දත්ත සන්නිවේදනය (Data Communication) ආශ්‍රිත ගැටළු - 4 කොටස - උසස්පෙළ තොරතුරු හා සන්නිවේදන තාක්ෂණය

දත්ත සන්නිවේදනය (Data Communication) ආශ්‍රිත ගැටළු - 4 කොටස

දත්ත සන්නිවේදනය (Data Communication) ආශ්‍රිත ගැටළු


 

22. සාම්ප්‍රධායික දත්ත සන්නිවේදන ක්‍රම වල අවාසි මොනවා ද?

පණිවුඩය හරියාකාරවම අදාල පුද්ගලයා වෙත ලඟාවූයේ ද නැද්ද යන්න දැනගත නොහැකි වීම (ලිපි අස්ථාන ගත වීම වැනි ).
අකාර්‍යක්ෂම වීම හෙවත් කාලය ගත වීම. එමන්ම ලැබුණු ලිපි සඳහා ද පිළිතුරු ලැබීමට ද විශාල කාලයක් ගත වීම.
භූගෝලීය සීමා වලින් වැට කඩොලු බැඳ සීමා වී තිබීම. එනම් රටකින් රටකට ලිපි යැවීමේ දී සහ ලැබීමේ දෙ විවිධ නීති රීති සහ රෙගුලාසි වලට යටත් වීමට සිදු වීම සහ විවිධ ප්‍රවාහණ ක්‍රම භාවිතය නිසා ඇතිවිය හැකි අනාරක්ෂිත භාවය.
පිළිතුරු ලැබෙන තෙක් දින ගණන් සති ගණන් බලා සිටීමට සිදුවීම.
පණිවිඩය විකෘති වී හෝ වෙනස් වී අදාල පුද්ගලයාට ලැබීම (කට කතා)
ලිපි වැනි දේ අති අත හෝ වාහන මගින් අදාල පුද්ගලයාට යැවීමේදී හානි සිදුවීම (වර්ෂාවෙන්, අව්වෙන්)

 

23. දත්ත සන්නිවේදනය කල හැකි ඉලෙක්ට්‍රොනික හෙවත් පරිගණක පාදක ක්‍රම මොනවා ද?

රූපවාහිනිය / ගුවන් විදුලිය (Television / Radio)
දුරකථනය (Telephone)
පණිවිඩ හුවමාරු චන්ද්‍රිකා (Communication Satellites)
පරිගණක ආශ්‍රිත දත්ත සන්නිවේදනය (Data communication through computer networks)
සංගෘහිත සේවා අංකිත ජාලය (ISDN – Integrated Services Digital Network)
අසමමිතික අංකිත දායක රැහැන (ADSL / DSL – Asymmetric Digital Subscriber Line )
කේත බෙදුම් බහු ප්‍රවේශය (CDMA – Code Division Multiple Access)
පොදු දත්ත මලු ගුවන් විදුලි සේවය (GPRS – General Packet Radio Service)
ජංගම සන්නිවේදනය සඳහා වන ගෝලීය පද්ධතිය (GSM – Global System for Mobile Communication)

 

24. රූපවාහිනී යන්ත්‍රය සහ ගුවන් විදුලි යන්ත්‍රය මගින් දත්ත සන්නිවේදනය සිදු කරනු ලබන ආකාරය පහදන්න.

රූපවාහිනිය යනු යම්කිසි දුර ප්‍රමාණයක් හරහා චලනය වන රූප සහ ශබ්ද ලබා ගැනීම හා විකාශනය සඳහා බහුලව භාවිතා කරන විදුලි සංදේශ පද්ධතියකි. ගුවන් විදුලිය මගින් හඬ පමණක් ශ්‍රවණය කළ හැක. තොරතුරු සන්නිවේදන තාක්ෂණයේ දියුණුවත් සමගම කාලීන සිදුවීම් ක්ෂණිකයෙන් අප වෙත ලබා දීමට මෙම ඉලෙක්ට්‍රොනික හා විද්‍යුත් මාධ්‍ය දෙකට හැකියාව ඇත. දත්ත සම්ප්‍රේෂණය සඳහා ගුවන් විදුලි තරංග (Radio waves) මාධ්‍ය ලෙස යොදා ගන්නා අතර වයි ෆයි (Wi-Fi) සහ බ්ලූටූත් (Bluetooth) ගුවන් විදුලි තරංග මත ක්‍රියා කරනු ලැබේ.

 

25. දුරකථනය මගින් දත්ත සනිවේදනය කරනුයේ කෙසේ ද?

දුරකථනය යනු ශබ්දය විද්‍යුත් සංඥා ලෙස සම්ප්‍රේෂණය කිරීමට යොදා ගන්නා උපකරණයකි. පුද්ගලයින් දෙදෙනකු හෝ කිහිපදෙනකු සමග කෙරෙන සංවාද වලදී යොදා ගනියි. බොහෝ දුරකථන ක්‍රියාත්මක වන්නේ වඩාත් සංකීර්ණ දුරකථන ජාලයක් හරහා විද්‍යුත් සංඥා සම්ප්‍රේෂණය කිරීමෙනි. වර්ථමානයේ ස්ථාවර දුරකථන වලට වඩා ජංගම දුරකථන වලට මහජනතාවගේ වැඩි නැඹුරුවක් පවතී.

 

26. දත්ත සන්නිවේදනය සඳහා පණිවිඩ හුවමාරු චන්ද්‍රිකා වල දායකත්වය පිළිබඳව කෙටි හැඳින්වීමක් කරන්න.

චන්ද්‍රිකා තාක්ෂණයේ පියා දිවංගත ශ්‍රී ලාංකික විද්‍යාඥ ශ්‍රීමත් ආතර් සී. ක්ලාක් මහතා ලොවට හදුන්වා දුන් චන්ද්‍රිකා තාක්ෂණය මගින් වර්ථමාන ලෝකයේ තොරතුරු සනිවේදන කටයුතු වඩාත් පහසු වී ඇත. ලෝකයේ විවිධ රටවල් හෝ රාජ්‍යයන් අතර දත්ත හා තොරතුරු හුවමාරු කිරීම සඳහා යොදා ගනු ලබන්නේ චන්ද්‍රිකා තාක්ෂණයයි. පෘථිවිය වටා නිරන්තරයෙන් ක්‍රියාත්මක වන චන්ද්‍රිකා කක්ෂ ගත කර ඇත. සන්නිවේදනය සඳහා යොදා ගනු ලබන්නේ ක්ෂුද්‍ර තරංගයි (Micro Waves). ඉතා විශාල ධාරිතාවයකින් යුතු දත්ත සහ තොරතුරු වඩා දුරස්ථව පිහිටි ස්ථන වලට සන්නිවේදනය කිරීමේ හැකියාව ඇති අතරම වඩාත් වේගවත් සන්නිවේදන ක්‍රමයක් මේ සඳහා යොදා ගනී.

චන්ද්‍රිකා සම්ප්‍රේෂණයේ දී ක්ෂුද්‍ර තරංග ආකාරයට දත්ත සම්ප්‍රේෂණය සිදු කරනු ලබන අතර ක්ෂුද්‍ර තරංග සම්ප්‍රේෂණයේ දී දත්ත ගමන් කරනු ලබන්නේ එක් රේඛාවකටයි. එම නිසා සම්ප්‍රේෂණ මධ්‍යස්ථාන එකිනෙක හා දර්ශනය විය යුතු වේ. මධ්‍යස්ථාන අතර දුර දත්ත සම්ප්‍රේෂණ සීග්‍රතාවය කෙරෙහි ද බලපායි. චන්ද්‍රිකා සම්ප්‍රේෂණය මගින් ඕනෑම දුරකට දත්ත සම්ප්‍රේෂණය කළ හැකිවේ. අන්තර්ජාල සන්නිවේදනය සඳහා චන්ද්‍රිකා භාවිතා වේ. (ආශ්‍රිත ග්‍රන්ථ: අ.පො.ස (සා.පෙළ) තොරතුරු සන්නිවේදන තාක්ෂණය - 10 ශ්‍රේණිය)

 

තවත් කොටසක් බලාපොරොත්තු වන්න.