20 - රකිමු පර පණ
බුදු බණ අසමින් සිත සත පායේ
කුරු පණ කම් ඇර පිය ඒ පායේ
පර පණ නැසුවොත් කවර උපායේ
අපමණ දුක් දෙයි සතර අපායේ
(ලෝවැඩ සඟරාව - වීදාගම මෛත්‍රේය නාහිමි)
කවියේ තේරුම :
බුදු බණ අසමින් සිත සතුටු කර ගන්න. දුරු කළ යුතු පහත් වැඩ අත් හරින්න. කුමන ආකාරයකින් හෝ අනුන්ගේ ජීවිතය විනාශ කළ හොත් සතර අපායේ ඉපදී බොහෝ දුක් විඳින්න සිදු වෙනවා.
- පුරාණ කාලයේ සිට ම කවියෙන් බුදු බණ දේශනා කිරීමේ සිරිත පැවතුණා.
- කවියෙන් ලියපු බුදු බණ ඇතුළත් පොතක් තමයි ලෝවැඩ සඟරාව.
- කෝට්ටේ යුගයේ වැඩ සිටි වීදාගම මෛත්‍රේය නාහිමියෝ ලෝවැඩ සඟරාව ලිවුවා.
- සතුන් මැරීම, අනුන්ගේ ජීවිත විනාශ කිරීම විශාල පාපයක් බව එහි සඳහන් වෙනවා.
- අපගේ ජීවිත යහපත් කර ගැනීමට උදවු වන උපදෙස් රැසක් ලෝවැඩ සඟරාවේ ඇතුළත් වෙනවා.
- ලෝවැඩ සඟරාව නිතර කියවා එහි ඇතුළත් බුදු බණ අපි තේරුම් ගනිමු. ඒ අනුව අපගේ ජීවිත හැඩගස්වා ගැනීමට ඉගෙන ගනිමු.