3 - හොඳ දරුවෝ වෙමු
සංඛ - සීයේ හෙට දහම් පාසලේ දී මට කතාවක් කරන්න තියෙනවා.
සීයා - මොකක් ගැන ද පුතා?
සංඛ - 'හොඳ ළමයෙක් කරන වැඩ' ගැන.
සීයා - ඒක බොහොම හොඳයි.
සංඛ - සීයේ හොඳ ළමයෙක් කරන දේවල් ගැන මට කියලා දෙන්න පුළුවන් ද?
සීයා - එහෙනම් පුතා හොඳට අහගන්න.
හොඳ ළමයා නිතර ම තෙරුවන් ගුණ සිහි කරනවා.
පන්සලට ගියා ම හාමුදුරුවන්ට පසඟ පිහිටුවා වඳිනවා.
ඒ වාගේ ම හාමුදුරුවන්ට සැදැහැ සිතින් සලකන්නත් ඕනෑ.
හාමුදුරුවෝ දෙන අවවාද අනුශාසනා පිළිගන්නවා.
හාමුදුරුවෝ අසුන් ගන්නා ආසනවල ගිහි අය වාඩි වෙන්නේ නැහැ.
හොඳ ළමයා දෙමවුපියන්, ගුරුවරුන් කියන දේ අහලා හොඳට ඉගෙන ගන්නවා.
මවුපියන්ටත්, ගුරුවරුන්ටත්, වැඩිහිටියන්ටත් ගෞරවයෙන් සලකනවා.
යහළුවකුට කරදරයක් වුණා ම ඒ ගැන සොයා බලා උදවු කරනවා.
අසරණ කෙනෙක් දුටුවා ම උදවු කරනවා.
අපේ රටේ වෙනත් ආගම්වලටත් හොඳ ළමයා ගරු කරනවා.
වෙනත් ආගමක පූජකවරයකු දුටු විටත් ගරු කරනවා.
සංඛ - සීයා කියාපු දේවලින් මට දැන් හොඳ කතාවක් කරන්න පුළුවන්. සීයාට බොහෝ ම පින්.
සීයා - කතා කරලා විතරක් මදි. මේ කරුණු තේරුම් අරගෙන පුතාත් හොඳ දරුවෙක් වෙන්න.
සංඛ - හොඳයි සීයේ.