28 - දළදා මාලිගාව
ශ්‍රී දළදා වහන්සේ මහනුවර දළදා මාලිගාවේ වැඩ සිටිනවා. බෞද්ධයන් වන අප සතුව තිබෙන උතුම් වස්තුවකි, දළදා වහන්සේ.
ඉන්දියාවේ හේමමාලා කුමරිය සහ දන්ත කුමාරයා දළදා වහන්සේ ලංකාවට වැඩමවා ගෙන ආවා. එකල ලංකාවේ රජකම් කළේ කිත්සිරිමෙවන් රජ.
ලංකාවේ රාජධානි කාලයෙන් කාලයට වෙනස් වුණා. මේ නිසා, පසු කාලයේ පොළොන්නරුව, කොත්මලේ, බෙලිගල, දඹදෙණිය, යාපහුව, කෝට්ටේ, දෙල්ගමුව යන නගරවල ඉදිකළ දළදා මාලිගාවලත් දළදා වහන්සේ වැඩ සිටියා.
පළමු වන විමලධර්මසූරිය රජතුමා දළදා වහන්සේ මහනුවරට වැඩම කළා. දෙවන විමලධර්මසූරිය රජතුමා මහල් තුනකින් යුක්ත ව දළදා මාලිගාව සෑදුවා.
කීර්ති ශ්‍රී රාජසිංහ රජතුමා ඇතුළත මාලිගාව සෑදුවා. දළදා පෙරහැර පැවැත්වීම මෙම රජතුමාගේ කාලයේ දී ආරම්භ වුණා. දළදා පෙරහැර ඇසළ මාසයේ මහනුවර දී පැවැත්වෙනවා.
ලංකාවේ අවසාන රාජධානිය පිහිටියේ කන්ද උඩරට මහනුවරයි. මේ නිසා දළදා වහන්සේ දැනටත් වැඩ සිටින්නේ මහනුවර ඉදිකර ඇති දළදා මාලිගාවේයි.
බෞද්ධයෝ දළදා වහන්සේට දක්වන්නේ ජීවමාන බුදුරජාණන් වහන්සේට දක්වන ගෞරවයයි. ශ්‍රී දළදා වහන්සේ රැක ගැනීම බෞද්ධ අපගේ උතුම් වගකීමක්.