අපෙන් උපදෙස් : ඉගෙනගත්තත් නැතත් දරුවට ගහන්නට නම් එපා නෝනේ.

ඉගෙනගත්තත් නැතත් දරුවට ගහන්නට නම් එපා නෝනේ.


අකුරු හරිහැටි ගලපගන්න බැරි කමට වරදක් ඇතොත්   ලියුමේ
තරහ නොගෙනම කියවන්න මේ කඳුලු බර ජීවිතයේ  අරුමේ
පොඩිඑකා ඉස්කෝලේ යන්නට බැහැයි කියන එක තමයි  කරුමේ
අනේ නෝනේ මක් කරන්න ද දුකම විතරයි අපේ  උරුමේ

අනුන්ගේ කුණු ඉඳුල් දැලි හැලි වලන් සෝදා ගන්න සොච්චම
ඉවරයිනේ එක වේල කන්නට හාල් තුනපහ ටිකක්   ගත්තම
සභාවේ කුණු ඇද්ද පුතුගේ අප්පච්චිගේ සොහොන  දැක්කම
යන්න හිතෙනවා එයා ලඟටම ඉවසන්නේ දරු පැටියා  හින්දම

පොතක් පෑනක් අරන් දෙන්නට ඕනකම මගේ හිතේ  තිබුණා
ඉල්ල ඉල්ලා වද නොකර අඩුපාඩු ඉවසන් පුතා  හැදුනා
කහට උගුරක් දෙකක් බීලා ඉස්කෝලේ සතුටින්ම  රැදුනා
පොඩිඑකාගේ කඳුලු එක්කම හීන ඔක්කොම මගේ බිඳුනා

එකපොතේ සින්හලත් ඉංග්‍රීසියත් ගණනුත් හදා  තිබුණලු
පොතේ අග පිටුවේම දෙමළත් අකුරු තුන හතරක්ම  ලිව්වලු
පැන්සලෙන් ලියු රචනාව උඩ පන්සලක චිත්‍රයක්  ඇන්දලු
පොත අරගෙන එන්න කිව්වම අනේ උගේ අතපයත්  ගැහුනලු

අපිත් කන්නේ එකම වේලයි ඒත් අද නෑ අතින් කෑවේ
අතේ අල්ලත් ඇගිලි දෙකකුත් පුපුරළා මම බෙහෙත්  ගෑවේ
පුංච් ඇඟපත රිදෙනවා ඇති නින්දෙනුත් දැන් කෙදිරි  ගෑවේ
පිටේ වේවැල් පහරවල් තුන හතර දැක්කම පපුව දෑවේ

පය තියෙන හැම තැනම ගින්දරපිච්චෙනවා අපි දවස  ගානේ
අපි කඳුලු හැංගුවා අපිටම හිනාවුනු දවසකුත්  නෑනේ
දුක විඳලා මට හොදට පුරුදුයි කොල්ලටයි සැනසුමක්  ඕන
ඉගෙනගත්තත් නැතත් දරුවට ගහන්නට නම් එපා නෝනේ

 

--  සංජීවනී දහනායක  ---


ලිපිය කියවූ : 0