6 - පිය රජුගේ පළමු වැඳීම
සුද්ධෝදන මහ රජුගේ ගුරුවරයා වූයේ කාලදේවල තාපසතුමා ය. එතුමා කුමරු බලන්න රජ මාලිගාවට පැමිණියා. "මහ රජුනි, ඔබගේ පින්වත් පුත් කුමරු දකින්නට මම කැමැතියි," තාපසතුමා කිවුවා.
පුත් කුමරු දෝතට ගත් රජතුමා ගුරුවරයා ඉදිරියට පැමිණියා. "පුතේ තාපසතුමාට වඳින්න," රජතුමා පුත් කුමරු තවුසා වෙතට ළං කළා.
කුමරුගේ දෙපතුල තාපසතුමාගේ ජටාවේ වැදුණා. තාපසතුමා පුදුම වුණා. පුත් කුමරුගේ පින් මහිමය දැක එක් වර ම නැගිට්ටා. කුමරුට වැන්දා. මෙය දුටු පිය රජතුමා ද කුමරුට වැන්දා. එය පිය රජුගේ පළමු වැඳීම ය.