එදා ඉරිදා දවසක්. අපේ මීසම් පවුලේ "සුහද හමුව" පැවැත්වුණේ මීසමේ සියලූ දෙනාගේ ම එකමුතුකමින් හා සහයෝගයෙන්. එදින සියලූ වැඩ කටයුතු ආරම්භ වූයේ උතුම් වූ දිව්‍ය පූජා යාගය සිදු කිරීමෙන්. දිව්‍ය පූජාව ආරම්භ වීමට ප්‍රථම අප සියලූ දෙනා දේවස්ථානයට ඇතුළු වුණේ පෙරහැරින්. මුලින් ම ඇතුළු වූයේ ධර්මදූත ළමා සමාජයේ ළමයිනුයි. ඉන් පසුව පිළිවෙළින් මරිය හමුදාව, තරුණ සමිතිය, ශ්‍රී හෘදය සමිතිය, දේවමාතා නිර්මල හෘදය සමිතිය, දහම් ගුරුවර ගුරුවරියන්, පූජා උදවු සමිතියේ සොයුරන් සමග පියතුමා දේවස්ථානයට ඇතුළු විය.

දිව්‍ය පූජාව ආරම්භ කරමින් පියතුමා කියා සිටියේ මීසම ප්‍රේමයේ සමාජයක් බවයි. මීසම් පවුලක් ලෙස, අප සියලූ දෙනා ම එකමුතු කරන ප්‍රේමයේ භෝජනය දිව්‍ය සත්ප්‍රසාද වහන්සේ බවත් පියතුමා පැහැදිලි කර දුන්නා. ඒ වගේ ම මීසම් පවුලක් ලෙස සැම දා ම විශේෂ ගෞරවයකින්, භක්තියකින් සමරන උතුම් භෝජනයත් දිව්‍ය සත්ප්‍රසාද වහන්සේ බව කියා දුන්නා. එදින දිව්‍ය පූජාවේ දී වෙනදාට වඩා ආදරයකින් මමත් ජේසු සමිඳු ලබා ගත්තා.

දිව්‍ය පූජා යාගය අවසන් වූ පසු අප සියලූ දෙනා දේවස්ථාන භූමියේ සූදානම් කර තිබූ සංග්‍රහය සඳහා අසුන් ගත්තා. සැම පවුලකින් ම රැගෙනවිත් තිබූ ආහාර එකතුකර සැම දෙනා අතර බෙදා ගත්තා. මේ සංග්‍රහය භුක්ති විඳින අතරේ අපේ මීසමේ පියතුමා විවිධ සමිතිවලින් සූදානම් කර තිබූ තෑගි  දිළිඳු පවුල් කිහිපයක් අතර බෙදා දුන්නා. අපේ පවුලේ සැම දෙනාත් එම තෑගි දීම සඳහා සහභාගි වුණා.

යාච්ඤාව
ආදර ජේසු සමිඳුනි, දිව්‍ය සත්ප්‍රසාද වහන්සේ තුළ ඔබ
වහන්සේ ජීවමාන බව අත්දකින්නට අද සිට ම මඟ පෙන්නුව
මැනව.
ආමෙන්.