තිසර හා මාධව ඉගෙන ගන්නේ තුන් වන ශ්‍රේණියේ. දෙදෙනා ම පාසල නිම වී ගෙදර පැමිණ පාසල් වැඩ අවසන් කරනවා. තිසර හවසට මාධවගේ ගෙදරට සෙල්ලම් කරන්න යනවා.

මාධව ඔයා දන්නවා ද හෙට මගේ උපන් දිනය. අපි ළමා නිවාසයකට දානයක් දෙනවා.

ඇයි තිසර, ළමා නිවාසයක උපන් දින උත්සවය පවත්වන්නේ ? මාධව ඇසුවා.

අපේ අම්මයි තාත්තයි කියන්නේ, උපන් දිනේ දවසට පන්සලට ගිහිල්ලා, තෙරුවන් වන්දනා කරලා, ආශීර්වාද ලබා ගැනීම හොඳ දෙයක් කියලා. දහම් පාසලේ පොඩි හාමුදුරුවොත් උපන් දිනයට පින්කමක් කිරීම හොඳ දෙයක් බව අපට කියලා දුන්නා.

ඔයා දන්නවා ද? මගේ පළමුවෙනි උපන් දිනය දවසේ අපේ පන්සලේ ලොකු හාමුදුරුවන්ට කියලා සෙත් පිරිත් සජ්ඣායනාවක් කළා කියලා අම්මා කියලා තියෙනවා.

දෙවෙනි උපන් දිනයට කැලණි විහාරේ වඳින්න ගියාලූ. එදා අපේ අම්මා බත් මුල් හදාගෙන ගිහිල්ලා විහාරෙ අවට ඉන්න නැතිබැරි අයට බෙදුවාලූ. ඒ අය බත් මුල් අරගෙන මට පින් දුන්නලූ. නැති බැරි අයට ආහාර දීම හොඳ පින්කමක්නේ.

මගේ තුන්වෙනි උපන් දිනයට අපේ ගෙදර දානමය පින්කමක් පවත්වලා තිබුණා. මගේ ඇල්බමයේ ඡායාරූප පෙන්වලා අත්තම්මා මට ඒ ගැන විස්තර කියලා දුන්නා.

මගේ හතරවෙනි උපන් දිනය සැමරුවේ රෝහලකලූ.

ඒ ගැන නම් මට මතකයි. එදා රෝහලක ළමා වාට්ටුවක යහළුවන්ට රස කැවිලි, සෙල්ලම් බඩු තෑගි කළා.

ඒ අය සෙල්ලම් බඩු හරි ම ආසාවෙන් ගත්තා. ඒ ළමයින්ගේ අම්මලා මගේ ඔළුව අතගාලා “නීරෝගී සුවය ලැබේවා”යි කිවුවා මට මතකයි.

ඉතිං, ඔයාගේ පස්වෙනි උපන් දිනය සැමරුවේ කොහොම ද තිසර?

පස්වෙනි උපන් දිනය සැමරුවේ වැඩිහිටි නිවාසෙක. එදා ඒ නිවාසයේ ඉන්න අත්තම්මලා, සීයලා හරියට සතුටු වුණා. ඒ අයගේ දරු මුණුබුරන් මතක් වෙලා වෙන්න ඇති සමහර අත්තම්මලා ඇඬුවා.

මගේ හයවෙනි උපන් දිනය වන විට මං පාසල් යනවානේ. මගේ පංතියේ හිටියා තාත්තා නැති යාළුවෙක්. එයාගේ අම්මා හරි ම අමාරුවෙන් එයාට ඉගෙන ගන්න වියදම් කළේ.

ඒ යාළුවාට පාසල් ගෙනයන්න පොත්, පැන්සල්, බෑග්, සපත්තු, ඇඳුම් ආදි ගොඩාක් තෑගි දුන්නා. එයාගේ අම්මා අපට පින් දුන්නා. යාළුවාට ගොඩාක් සතුටුයි. මමත් හරියට සතුටු වුණා.

ගිය අවුරුද්දේ මගේ උපන් දිනයත්, පන්සලේ කඨින පින්කම් මාලාවේ මල් පූජා පින්කමත් එක ම දවසේ යෙදිලා තිබුණා. අපේ අම්මා මට ආශීර්වාද කරන්න, ඒ පින්කම භාර අරගෙන තිබුණා.

එදා පින්කම අවසානයේ ලොකු හාමුදුරුවෝ උපන් දිනය දා පින්කම් පවත්වන එක ගැන හොඳ අනුශාසනාවක් කළා. මට ආශීර්වාද කරලා පිරිත් නූලකුත් ගැට ගැසුවා.

ඉතිං තිසර ඔයා හැම අවුරුද්දේ ම උපන් දිනේට පින්කම්නෙ කරලා තියෙන්නේ. මගේ උපන් දිනවලට නම් හැම අවුරුද්දේ ම උත්සව ගත්තා.

ලොකු උත්සව පවත්වලා මුදල් නාස්ති කරන්න හොඳ නෑ. ඒ මුදලින් උපන්දිනේට පින්කමක් කරලා ඊට වඩා සතුටු වෙන්න පුළුවන්.

හොඳයි තිසර, මමත් මගේ ඊළඟ උපන් දිනයට පින්කමක් කරමු කියලා අම්මටයි තාත්තටයි කියනවා.