මැස්සෙකුයි, ගෙම්බෙකුයි, ඉත්තෑවෙකුයි, කුකුළෙකුයි ගස් කොටයක් උඩ ගෙයක් හදාගෙන උන්නා.

මැස්සගෙ නම රුංරුං පැංචා. ගෙම්බගෙ නම බක බක අප්පුහාමි. ඉත්තෑවගෙ නම ඉඳිකටු මුදියන්සෙ. කුකුළාගෙ නම හඬලන රාල.

දවසක් දා මේ හතර දෙනා කැලෑවක් මැදින් ගමනක් ගියා. හතු, මල්, ගෙඩි ජාති, දර එකතු කරන්න. රුංරුං පැංචා යාළුවො තුන් දෙනාගෙ ඔළු උඩින් පියාසර කෙරුවා.

ඉතිං ඔහොම ගිහින්, ගිහින් මේ හතර දෙනා ම ගස් කොළං නැති පාළු පිට්ටනියකට ආවා. එතන පුංචි කරත්තයක් තිබෙනවා දැක්කා. කරත්තෙට සවි කරල තිබුණෙ එකට එක නොගැළපෙන රෝද. පළමුවෙනි රෝදෙ බොහොම කුඩා එකක්. දෙවෙනි රෝදෙ තරමක් ලොකුයි. තුන්වෙනි රෝදෙ ඊට ලොකුයි. හතරවෙනි රෝදෙ මහ විශාලයි.

යාළුවො පුදුම වෙලා කරත්තෙ දිහා බලාගෙන ඉන්නකොට, ළඟ තිබුණ පඳුරකින් හාවෙක් එළියට පැන්නා. එයත් කරත්තෙ දිහා බලලා හිනා වෙනවා. හාවාගෙ නම පිනුම් හාමි.

"මේ කරත්තෙ ඔයාගෙ ද?" කියලා යාළුවො හතර දෙනා පිනුම් හාමිගෙන් ඇහුවා.

"නෑ. ඒක වලස් හාමිගෙ කරත්තෙ. වලස් හාමි ඔය කරත්තෙ හදන්න බොහොම මහන්සි ගත්තා. නමුත් එයාට ඒක හදල ඉවර කරන්ට බැරි වුණා" කියලා පිනුම් හාමි කිවුවා.

"මේ කරත්තෙන් වැඩක් ගන්ට පුළුවන්. ඒ හින්ද අපි මේක ගෙදර ගෙනියමු" කියලා ඉඳිකටු මුදියන්සෙ කිවුවා.

"හොඳයි, හොඳයි" කියලා ඒ අදහසට අනිත් යාළුවො තුන් දෙනා ම කැමති වුණා.

ඒ හතර දෙනා ම එකතු වෙලා කරත්තෙ තල්ලූ කරන්න පටන් ගත්තා. රෝද එකට එක ගැළපෙන්නෙ නැති හින්ද කරත්තෙ පොඩ්ඩක්වත් හෙල්ලූණේ නෑ. තල්ලූ කළාට මොකද පාර පුරා ගස් මුල්වල හැපිලා කරත්තෙ ඒ අත මේ අත පෙරළුණා මිසක් ඉදිරියට ගියේ නෑ.

අහකට වෙලා බලාගෙන හිටිය පිනුම් හාමි හති වැටෙන තුරු හිනා වුණා. කරත්තෙ තල්ලූ කරපු යාළුවො හතර දෙනාට හොඳට ම මහන්සියි.

"අපි එක එක්කෙනා එක එක රෝදය ගෙදර ගෙනියමු" කියලා ඉඳිකටු මුදියන්සෙ කිවුවා.

හතර දෙනා ම ඒකට කැමති වෙලා එක එක රෝදය ගත්තා. රුංරුං පැංචා ඉතා ම කුඩා රෝදය පෙරළන්ට පටන් ගත්තා. ඉඳිකටු මුදියන්සෙ ඊළඟ රෝදය පෙරළන්න පටන් ගත්තා. බක බක අප්පුහාමි තරමක් ලොකු රෝදය පෙරළන්න පටන් ගත්තා. හඬලන රාල විශාල රෝදය පෙරළා ගෙන ගෙදර ගියා.

"මේ ගොල්ලො හරි පුදුම මිනිස්සු. එකට එක ගැළපෙන්නෙ නැති රෝද ගෙදර ගෙනියනවා" කියලා පිනුම් හාමි කිවුවා. ඊට පස්සෙ පිනුම් හාමි පඳුරු අස්සට පැනලා යන්න ගියා.

රුංරුං පැංචයි, ඉඳිකටු මුදියන්සෙයි, බක බක අප්පුහාමියි, හඬලන රාලයි රෝද හතර ගෙදර ගෙනාවා. රෝදවලින් වැඩක් ගන්නේ කොහොමදැයි කියලා හතර දෙනා ම කල්පනා කරන්න පටන් ගත්තා.

"මම දන්නවා වැඩක් ගන්න හැටි" කියලා රුංරුං පැංචා කිවුවා. එයා ඉතා ම කුඩා රෝදයෙන් නූල් කටින යන්තරයක් හදා ගත්තා.

ඉඳිකටු මුදියන්සෙ එයා ගෙනා රෝදයට ලී පටි දෙකක් සවි කරගෙන තනි රෝදෙ අත් කරත්තයක් හදා ගත්තා.

"මටත් පුළුවනි මගේ රෝදයෙන් වැඩක් ගන්න" කියලා බක බක අප්පුහාමි කිවුවා. රෝදය ළිඳට උඩින් සවි කරලා බක බක අප්පුහාමි ලෙහෙසියෙන් වතුර අදින්න පටන් ගත්තා.

වේගයෙන් ගලා යන දිය පාරකට අහුවෙලා කැරකැවෙන්න රෝදය සවි කර ගත්තු හඬලන රාලට පුළුවන් වුණා ජල බලයෙන් වැඩ කරන මෝලක් හදා ගන්ට.

මේ විදියට සියලූ ම රෝදවලින් වැඩ ගන්න පුළුවන් වුණා.

රුංරුං පැංචා නූල් කටින යන්තරයෙන් නූල් ඇඹරුවා. බක බක අප්පුහාමි ළිඳෙන් වතුර ගෙනැවිත් වත්තේ එළවළු කොටුවට දැම්මා. ඉඳිකටු මුදියන්සෙ කැලේට ගිහිල්ලා පලතුරු සහ දර කඩා ගෙන ඒවා තනි රෝදෙ අත් කරත්තෙ පටවා ගෙන ආවා. හඬලන රාල එයාගෙ මෝලෙ පිටි අඹරන්ට පටන් ගත්තා.

යාළුවො හතර දෙනාගෙ සැපදුක් දැනගන්න දවසක් පිනුම් හාමි ඒ ගොල්ලන්ගෙ ගෙදරට ආවා.

යාළුවො හතර දෙනා පිනුම් හාමි දැකලා බොහොම සන්තෝස වුණා. රුංරුං පැංචා පිනුම් හාමිට අත් මේස් කුට්ටමක් ගොතලා දුන්නා. බක බක අප්පුහාමි ලොකු කැරට් අලයක් දුන්නා. ඉඳිකටු මුදියන්සෙ ඇපල් ගෙඩියක් දුන්නා. හඬලන රාල රස කැවිලියි පාන් ගෙඩියකුයි දුන්නා. එදා රෝද ගෙනියන කොට හිනාවෙච්ච නිසා පිනුම් හාමිට ලැජ්ජා හිතුණා.

"මට සමා වෙන්න. රෝද එකට එක ගැළපෙන ඒවා නොවුණත්, ඒවා පාවිච්චි කරන හැටි දන්න අය ඉන්නවා නම් වැඩ ගන්න පුළුවන් විත්තිය දැන් මට පේනවා" කියලා පිනුම් හාමි කිවුවා.