2021 වසරේ අභ්‍යවකාශය කුමක් වෙයිද?

2021 වසරේ අභ්‍යවකාශය කුමක් වෙයිද?

කොරෝනා සමඟින් ගෙවුණු අමිහිරි 2020 වසර අවසන් කරමින් 2021 වසර හෙට ආරම්භ වේ. ඉතින් අභ්‍යවකාශ ක්ෂේත්‍රයට උනන්දු ඔබට හෙටින් ආරම්භ වන 2021 වසරේ දැක බලාගැනීමට හැකි වන්නේ මොනවාද? අපි ඒ ගැන සොයා බලමු

සෞරග්‍රහ මණ්ඩල ගවේෂණය

2020 වසරේ අඟහරු ග්‍රහයා බලා යැවූ යානා 3 2021 පෙබරවාරි වන විට අඟහරුට ආසන්න වනු ඇත.නාසා ආයතනයේ Mars 2020 යානය පෙබරවාරි 18 වනදා කෙළින්ම අඟහරුගේ වායුගෝලයට ඇතුළු වී ගොඩබසිනු ඇත.

එක්සත් අරාබි එමීර් රාජ්‍යයේ Hope යානය හා චීනයේ Tianwen-1 යානය අඟහරුගේ කක්ෂයට ඇතුළු වන අතර පසුව Tianwen-1 යානයේ ගෙන යන ගොඩබැසීමේ යානය (හා එයට සම්බන්ධ කර ඇති රෝවරය) අප්‍රේල් 23 වනදා අඟහරුට ගොඩබසිනු ඇත.

2016 වසරේ සිට බ්‍රහස්පති ග්‍රහයා වටා කක්ෂගතව සිටින නාසා ආයතනයේ Juno යානය ජූලි මස බ්‍රහස්පතිගේ වායුගෝලයට ඇතුළු කර විනාශ කර දැමීමට නියමිත වේ. කෙසේ නමුත් මෙහෙයුම දීර්ඝ කිරීමට අනුමැතිය ලැබුනොත් යානය වායුගෝලයට ඇතුළු කිරීම සිදු කරන්නේ නැත.

ප්‍රධාන ග්‍රහක වළල්ලේ එක් ග්‍රහකයක් හා ට්‍රෝජන් ග්‍රහක 6 ක් ගවේෂණය කිරීමට වසර 12 ක මෙහෙයුමක් ආරම්භ කරමින් නාසා ආයතනයේ Lucy යානය United Launch Alliance සමාගමේ Atlas V 401 රොකට්ටුවක් මඟින් ඔක්තෝම්බර් මස දියත් කරනු ඇත.

ග්‍රහකයක් හා ගැටී එහි ගමන් මාර්ගය වෙනස් කිරීමට උත්සාහ කරන නාසා ආයතනයේ DART යානය ජූලි මාසයේදී SpaceX සමාගමේ Falcon 9 Block 5 රොකට්ටුවක් මඟින් දියත් කරනු ඇත.

Lucy යානය

චන්ද්‍ර ගවේෂණය

2021 වසරේ චන්ද්‍රයා වෙත යානා කිහිපයක්ම දියත් කිරීමට නියමිතයි. නාසා ආයතනයේ Commercial Lunar Payload Services සේවාව යටතේ චන්ද්‍රයා වෙත යානා යැවීමට සිටින පෞද්ගලික සමාගම් අතරින් 2021 දී Astrobotic Technology හා Intuitive Machines සමාගම්වල යානා චන්ද්‍රයා වෙත යවනු ඇත. ඊට අමතරව Lunar Gateway චන්ද්‍ර නැවතුම්පළේ කක්ෂය පරීක්ෂා කිරීමට යවන CAPSTONE යානයත් ලබන වසරේ අප්‍රේල් මස දියත් කරනු ඇත.

1976 දී සෝවියට් දේශයේ නැවතුණු Luna චන්ද්‍ර ගවේෂණ වැඩසටහන නැවත ආරම්භ කරමින් Luna 25 යානය චන්ද්‍රයා වෙත යැවීමට රුසියානු අභ්‍යවකාශ ඒජන්සිය වන ROSCOSMOS ආයතනය කටයුතු කරනු ඇත.

ඉන්දීය අභ්‍යවකාශ පරීක්ෂණ ආයතනය Chandrayaan-3 යානය ලබන වසරේ චන්ද්‍රයා වෙත යවනු ඇත.

කෙසේ නමුත් වැදගත්ම මෙහෙයුම වන්නේ නාසා ආයතනය 2024 දී නැවත චන්ද්‍රයා මතට මිනිසුන් යැවීමට සකස් කරන Orion යානයේ හා Space Launch System අති දැවැන්ත රොකට්ටුවේ පළමු දියත් කිරීමයි. මෙම Artemis 1 පළමු මෙහෙයුමේදී Orion යානයේ කිසිවෙක් ගමන් නොකරන අතර දශක ගණනාවකට පසු Saturn V ප්‍රමාණයේ රොකට්ටුවක් නැවත අභ්‍යවකාශ ගත වන පළමු අවස්ථාව මෙයයි.

 මානව අභ්‍යවකාශ ගවේෂණය

මාර්තු මස සිදු කරනු අතර වසර මැදදී ගගනගාමීන් රැගෙන පරීක්ෂණ මෙහෙයුමක් සිදු කරනු ඇත.

ඒ අතර Commercial Crew Program වැඩසටහනේ අනිත් සමාගම වන SpaceX සමාගම ලබන වසරේදී නාසා ආයතනය වෙනුවෙන් අන්තර්ජාතික අභ්‍යවකාශ නැවතුම්පොළට ගගනගාමීන් ගෙන යන තවත් මෙහෙයුම් 2 ක් සිදු කරන අතර ලෝක ප්‍රසිද්ධ නළුවෙක් වන Tom Cruise හා තවත් පෞද්ගලික ගගනගාමීන් තිදෙනෙක් සමඟින් පෞද්ගලික අභ්‍යවකාශ මෙහෙයුමක් දියත් කිරීමට නියමිත වේ.

චීනයේ මානව අභ්‍යවකාශ වැඩසටහන ලබන වසරේදී නැවත කාර්යබහුල වීමට නියමිත අතර ඔවුන්ගේ අභ්‍යවකාශ නැවතුම්පළේ Tianhe මධ්‍යම මොඩියුලය හා Wentian විද්‍යාගාර මොඩියුලය ලබන වසරේ දියත් කරනු ඇත. ඉන්පසු Shenzhou 12 හා 13 යානාවලින් නැවතුම්පළට ගගනගාමීන් යැවීමට නියමිත වේ.

මේ අතර අන්තර්ජාතික අභ්‍යවකාශ නැවතුම්පළට රුසියාවෙන් අලුත් මොඩියුලයක් ලබන වසරේ දියත් කරනු ඇත. Nauka නමින් හැඳින්වෙන මේ විද්‍යාගාර මොඩියුලය සම්බන්ධ කිරීම සඳහා දැනට නැවතුම්පළේ පවතින Pirs නම් කුඩා මොඩියුලය ගලවා ඉවත් කළ යුතු වේ. ඒ සඳහා මේ වන විට එයට සම්බන්ධ වී පවතින රුසියානු Progress යානය ලබන වසරේදී නැවතුම්පළෙන් වෙන් වන්නේ Pirs මොඩියුලයත් සමඟයි.

රොකට් තාක්ෂණය

ලබන වසරේදී අලුත් රොකට් ගණනාවක්ම හඳුන්වාදීමට නියමිත වේ. ඉහත සඳහන් කළ අති දැවැන්ත Space Launch System රොකට්ටුවට අමතරව ඇමරිකාවේ United Launch Alliance සමාගමේ Atlas V හා Delta IV Heavy රොකට් වෙනුවට හඳුන්වාදෙන Vulcan Centaur රොකට්ටුව ලබන වසරේදී පළමු වරට දියත් කරනු ඇත. මෙය Atlas V රොකට්ටුවට වඩා අඩු වියදම් නමුත් වඩා බලවත් රොකට්ටුවක් වන නිසා, දැනට පවතින අඩු වියදම් රොකට්ටුවක් වන SpaceX සමාගමේ Falcon 9 රොකට්ටුවට තියුණු තරගයක් ලබා දෙමින් සිවිල්, හමුදා හා වාණිජ දියත් කිරීම් ගණනාවක්ම දිනා ගැනීමට සමත් වී ඇත.

ඊට අමතරව Blue Origin සමාගමේ New Glenn දැවැන්ත රොකට්ටුවත් ලබන වසරේ හඳුන්වාදෙනු ඇත. SpaceX සමාගමේ Starship යානා ලබන වසරේදී පෘථිවි කක්ෂයට යැවීමටත් බලාපොරොත්තු වේ.

මේ අතර ජපානයේ Mitsubishi Heavy Industries සමාගමේ දැනට භාවිතා කරනා H-II රොකට්ටුව වෙනුවට H-3 නම් අලුත් රොකට්ටුවක් හඳුන්වා දීමට බලාපොරොත්තු වේ. මෙම නව රොකට්ටුව H-II රොකට්ටුවේ මිලෙන් අර්ධයකටත් වඩා අඩුවෙන් දියත් කරන බව සඳහන් වේ.

යුරෝපයේ Arianespace සමාගමත් ඔවුන්ගේ දැනට පවතින Ariane 5 රොකට්ටුවට වටා මිල අඩු Ariane 6 රොකට්ටුව ලබන වසරේදී පළමු වරට පියාසර කිරීමට නියමිත වේ.

මේවාට අමතරව කුඩා ප්‍රමාණයේ රොකට්ටු විශාල ප්‍රමාණයක් ඇමරිකාව, චීනය, ඉන්දියාව, ස්පාඤ්ඤය, ජර්මනිය, ඔස්ට්‍රේලියාව හා කැනඩාව යන රටවලින් හඳුන්වා දීමට නියමිත වේ.

චන්ද්‍රිකා

වසරේ වැදගත්ම දියත් කිරීමක් වන්නේ වසර ගණනාවක් පුරා ප්‍රමාද වූ James Webb අභ්‍යවකාශ දුරේක්ෂයයි. මෙය ඉදි කරන ලද විශාලතම ප්‍රකාශ අභ්‍යවකාශ දුරේක්ෂය වන අතර Ariane 5 රොකට්ටුවක් මඟින් දියත් කරනු ඇත.

මැයි මාසයේදී Falcon Heavy රොකට්ටුවක් මඟින් එක්සත් ජනපද අභ්‍යවකාශ හමුදාවේ රහසිගත චන්ද්‍රිකාවක් දියත් කිරීමට නියමිත අතර මෙහිදී පළමු වරට බූස්ටර් දෙක එකවර ඩ්‍රෝන්ෂිප් දෙකක් මතට ගොඩබස්වනු දැක ගැනීමට හැකි වනු ඇත.

                                                                                                              - Octomber Sky facebook පිටුවේ උපුටා ගත්තකි.