1 - දේව මැවිල්ල සුරැකීම හා සංරක්ෂණය
උත්පත්ති 1 : 26, 29 - 30, 2 : 19 - 20
දෙවි පියාණන් විසින් අපට දායාද කරන ලද මනහර දේව මැවිල්ල පිළිබඳව බොහෝ වැදගත් කරුණු ඔබ පෙර ශ්‍රේණි දී ඉගෙන ගත්තෙහි ය.
දෙවි පියාණන් වහන්සේ අහසත් පොළොවත් එහි පවතින සියල්ලත් මැවු බව අපි දනිමු. දෙවියන් වහන්සේ මෙම පරිසරය සහ එහි සිටින සතුන් පාලනය කිරීමේ වගකීම තමන් වහනසේගේ ස්වරූපය අනුව මවන ලද මනුෂ්‍යයාට පවරා දුන් සේක. ඒ පිළිබඳව ශුද්ධ බයිබලයේ මෙසේ සඳහන් වේ.
ඉන් පසු දෙවියන් වහන්සේ; "අපගේ ස්වරූපයට අනුව, අපගේ
සමානත්වය ලෙස මනුෂ්‍යයා මවමු. ඔහු මුහුදේ මසුන් ද
ආකාශයේ පක්ෂීන් ද, ගවමහීෂයන් ද මුළු පොළෝ තලයෙහි
සියලූ වන මෘගයන් ද උරගයන් ද පාලනය කෙරේවා!" යි
අණ කළ සේක.
(උත්පත්ති 1:26)
දෙවි පියාණන් වහන්සේ, මනුෂ්‍යයාට ඇති ඉමහත් ප්‍රේමය නිසා දේව මැවිල්ල ආරක්ෂා කිරීමත්, රැක බලා ගැනීමත් යන සුවිශේෂ වගකීම් හා භාරකාරත්වය මනුෂ්‍යයාට පවරා දුන් සේක. අප අවට පරිසරයේ සහ එහි සිටින සත්ත්වයින්ගේ නිර්මාතෘවරයා දෙවි පියාණන් වහන්සේ ය. එහෙත් එකී සැම සත්ත්වයෙකුට ම නම් තැබීමේ කාර්යය
උන්වහන්සේ පළමු මනුෂ්‍යයාට පැවරූ සේක.
සැම ජීවියකුට ම ජීවය රැක ගැනීම සඳහා ආහාර අත්‍යවශ්‍ය දෙයකි. ලෝකය ආරම්භයේ දී දෙවියන් වහන්සේ අපට ආහාර පිණිස නියම කළ දේවල් ශුද්ධ බයිබලයේ මෙසේ සඳහන් වේ.
තව ද, උන්වහන්සේ, "මුළු පොළෝ තලයෙහි ධාන්‍ය දරන
සියලූ පැළෑටි ද, බීජ සහිත ඵල දරන සියලූ ගස් ද නුඹලාගේ
ආහාරය පිණිස වේවා! එහෙත්, පොළොවේ සියලූ වන
සතුන්ට ද අහසේ පක්ෂීන්ට ද උරගයන්ට ද සියලූ ජීවමාන
සතුන්ට ද ආහාර පිණිස නිල් පලා දෙමි"යි වදාළ සේක.
(උත්පත්ති 1:29:30)
මෙලෙස මනුෂ්‍යයාටත්, සතුන්ටත් ආහාර පණිස උන්වහන්සේ ශාක වර්ග හා ධාන්‍ය වර්ග ලබා දුන් සේක.
දෙවියන් වහන්සේ විසින් මවන ලද පරිසරය සහ සත්ත්ව ලෝකය මගින් ජීවයේ පැවැත්ම සඳහා ප්‍රයෝජන රැසක් අපට ලැබේ. එහෙත් වර්තමානයේ දී මිනිසාගේ අයහපත් ක්‍රියා කලාපය නිසා අප අවට පරිසරය හා සත්ත්ව ලෝකය විනාශයට පත්වමින් පවතියි. එය ආරක්ෂා කිරීමට අපට කළ හැකි දෑ බොහෝ ය. ඒවායින් කිහිපයක් ලෙස;
කුණු කසළ පරිසරයට බැහැර නොකරමින් පරිසරය පිරිසිදුව තබා ගැනීම
ගස් වැල් කපා දමා විනාශ නොකර, වැඩි වර්ධනය කිරීම
ගංගා ඇළ දොළ අපවිත්‍ර නොකිරීම
සතුන්ට හිංසා නොකිරීම
යනාදිය දැක්විය හැකි ය. පුංචි අප ද අපට හැකි සැම අවස්ථාවක ම මැවිල්ල සුරැකීමට දායක විය යුතු ය.
දෙවි පියාණන් වහන්සේ ප්‍රේමයෙන් අපට ලබා දුන් අසිරිමත් දේව
මැවිල්ල ආරක්ෂා කරමු; වර්ධනය කරමු!