඉගැන්වීම් උපකාරක කෙටි සටහන්)

සටහන:-

ජාතක කතා පොත් වහන්සේගේ එන පළමුවන කතාව වන අපණ්ණක ජාතකය පද්‍ය පන්තියක් ඇසුරෙන් මෙම පාඩමේදී ඉදිරිපත් කෙරේ. එක් එක් පද්‍යයක සරළ තේරුම පහතින් දක්වා ඇත. මෙය සටහන් පොතට ඇතුලත් කළ යුතු නැත.

1. බරණැස් නුවර බ්‍රහ්මදත්ත නම් රජු රාජ්‍ය කරන කාලයෙහි අප මහා බෝසතාණන් වහන්සේ වෙළඳ පවුලක ඉපදුනි. ගුණ නැණ බෙලෙන් යුක්ත වූ හෙතෙම තම වෙළඳ පිරිස සමග වෙළඳාමෙහි යාමට සූදානම් වූ සේක.

2. වෙළඳාමෙහි යෙදෙන, නමුත් උපායශීලී නොවන තවත් වෙළඳ නායකයෙක් ගැල් 500 ක් පුරාවට බඩු පුරවාගෙන බෝසතාණන් වහන්සේ හමුවීමට පැමිණියේය.

3. වෙළඳ කණ්ඩායම් දෙකම එකවර පිටත් වීමෙන් දෙපිරිසටම ලැබෙන ලාභය අඩු වේ. එබැවින් පළමුව එක් පිරිසක් ගොස් අනතුරුව අනෙක් පිරිස වශයෙන් වෙළඳාමෙහි යාම සුදුසු වන බැවින් පළමුව පිටත් වන්නේදැයි නැතහොත් පසුව පිටත් වන්නේදැයි තීරණයක් ගෙන තමාට දන්වන මෙන් බෝසතාණන් වහන්සේ අනෙක් වෙළඳ නායකයාට පැවසූ සේක.

4. පළමුව යන කණ්ඩායම නිසා මාර්ගය කැඩී බිඳී කඩතොලු වන බැවින්, පළමුව යාමෙන් නොකැඩුනු මාර්ගයක යා හැකි යැයිද, පෙර කිසිවෙකු විසින් භාවිතා නොකරන ලද ජලය හා ආහර ලබා ගත හැකි යැයිද, තමන්ට කැමති කැමති මිළකට රැගෙන යන බඩු විකිණීමෙන් ලොකු ලාභයක් ලැබිය හැකි යැයිද අනෙක් වෙළඳ නායකයා සිතුවේය.

5. පළමුව යාමෙන් වැඩි වාසියක් ලැබෙතැයි සිතූ හෙතෙම, බෝසතුන් වෙත ගොස් තමා පිරිස සමග පළමුව පිටත් වීමට තීරණය කළ බව දැන්වීය.

6. ඔහුගේ සිතේ ඇති අදහස නුවණින් දැනගත් බෝසතාණන් වහන්සේ ඔහුට පළමුව වෙළඳාමේ යාමට අවස්ථාවක් දී දෙවනුව සිය පිරිස සමග වෙළඳාමේ යාමට සූදානම් වූ සේක.

7. අනෙක් වෙළඳ නායකයා බෝසතාණන් වහන්සේට වඩා ලාභ උපයාගෙන සැප සම්පත් විඳීම පිළිබඳව සිතමින් වෙළඳ භාණ්ඩ රැගත් ගැල් පන්සීයද රැගෙන ගමන කළේය.

8. වියලි කාන්තාරයක් මැදින් වැටී ඇති මෙම රළු, කටුක ගමන් මාර්ගය ඉතා දුෂ්කරය. ගමන් මහන්සියෙන් සහ නිදිමතින් යුක්තව දීර්ඝ වූ කාන්තාරය මැදින් ගමන් කරන මෙම පිරිසට ඉදිරියෙන් පැමිණෙමින් තිබුනු අශ්ව රථයක සිටින අත මිට සරු තවත් පිරිසක් මුනගැසුණි. ඔවුන් විසින් මෙම වෙළඳ නායකයා ඇතුලු පිරිසට තව නොබෝ දුරකින්ම ජලය ඇති තැනක් හමුවන බව දැන්වීය.

9. තෙත් වූ ඇඳුම් ඇඳගෙන සිටි ඒ පිරිස පැවසූ දේ කෙරෙහි විශ්වාසය තැබූ වෙළඳ නායකයා තමන් විසින් ගෙන යමින් තිබූ දිය බඳුන් හිස් කරවා බර සැහැල්ලු කරවාහෙන නොදන්නා මාර්ගයෙහි ඉදිරියට ගමන් කිරීමට සිය වෙළඳ පිරිසට උපදෙස් දුන්නේය.

10. මෙසේ ගමන් කරන වෙළඳ පිරිස කෙතරම් ඉදිරියට ගියද ජලය ඇති තැනක් හමු වුනේ නැත. දඩි පිපාසයෙහ් සහ බඩගින්නෙන් සිටි පිරිස නින්දේ සිටියදීම මරා දැමීමට යක්ෂ කණ්ඩාමය සමත් විය. පෙර දිනක මුනගැසී ඉදිරියෙන් ජලය තිබේ යැයි දැන්වූයේ වෙස් වලාගත් යක්ෂ පිරිසක් බව හැඳින ගැනීමට වෙළඳ පිරිසට නොහැකි විය.

11. පළමු පිරිස නිකම් ගොස් මාස දෙක තුනකට පසුව වෙළඳාමට පිටත් වීමට සුදුසු කාලය මෙය බව අවබෝධ කරගත් බෝසත් වෙළඳ නායක තෙම සිය පිරිස වෙත පැමිණ මේ ආකාරයෙන් උපදෙස් දුන් සේක.

12. තමන් පිවිසෙන්නේ රළු, වියලි කාන්තාරයක බැවින් තමන් විසින් රැගෙන යන ආහාර හා ජලය කිසිඳු හේතුවක් මත ඉවත නොදැමිය යුතු බව දැනගන්න. තවද වියලි කාන්තාරයක ආහාරය ගැනීමට සුදුසු ඵල වැල තිබිය නොහැකිය. එමනිසා අතර මගදී හමුවන කිසිඳු ආහාරයක් තමාගෙන් නොවිමසා ආහාරයට නොගත යුතු බව දැනගන්න.

13. ගැල් නායක බෝසතාණන් වහන්සේගේ වටිනා උපදෙස් සිතට ගත් කණ්ඩායම වෙළඳාම් කොට ලාභ ලැබීමේ අරමුණින් ගැල් පේලියද රැගෙන වෙළඳාමේ යාමට පිටත් විය.

14. බෝසතාණන් වහන්සේ ඇතුලු ගැල් කණ්ඩායම රැවටීමට උත්සාහ කළ යක්ෂ කණ්ඩායම සුපුරුදු පරිදි වෙස් වලාගෙන පැමිණ ඉදිරියෙහි ජලය ඇති බව සිත් ගන්නා ආකාරයෙන්, මිහිරි වදනින් පැවසූවද ගැල් නායක තෙම මුලා කිරීමට ඔවුන්ට නොහැකි විය.

15. මෙම පිරිස ඉදිරියෙන් ජලය ඇති බවක් පැවසූවද එය සත්‍යදැයි විමසා බලා තහවුරු කර ගැනීම නුවණැති කම බැවින් සියලු දෙනා එක්ව අවට වා තලය පිරික්සා බැලූවද වාතයෙහි තෙතමනයක් නොවීය. රළු වියලි බව පමණක්ම වීය.

16. මිනිස් වෙසින් පැමිණියත් මේ සිටින්නේ යක්ෂ රැලක් බව නුවණින් වටහාගෙන අවබෝධ කරගත් වෙළඳ නායකයා ඇතුලු පිරිස තමා විසින් රැගෙන ආ ජලය ඉවත නොදා සුරක්ෂිතව තබාගෙන ගමන යාමට පිටත් වීය.

17. බෝසතාණන් වහන්සේගේ තැනට සුදුසු නුවණ නිසා වෙළඳ කණ්ඩායමේ ජීවිත රැකුණි. ඔවුන්ගේ වෙළඳාම සාර්ථක වී ලාභ ඉපැයීමට සමත් වූ අතර එමගින් ඔවුන් සියලු දෙනාගේ ජීවිත ආලෝකමත් වුණි. තැනට සුදුසු නුවණ යෙදීමෙන් බාදක බිඳ හෙලිය හැකි බව ජාතක කතා පොත් වහන්සේ අපට මේ කතාවෙන් කියා දෙයි.

අභ්‍යාස:-

1. පෙළ පොතේ ක්‍රියාකාරකම් අංක 2 කරවන්න.