අ.පො.ස සා.පෙළ 2015 විභාග අත්වැල - ප්‍රශ්න මාලාව 35

97. අංක ගණිතමය හා තාර්කික ඒකකයේ (ALU – Arithmetic and Logic Unit) කාර්යය භාරය කුමක්ද?

පරිගණක පද්ධතියක සිදුවන දත්ත එකතු කිරීම්, අඩු කිරීම් , ගුණ කිරීම් සහ බෙදීම් යන ගණිතමය මෙහෙයුම් ද AND, OR, NOT, <, >, = වැනි තාර්කික මෙහෙයුම් ද අංක ගණිතමය හා තාර්කික ඒකකය මගින් සිදු කරයි.

උදා: 5 < 9
                8 + 9

98. පරිගණක මතකය (Computer memory) යන්නෙන් අදහස් කරන්නේ කුමක්ද?

දත්ත හා තොරතුරු ආචයනය හෙවත් තැන්පත් කිරීමේ හැකියාව පරිගණකය සතු විශේෂ ලක්ෂණයකි. විවිධ පරිගණක මතක එසේත් නැතිනම් ආචයන උපක්‍රම (Storage devices) දත්ත හා තොරතුරු ආචයනය කර ගැනීම සඳහා යොදා ගන්නා අතර ඒවායේ ක්‍රියාකාරිත්වය විවිධාකාරය. පරිගණක මතකය පහත ආකාරයට වර්ගීකරණය කළ හැකිය.

99. පරිගණක මතකය වර්ගීකරණය (Classification of computer memory) කල හැකි ආකාර මොනවාද?

• ප්‍රාථමික මතකය / ප්‍රධාන මතකය (Primary Memory / Main Memory)
• සසම්භාවී පිවිසුම් මතකය (RAM – Random Access Memory)
• පඨන මාත්‍ර මතකය (ROM – Read Only Memory)
• වාරක මතකය (Cache Memory)
• ද්විතීයක මතකය (Secondary Memory)

100. පරිගණකයේ ප්‍රාථමික මතකය (Primary memory / Main memory) යන්නෙන් අදහස් කරන්නේ කුමන වර්ගයේ මතකයක් ද?

මධ්‍ය සැකසුම් ඒකකයට සෘජුවම  / කෙලින්ම ප්‍රවේශ විය හැකි විශාල මතක ප්‍රදේශය ප්‍රාථමික හෙවත් ප්‍රධාන මතකයයි. මධ්‍ය සැකසුම් ඒකකය විසින් ධාවනය කරනු ලබන වැඩසටහන් හා දත්ත ප්‍රධාන මතකය තුළ තැන්පත්ව තිබිය යුතුවේ. පරිගණක යන්ත්‍රය ක්‍රියාත්මක වීමේ දී සිදුවන්නේ දෘඩ තැටිය / සංගත තැටිය / සංඛ්‍යාංක බහුවිධ තැටිය වැනි ද්විතීයක ආචයන උපාංගයක තැන්පත් කොට ඇති වැඩසටහන් හෝ ක්‍රමලේඛ (programs) ප්‍රධාන මතකයට ප්‍රවේශ කර මධ්‍ය සැකසුම් ඒකකයට අවශ්‍ය ලෙස ඒවා පාලනය කරමින් වැඩසටහන් ක්‍රියාත්මක වීමයි. මේ සඳහා ප්‍රාථමික මතකය බෙහෙවින් වැදගත් වේ.

මධ්‍ය සැකසුම් ඒකකය විසින් වරින් වර ප්‍රවේශ කිරීමක් සිදුවන නිසා ප්‍රධාන මතකය, සසම්භාවී පිවිසුම් මතකය (RAM – Random Access Memory) ලෙස ද හැඳින්වේ. ප්‍රාථමික මතකය ආකාර තුනකි.

                සසම්භාවී පිවිසුම් මතකය (RAM – Random Access Memory)
                පඨන මාත්‍ර මතකය (ROM – Read Only Memory)
                වාරක මතකය (Cache Memory)

101. පරිගණක මතකයට වාරක මතකයෙහි (Cache memory) අවශ්‍යතාවය පැහැදිලි කරන්න.

වාරක මතකය අනෙකුත් මතක වර්ග වලට වඩා ප්‍රමාණයෙන් කුඩා වූවත් ඉතා වේගවත් වේ. මෙය මධ්‍ය සැකසුම් ඒකක මතකය ලෙස ද හැඳින්වේ. මධ්‍ය සැකසුම් ඒකකය සහ ප්‍රාථමික මතකය අතර අතරමැදියා ලෙස ක්‍රියාකරයි.

මධ්‍ය සැකසුම් ඒකකය ප්‍රථමයෙන් දත්ත සහ විධාන තිබේ දැයි වාරක මතකය තුල පරීක්ෂා කර බලයි. මෙම ක්‍රියාවලිය නිසා මධ්‍ය සැකසුම් ඒකකයෙහි වේගය වැඩිවේ. නමුත් දත්ත හා විධාන වාරක මතකය තුළ නොමැති විට ප්‍රාථමික මතකය වෙතින් දත්ත හා විධාන ලබා ගෙන ඒවා වාරක මතකය තුළ තැන්පත් කරමින් මධ්‍ය සැකසුම් ඒකකය වෙත යොමු කරයි. වාරක මතකය ද තාවකාලික හෙවත් නෂ්‍ය මතකයකි (Volatile memory). මෙම මතකයේ ආකාර තුනකි. එනම් පළමු මට්ටමේ වාරක මතකය (L1 Cache), දෙවන මට්ටමේ වාරක මතකය (L2 Cache) හා තෙවන මට්ටමේ වාරක මතකයයි (L3 Cache). Source : Text Book – Grade 10 (New Syllabus)

102. වාරක මතක (Cache memory)බෙදා දැක්විය හැකි ආකාරයන් මොනවා ද?

• පළමු මට්ටමේ වාරක මතකය (L1 Cache)
• දෙවන මට්ටමේ වාරක මතකය (L2 Cache)
• තෙවන මට්ටමේ වාරක මතකයයි (L3 Cache)
  

තවත් කොටසක් බලාපොරොත්තු වන්න.