අපි ජේසුස් වහන්සේ වගේ ආදරය කරමු. අපි ඔවුන් වහන්සේ වගේ ආදරය දෙමු. ස්පර්ශ කරමු. දුප්පතුන්ගේත් දුප්පතුන් මධ්‍යයේ දවස ගෙවමින් 'සමිඳුන් මිහිපිටයි' යන සලකුණ සනිටුහන් කරමු. ජේසුගේ ආදරය හා අනුකම්පාව ඔවුන් අතර බෙදා දෙමු.

මා ඉපදුණේ 1910 අගෝස්තු 26 දා. මගේ දෙමවුපියෝ මට නම් තැබුවේ ඇග්නස් ගොන්ක්ස්හා යනුවෙනි. මම පවුලේ බාලයා. මම අනිත් අයට උදවු කරන්න හරි ම කැමතියි.

අවුරුදු 18 දී මම අම්මා ගෙනුත් මගේ හිතවත් අයගෙනුත් සමුගෙන ලොරෙටෝ නිකායේ කන්‍යාරාමයට ඇතුළු වී ධර්මදූත මෙහෙවරට සම්බන්ධ වුණා.

1937 මැයි 14 දින මම පැවිදි දිවියට ඇතුළු වුණා. තෙරේසා සොයුරිය නමින් කල්කටාවේ උසස් ප්‍රසිද්ධ පාසලක ඉගැන්නුවා. පසුව විදුහල්පතිනිය ලෙස  ද සේවය කළා.

1948 දී මම දයාවේ ධර්ම දූතිකාවන්ගේ නිකාය ඇරඹුවා. චාම් කපු සාරියකින් සැරසී දිළිඳු පැල්පත්වල ජීවත් වූ දුප්පත් අය වෙනුවෙන් දේව සේවය පටන් ගත්තා. දුප්පත් දරුවන්ට මම හරිම ආදරෙයි. ඒ අය මට අම්මා කියලයි කතා කළේ.

මම 1967 දෙසැම්බර් මස 8 වෙනිදා දයාවේ සේවාව සඳහා ශ්‍රී ලංකාවට පැමිණියා. අනාථ, අසරණ, දරුවන්, අවශ්‍යතාවයන් ඇති දරුවන්, වීදි දරුවන්ගේ අධ්‍යාපන කටයුතු සඳහා නිවාස ගණනාවක් ඇති කළා. ශාන්ති නිවස, ප්‍රේම් නිවස, දයාවේ නිවස, කරුණා නිවස එයින් සමහරක්. පවුලේ දිව්‍ය සත්ප්‍රසාද වන්දනාව, යැදුම, ජපමාලය කීම කිසිම දිනක මම අමතක කළේ නැහැ.

1997.09.05 වෙනි දින තෙරේසා මාතාව මෙලොවින් සමුගත්තා. 2003 ඔක්තෝම්බර් 19 දා කල්කටාවේ දී මෙතුමිය භාග්‍යවන්තිය ලෙස ප්‍රකාශයට පත් කෙරුණා. 2016 සැත්තැම්බර් 04 වන දින පළමුවන ෆ්‍රැන්සිස් ශුද්ධෝත්තම පියතුමන් විසින් එතුමිය සාන්තුවරයට ඔසවන ලදී.

"තෙරේසා මව්තුමිය වගේ අපිත් අසරණ අයට දයාව දක්වමු."