ශු. මාක් 4 : 35 - 41 

දෙවියන් වහන්සේ අපට ලබා දුන් ලෝකයේ අවට පරිසරය තුළ කෙතරම් සුන්දර දසුන් දක්නට ලැබේ ද? මේ අතරින් මුහුදු වෙරළ ඉතා චමත්කාර දසුනකි. එසේ ම ජේසුස් වහන්සේගේ සේවයේ දී සුවිශේෂී  ස්ථානයක් ලෙස ගලීල මුහුද අපට පෙන්වා දිය හැකි ය.

ජේසුස් වහන්සේගේ ජනතාවට දේශනා කිරීම සඳහා මුහුදු වෙරළ යොදා ගත් සේක. උන්වහන්සේගේ ගෝලයන්  මුහුණ දුන් අපුරු අත්දැකීමක් ශුද්ධ වු මාක් ශුභාරංචියේ 4 : 35 - 41 සඳහන්ව තිබේ.

එක්තරා දිනක ජේසුස් වහන්සේගේ ඔරුවක නැඟී මුහුදු වෙරළේ දී දේශනා කළ සේක. සවස් වු බැවින් එතුමා තම දේශනාව නිම කොට එම ඔරුවේ ම සිට තම ශ්‍රාවකයන්ට මෙසේ පැවසූ සේක.

ජේසුස් වහන්සේ : සමූහයා පිටත්කර යවා අපි මුහුදින් එගොඩට යමු.

පළමුවන ශ්‍රාවකයා : එහෙමයි ස්වාමීනි, අපි මේ ඔරුවෙන් ම එගොඩට යමු.

(සමුහයා පිටත්කර යැවු ශ්‍රාවකයෝ ඔරුවේ අවරයෙහි මෙත්තය මත නිඳා සිටි ජේසුස් වහන්සේ සමග ඔරුව මුහුදට දියත් කළෝ ය.)

දෙවන ශ්‍රාවකයා : අර බලන්න, අහස! විශාල කුණාටුවක් නේද එන්නේ?

තෙවන ශ්‍රාවකයා : ඔව්, ඔව්. ඔරුව පිරී යන තරමට රළ පහර සැරයි නේද?

පළමුවන ශ්‍රාවකයා : බලාගෙන ඉන්න බැහැ. අපි ස්වාමින් වහන්සේ අවදි කරමු.

(බියට පත් ශ්‍රාවකයෝ නිඳා සිටි ජේසුස් වහන්සේ අවදි කරමින් මෙසේ පැවසූහ.)

ශ්‍රාවකයෝ : ගුරු දේවයනි, අප විනාශ වන්නට ළඟයි. අපට උදවු කරන්න.

(නින්දෙන් අවදි වු ජේසුස් වහන්සේ සුළඟට හා මුහුදට තර්ජනය කර මෙසේ අණ කළ සේක.)

ජේසුස් වහන්සේ : "නිශ්ශබ්ද වෙව! නිශ්චල වෙව!"

(එවිට කුණාටුව නිශ්චල විය. කුණාටුව නිශ්චල කළ ජේසුස් වහන්සේ තම ශ්‍රාවකයන්ට මෙසේ පැවසූ සේක.)

ජේසුස් වහන්සේ : ඔබ ඔය තරම් බිය වන්නේ මන්ද? තව ම ඔබට ඇදහිල්ල නැද්ද?

භීතියට පත් ශ්‍රාවකයෝ : මේ කවරෙක් ද? මේ, සුළඟ හා මුහුද පවා උන්වහන්සේට කීකරු වන්නේ ය. හරි පුදුමයි නේද?

එදා ගෝලයන් සමග ජේසුස් වහන්සේගේ සිටිය ද ඔවුන තුළ ඇදහිල්ගක් නොතිබු නිසා ඔවුහු බියට පත් වුහ. එහෙත් ජේසුස් වහන්සේ මුහුද නිශ්චල කිරීමෙන් පසු ඔවුන්ගේ බිය දුරු විය.

අපගේ ජීවිත ගමනේ දී ද විවිධ ගැටලූවලට මුහුණ දීමට අපට සිදු වේ. එවැනි අවස්ථාවල දී දෙවියන් වහන්සේ අප සමග සැම විට ම සිටින බවට අප තුළ විශ්වාසයක් තිබිය යුතු ය.

දෙවිඳුන් කෙරෙහි විශ්වාසය තබමු
ජීවිතයට පැමිණෙන අභියෝග ජය ගනිමු