ශු. ලුක් 19 : 35 - 38

ගුරුතුමිය : අද අපට තියෙන්නේ, ජේසුස් වහන්සේ රාජ තේජසින් ජෙරුසලමට පිවිසි අන්දම රඟ දක්වන්න. දුවලා පුතාලාට ඒ සිද්ධිය මතක ද? ජේසුස් වහන්සේ කුරුසිපත් වීමට පෙර අවසාන සතියේ දී තමා මෙය සිදුවුණේ.

ළමයි : ඔව් ගුරුතුමී, අපට එහෙනම් කොටළුවෙකුත් ඕනෑ වේවි නේද?

ගුරුතුමිය : ඇත්ත ම කොටළුවෙක් ඕනෑ නෑ. අපේ පුතාලා දෙදෙනෙක් ඉදිරියට එන්න. දැන් ඔය දෙන්නට පුළුවන් කොටළුවකු හැටියට ඉන්න.
(දරුවෝ දෙදෙනා අත් අල්ලාගෙන කොටළුවකු සේ සැරසෙති)

නිසල් : ජේසුස් වහන්සේ වගේ කොටළුවා පිට වාඩිවෙලා යන්න මම කැමතියි.

ගුරුතුමිය : හොඳයි. එහෙනම් නිසල් ඉදිරියට එන්න. ළහිරුගේ කර පිට පරිස්සමෙන් වාඩිවෙන්න.

(සෙසු ළමයි සෙනඟ සේ සැරසී සිටිති. ඔවුහු තමන්ගේ උතුරු සළු බිම හෙලා ජේසුස් වහන්සේ එන මඟ අතුරවති.)

ළමයි : "සමිඳුන් නමින් වඩිනා රජුට ආසිරි වේවා!" "ස්වර්ගයෙහි සාමය ද අතිඋසස් තැන්හි මහිමය ද වේවා!"

ගුරුතුමිය : ජේසුස් වහන්සේ ජෙරුසලමට රජකු වගේ පිවිසි ගමන අදත් අපි "තල් අතු ඉරිදාට" සමරනවා. ඒත් අපට පෙනෙනවා, උන්වහන්සේ පැමිණියේ අශ්වයකුගේ පිට නොව කොටළුවකුගේ පිට උඩ බව. එයින් පෙන්වන්නේ උන්වහන්සේ ලෝකයට සාමය ගෙන ඒමට පැමිණි බව හා උන්වහන්සේගේ නිහතමානීකමයි.

අපි සාමයේ රජු වූ ජේසුස් වහන්සේ,
ආදර්ශයට ගනිමු!
අනුගමනය කරමු!

කටපාඩම් පදය
"සමිඳුන් නමින් වඩිනා රජුට ආසිරි වේවා!
ස්වර්ගයෙහි සාමය ද අතිඋසස් තැන්හි මහිමය ද වේවා!"
යි කීහ.
(ශු. ලුක් 19:38)