“ලොකු දුවේ, හෙට 15 දා පන්සලට සලාක දානය පූජා කරන්න තියෙනවා.” අත්තම්මා කීවා ය. “ඔව්, අම්මේ මම දානයට අවශ්‍ය දේවල් සූදානම් කරලයි තියෙන්නේ.” අම්මා කීවා ය.

ඇයි අත්තම්මේ සලාක දානය කියන්නේ?

අම්මාගේත් අත්තම්මාගේත් කතාව අසාගෙන සිටි චානක ඇසුවේය. පුතේ, සලාක දානය කියන්නේ පන්සලට මාස්පතා දෙන දානයට. ගමේ පන්සලට දානය දෙන්නේ ගමේ උදවිය. පන්සලේ දායක සභාව නායක හාමුදුරුවන් වහන්සේ සමග කතා බහ කරලා දානය සඳහා දින වෙන් කරවා ගන්නවා. තමන්ට කැමැති, පහසු දිනයක් දානය සඳහා වෙන්කර ගන්න පුළුවන්

පවුලේ කෙනෙක් මිය ගිය දිනයක්, උපන් දිනයක් වැනි විශේෂ දවසක් මේ සඳහා තෝරා ගන්න පුළුවන්.

පහළොස්වෙනිදා පුතාගේ සීයා මිය ගිය දිනය. ඉතින් හැම මාසෙ ම පහළොස්වෙනිදා අපි සලාක දානය දීලා සීයාට පින් අනුමෝදන් කරනවා. සමහර පළාත්වල මේ දානයට මුර දානය, පේරු දානය කියලත් කියනවා.

“අපි දානෙ දෙන්නේ උදේට ද දවල්ට ද අත්තම්මේ? ”

අපේ දානේ දෙන්නේ උදේට. ඒ කියන්නේ හීල් දානය පුතේ. ඒ හින්දා අපි අද හවසට පන්සලට දැහැත් ගිලන්පස අරගෙන යන්න ඕනේ.

“මොනව ද අත්තම්මේ දැහැත් ගිලන්පස කියන්නේ?”

හාමුදුරුවන් වහන්සේලාට ගිලන්පසට අවශ්‍ය දේවල්. සීනි, තේ කොළ, ඔසු පැන් වගේ දේවල් ගිලන්පසට පූජා කරනවා. දැහැත් කියන්නේ බුලත්, පුවක් ආදියයි.

එතකොට අත්තම්මේ මේ හඳුන්කූරු, පහන්තිර එහෙම ගෙනියන්නේ ඇයි?

පුතේ, අපි වගේ ම හාමුදුරුවන් වහන්සේලාත් උදේ සවස බුදුන් වඳිනවා. හාමුදුරුවන්ටත් පූජා කරන්න තෙල්, මල්, පහන්තිර, හඳුන්කූරු ඕනැනේ.

අපි දැහැත් ගිලන් පස පූජා කරලා දානය ගෙනයන භාජන අරගෙන එන්න ඕනේ. ඒ ගමන් ම ලොකු හාමුදුරුවෝ මුණගැහිලා හෙට හීල් දානයට කී නමක් පන්සලේ වැඩ ඉන්නවා ද කියලත් දැනගන්න ඕනේ.

දානය ගෙන යන භාජන හොඳින් සෝදා පිරිසිදු කරලා පිස දාලා තියන්න අමතක කරන්න හොඳ නැහැ.

හෙට උදේ ම දානය සූදානම් කරගෙන පිරිසිදු සුදු ඇඳුමින් සැරසිලා මල්, තෙල්, හඳුන්කූරුත් රැගෙන පන්සලට යන්න ඕනේ.

දානශාලාවේ දානය තබා ස්වාමීන් වහන්සේගේ උපදෙස් මත නියමිත භාජනවල බුද්ධ පූජාව පිළියෙල කරන්න ඕනේ. ඊට පසුව පහන්, හඳුන්කූරු දල්වා මල් පූජා කර බුද්ධ පූජාව තැන්පත් කරනවා. ස්වාමීන් වහන්සේ වැඩම කර ගාථා කියමින් බුද්ධ පූජාව කර පින් අනුමෝදන් කරනවා.