විවිධ ක්ෂේත්‍රවලට අදාළව බොහෝ තොරතුරු සම්පාදනය කරන ගුවන්විදුලිය, ‘හඬ’ මූලික කර ගත් ප්‍රබල විද්‍යුත් සන්නිවේදන මාධ්‍යයක් වේ. ගුවන්විදුලි වැඩසටහන්වලට සාවධානව සවන් දීමෙන් අපට දැනුමත් විනෝදයත් දෙක ම ලැබේ. 1995 ඔක්තෝම්බර් 24 වන දින ශ්‍රී ලංකාවට අර්ධ සූර්යග්‍රහණයක් දර්ශනය වූ අවස්ථාවේ ශ්‍රී ලංකා ගුවන්විදුලි සංස්ථාවේ සිංහල ස්වදේශීය සේවයේ ප්‍රචාරය වූ සජීවී වැඩසටහනක් ඇසුරෙන් මේ පාඩම සකස් වී තිබේ.

ග්‍රහලෝකාගාර පරිශ්‍රයේ සිට එළිමහන් පටිගත කිරීමක්.

නිවේදක (චන්දන තිලකරත්න) - මේ මොහොතේ අප සූදානමින් ඉන්නේ අද දවසේ විශේෂතම සිදුවීම වන සූර්යග්‍රහණය ගැන තොරතුරු දැනගන්න. අප සමග සිටිනවා ආචාර්ය චන්දන ජයරත්න මහතා. සූර්යග්‍රහණයක්, අර්ධ සූර්යග්‍රහණයක් පවතින කාල වකවානුවල බොහෝ දෙනා විවිධ මත පළ කරනවා; මිථ්‍යා විශ්වාස පවා පැතිරෙනවා. මේ ගැන ඔබතුමාට යමක් කියන්න තියෙනවා ද?

ආචාර්ය චන්දන ජයරත්න (ආරාධිත) - ඔව්, සූර්යග්‍රහණයක් එක්ක මිථ්‍යා විශ්වාස රාශියක් පැතිරිලා. සමහරු එදාට වැඩට යන්නෙ නැතිව, ළමයි ඉස්කෝලෙ යවන්නෙ නැතිව, ඉන්නව ලූ බයේ. ඒක බොරු වැඩක්. මේ අවස්ථාව එසේ බිය විය යුතු අවස්ථාවක් නොවේ.
ඒත් කුඩා ම දරුවන් අවුරුදු 5-6 අතර ළමයින් මේ දිහා බලන්න එපා. පාසල් යන වයසෙ අවුරුදු 10න් ඉහළ දරුවන්ට නම් මෙය ඉතා ම වැදගත්. ඒ මන්ද, මේ අවස්ථාව විද්‍යාත්මක වශයෙන් ඉතා ම වැදගත් වන නිසා. දරුවන්ට මෙය බලන ආකාරය කියා දී පෙන්විය යුතු යි. කුඩා ම දරුවන්ට එය තේරුම් ගන්න අමාරු යි. දැන් අද අපි මෙතැන මේ කොළඹ ග්‍රහලෝකාගාර පරිශ්‍රයේ නැරඹුම් කඳවුරක කුඩා නැරඹුම් කුටියක් හදලා කරන්නෙ ඒක. නිවැරදි පිළිවෙළට සූර්යයාගේ ප්‍රතිබිම්බය මේ ප්‍රක්ෂේපණ තිරය මතට පතිත කරලා සූර්යග්‍රහණය බලන්න දූරේක්ෂයක් සවි කරලා තියෙනවා. නිවැරදි ක්‍රමය අනුගමනය කරනවා නම් සූර්යග්‍රහණයෙන් වෙන හානියක් නැහැ.
මට අහන්න ලැබුණා මේ වෙලාවට සුදු ලූනු පැණියක් බීමෙන් දීර්ඝායුෂ ලැබෙනවා කියලා පත්තරේ තිබුණා කියලා. සුදු ලූනු බොන එක කොහොමත් හොඳයි. හෘදයාබාධ දුරු කරන ගුණයක් සුදු ලූනුවල තියෙනවා. ඔය අතර ජ්‍යෝතිෂඥයොත් විවිධ මත ගේනවා. ඉන්දියාවෙ ළමයි ලැබෙන්න ඉන්න මවුවරු හැංගෙනවා කියනවා. ලංකාවෙත් දැන් මේ තත්ත්වය පැතිරිලා. දීපාවලියෙන් පසුව එන සූර්යග්‍රහණය අසුබයි කියලා ඉන්දියාවේ ගැහැනු හැංගෙනවලූ.

නිවේදක - දැන් ඉරේ තත්ත්වය කොහොම ද?

ආචාර්ය චන්දන ජයරත්න - අහසේ උඩ කෙළවරෙන් වැහීගෙන එනවා. කොළඹට, අනුරාධපුරයට එකිනෙක වෙනස් ප්‍රමාණයෙන් මෙය දර්ශනය වෙනවා.

ප්‍රධාන මැදිරියේ සිට

මෙහෙයුම් නිවේදක (පාලිත පෙරේරා මහතා) - ඔව් චන්දන... අපත් සූදානමින් ඉන්නේ සූර්යග්‍රහණය නරඹන්න. විද්‍යා ලේඛක අනුර සී. පෙරේරා මහතා මේ දැන් මැදිරියෙන් පිටතට දුවලා ගිහින් ඉරේ තත්ත්වය බලලා ආවා. අද උදේ අටකුත් විනාඩි 47ට ලංකාවෙන් වැඩි ප්‍රමාණයකට මේ අර්ධ සූර්යග්‍රහණය පේනවා. මේ සාකච්ඡාවේදි තව කතා කළ යුතු යමක් තියෙනවා. මේ සූර්යග්‍රහණය සිදු වන වේලාවෙ ම නො පීදුණු ගහකට ඉදලකින් ගැහැව්වා ම ඵල දරනවා කියලා කතාවක් තියෙනවා. මේ ගැන වීරරත්න මහත්මයාගෙන් යමක් අහන්න කැමති යි.

ආචාර්ය සුසිල් වීරරත්න - ඒවායේ යම් පදනමක් ඇති. ඒත් සංඛ්‍යාලේඛන අරන් හොයලා බලලා ඒක පර්යේෂණාත්මකව ඔප්පු කළ පසුවයි අපට ඒක නැහැ කියා කියන්න පුළුවන්. ඒ නිසා ඔවැනි අදහස් ගැන එකවර තීරණ දෙන්න අමාරුයි.

මෙහෙයුම් නිවේදක - ඉන්දියාවේ නම් අරළු, බුළු, නෙල්ලි පත එකට සිඳ බොන්න දෙනවලූ. ආචාර්ය චන්දන ජයරත්න නම් කිව්වෙ ඒවා කොයි වෙලේ බිව්වත් හොඳයි කියලා. සූර්යග්‍රහණයක් ඇතත් නැතත් ඒවා බොන එක හොඳ යි.
මමයි, ධර්මරත්න මහත්මයයි තව ම මේ මැදිරියෙන් පිටතට ගියේ නැහැ. මේ අවස්ථාව දැක ගන්න. ඇත්තට ම මෙවර පූර්ණ සූර්යග්‍රහණයක් පේන්නෙ කොයි පළාත්වලට ද?

ජී.එම්.ජී. ධර්මරත්න මහතා - කල්කටාව, බංග්ලාදේශය හරහා බුරුමය කිට්ටුව මේ පූර්ණ සූර්යග්‍රහණය පේනවා. ඇෆ්ගනිස්ථානයෙන් පටන් ගෙන වියට්නාමය හරහා බුරුමය දක්වා ඒ ටිකට මෙය පූර්ණ සූර්යග්‍රහණයක් ලෙස පෙනේවි.

මෙහෙයුම් නිවේදක - ඒ කියන්නේ පූර්ණ සූර්යග්‍රහණය පෙනෙන්නෙ එක පටියක් සේ දිවෙන කලාපයක පමණයි. සුළු ප්‍රදේශයකට විතරයි. ඒ ඇයි කියන්න පුළුවන් ද?

අනුර සී. පෙරේරා - ඔව්, වර්ග කිලෝ මීටර 275ක පමණ සුළු ප්‍රදේශයක් දක්වා පමණයි මේ ඡායාව වැටෙන්නෙ. ඒකට චන්ද්‍රයා පුළුවන් තරම් ළං වෙන්න ඕන. පූර්ණ ග්‍රහණයක් වුණාට උතුරු ඉන්දියාව, පකිස්ථානය, බුරුමය වගේ සීමාසන්න කලාපයකට පමණයි ඒක පේන්නෙ. අද උදේ 8.47ට ලංකාවට දර්ශනය වෙන්නෙ අර්ධ සූර්ය ග්‍රහණයක්. ඒ වෙලාවට වලාකුළු රහිත පැහැදිලි අහසක් තිබේවි කියලා බලාපොරොත්තු වෙනවා. ඒත් අහසේ වලාකුළුවල අද වෙනසක් පේනවා. උතුර, නැගෙනහිර, උතුරු මැද පළාත්වල තරමක වැහිබර කාලගුණයක් පවතිනවා. වලාකුළුවල තත්ත්වය නිසා මේ අර්ධ ග්‍රහණය පෙනෙන්නෙ නැති වෙන්නත් පුළුවන්.

මෙහෙයුම් නිවේදක - ආචාර්ය චන්දන ජයරත්න සමග චන්දන තිලකරත්න ග්‍රහලෝකාගාරයේ සිට ඒ ගැන තවත් තොරතුරු ගෙන ඒවි.
1955 දී පූර්ණ සූර්යග්‍රහණයක් මං නම් දැක්කා අනුරට මතක ද මන්දා... අනුර නම් පොඩි ඇති.

අනුර සී. පෙරේරා - ඔව්, මට වයස අවුරුදු 8ක් විතර ඇති. ඒ අවස්ථාව මගේ සිතේ තදින් ම තැන්පත් වුණා. පාන්දර සූර්යයා නැගලා අහස කළු වෙලා තරු දිලූණා. හැන්දෑවට කුරුල්ලන් කෑ ගහන ශබ්දය ඒ වෙලාවෙ ඇහෙන්න ගත්තා. හරක් අමුතු හැසිරීම් ස්වභාවයක් පෙන්නුවා. පොඩි ළමයෙක් විදිහට මට හිතා ගන්න බැරිව ගියා මොකක් ද වුණේ කියලා.

කේ. ආර්. අභයසිංහ - 1955 ජූනි 20 වෙනිදා පූර්ණග්‍රහණය පටන් ගත්තෙ උදේ 8.11ට උදේ 8.11 සිට 8.15 දක්වා තිබිලා ඉවර වුණා. විනාඩි 8 තත්පර 8යි.

මෙහෙයුම් නිවේදක - කුඩා කාලයේ ත්‍රිකුණාමලයට ගිය ගවේෂණාත්මක ගමනක දී නගරයේ විශාල පිට්ටනියක් මැද්දෙ අප ගවේෂණාත්මකව සූර්යග්‍රහණය ගැනත් අහස ගැනත් හැදෑරුවා. බුධ ග්‍රහයා පියවි ඇසින් දැක ගැනීමේ වාසනාව එදා මට ලැබුණා.

අනුර සී. පෙරේරා - සූර්යග්‍රහණයේ දී සූර්යයා අඳුරු වන නිසාත්, බුධ, සූර්යයා ළඟ ම සිටින ග්‍රහයා නිසාත් එහෙම දකින්න පුළුවන්. ඒ නිසයි බුධ පියවි ඇසින් දකින්න හැකි වෙන්නේ.

ආචාර්ය සුසිල් වීරරත්න - මේ වැඩසටහනට කන් දෙන ශිෂ්‍යයන්ට කියන්න පණිවුඩයක් තියෙනවා. මේ සූර්යග්‍රහණය වෙන මොහොත හරි ම අපූරුයි. කුකුළන් නැවත වතාවක් හඬලන්න ගන්නවා. නිදිකුම්බා, තෝර වගේ ගස්වල කොළ නැවෙනවා. මලානික ස්වභාවයක් ගන්නවා. දැන් 8.46ට අනුරාධපුර, පොලොන්නරුව, යාපනය වැනි ප්‍රදේශවල මේ වෙනස්කම් දකින්න ලැබේවි. සතුන්ගේ චර්යාවන් ද වෙනස් වේවි. ඔබත් මේ මොහොත දැක බලා ගන්න.

ධර්මරත්න මහතා - ඔව්... පාසල් ළමයි ඔය බොරු මිථ්‍යා මතවලින් මිදිලා ආරක්ෂක විධි ක්‍රම යොදා මේක බලාගන්න. ඒක වටිනා දෙයක්...

මෙහෙයුම් නිවේදක - ඔව්, එහෙනම් අර්ධ සූර්යග්‍රහණය නරඹන්න ඔබට කරන ආරාධනාවත් සමඟ අපි ග්‍රහලෝකාගාරයට යනවා. චන්දන තිලකරත්න, මයික්‍රෆෝනය ඔබට.

(නැවත ග්‍රහලෝකාගාරයේ සිට)

නිවේදක (චන්දන තිලකරත්න) - ස්තුතියි... ඔව් දැන් අප සූර්යයා දකින්නේ තුදුස්වක හඳ වගේ. සමහර පාසල්වල අද නිවාඩු දීලා. සත්‍ය වගේ ම අසත්‍ය තොරතුරුත් මේ සූර්ය ග්‍රහණය සම්බන්ධයෙන් පැතිරිලා. ඒත් අප සමඟ මෙහි සිටිනවා පාසල් ශිෂ්‍යයෙක්.
අපි කතාකරල බලමු.
ඔබ මොන පාසැලෙන් ද? කොහොම ද, මෙහි ආවේ?

ශිෂ්‍යයා - මම අශෝක විද්‍යාලයෙ... විද්‍යා සංගමයේ සර් අපිව එක්ක ආවා. අම්මලා තාත්තලා දැකලා තිබුණු නිසා අපිත් ආසාවෙන් හිටියේ මේක බලන්න. සර්ට ස්තුතිවන්ත වෙන්න ඕන.

නිවේදක - දැන් කොහොම ද? ඔබේ සූදානම?

ශිෂ්‍යයා - අපි ම හදාගත් උපකරණයක් තියෙනවා. ජේ. සී. අමරසේකර සර්ගේ පුතා සමීර අමරසේකර තමයි ඒක හැදුවේ. අපි සේයාපට කීපයක් එකට තබා ස්ටේප්ලර් කරල බැලූවා.

නිවේදක - අපිට ගෙදර දීත් මේ උපකරණ නැතිව මේක බලන්න පුළුවන් නේද, ආචාර්ය ජයරත්න මහත්මයා...?

ආචාර්ය චන්දන ජයරත්න - ඔව්, ගෙදරදීත් පුළුවන්. අද මෙතැන සුදු තිරයක් මත සූර්ය ප්‍රතිබිම්බය ප්‍රක්ෂේපණය කළ විට ලස්සනට පෙනෙනවා. සෙනඟ වැඩි නිසා අපට වීඩියෝ මාර්ගයෙන් පෙන්වන්න වෙනවා.
ගෙදර දී කාඩ්බෝඩ් කෑල්ලක් ඇරගෙන මැදින් කුඩා සිදුරක් විදගන්න. ඒ සිදුර සූර්යයා දෙසට අල්ලා සූර්යයාගෙන් එන ආලෝක කදම්බය දර්පණයකට ගෙන බිත්තියකට අල්ලා බලන්න.
බිම සුදුරෙද්දක් එළා ගත්තත් ඒ ප්‍රතිබිම්බය දැකගන්න පුළුවන්. දැන් සූර්යයා හතරෙන් එකක් පමණ වැහිලා ලස්සනට පේනවා. දැන් ඔබ බලනවා නම් අර කුඩා සිදුර තුළින් එන ආලෝක කදම්බය දර්පණයට ගන්න පුළුවන්.

නිවේදක - තවත් විශේෂ යමක් තියේවි ද කියන්න.

ආචාර්ය චන්දන ජයරත්න - කඩදාසියෙ කුඩා සිදුර තුළින් එන ආලෝක කදම්බය දර්පණය තුළට ගැනීම යි කළ යුත්තේ. පියවි ඇසින් බැලීමේ දී හුඟ දෙනෙක් හුඟ වෙලාවක් බලාගෙන ඉද්දී ඇස් අන්ධ විය හැකියි. සූර්යග්‍රහණයක් ඇතත්, නැතත් සූර්යයා දෙස පියවි ඇසින් බැලීමේ දී ඇහැ පිච්චෙනවා; ඇස් අන්ධ වෙන්න පුළුවන්. පූර්ණ සූර්යග්‍රහණයක දී අඳුරු වැටී තිබී එකවර ම සූර්යයා දෙස බැලූවොත් ඇහේ බබා ලොකු වෙනවා. විශාල ආලෝකයක් එකවර ඒමෙන් ඇස අඳුරු විය හැකියි. සූර්යයාගේ පාර ජම්බුල කිරණ එනවා. ඒකෙන් ඇස් අන්ධ වෙනවා.
ඒ නිසා ගෙදර දී වුණත් ඒක ආරක්ෂිතව කළ යුතු දෙයක්. සපත්තු පෙට්ටියක් ගන්න. කතුරකින් අල්පෙනෙත්ති සිදුරකට වඩා ටිකක් ලොකු සිදුරක් හදා ගන්න. පිටුපස සව් කඩදාසියක් අලවා ගන්න. ඒ විදිහටත් බලන්න පුළුවන්.

නිවේදක - අර වීදුරුවක් අරන් පහන්දැලි ගාලා ගත්තම වුණත් පුංචි ම ළමයින්ට බලන්න හොඳ නැද්ද?

අචාර්ය ජයරත්න - කුඩා ළමයෙක් ඒ වීදුරුව පැල්ලම් හිටින විදිහට කළු කළා ම ඒක අහිතකරයි. ඒක පොදුවේ හොඳයි කිව්වත් දරුවන්ට වැඩිය ගැළපෙන්නෙ නැහැ. හේතුව වීදුරුව නිවැරදිව කළු කර ගන්න දරුවො දන්නෙ නැති නිසා.

කේ. ආර්. අභයසිංහ - පාසල් දරුවන් මේවා දැන ගත යුතුයි. ඉර බහිනවා. සඳ නඟිනවා. අප වෙසෙන පෘථීවිය තමා වටේ කැරකෙමින් සූර්යයා වටා යනවා. චන්ද්‍රයාත් කැරකෙනවා. චන්ද්‍රයා තමා වටා ගමන් කරමින් පෘථීවිය වටා ගමන් කරනවා. මේ ගමන් කරන තලය එක සමාන නැහැ. ත්‍රිමාණරූපීව බැලු විට සංකීර්ණ ගමනක්. මේ සූර්යග්‍රහණ, චන්ද්‍රග්‍රහණ වෙන්නෙ ඒ නිසා.

නිවේදක - දැන් අප අටවක සඳ වගේ නේද සූර්යයා දකින්නේ

ආචාර්ය චන්දන ජයරත්න - සූර්යයා හඳ වගේ කහ පාටට ලස්සනට පෙනෙනවා. විශේෂ කණ්ණාඩියක් පැලඳගෙන බලන්න වෙනවා. මේවා අප හදා ගත යුතු යි. ගුවන් විදුලියේ චන්දන තිලකරත්න මහත්මයාටත් ස්තුතිවන්ත විය යුතුයි, මේ විද්‍යාව ප්‍රචාරය කිරීම සම්බන්ධයෙන්. ජන මාධ්‍යවේදීන් විදිහට විද්‍යාව පතුරාලීම ඉතා ම වැදගත්.

නිවේදක - නැවතත් අපි ප්‍රධාන මැදිරියට සම්බන්ධ වෙමු.

ප්‍රධාන මැදිරියේ සිට

මෙහෙයුම් නිවේදක - ඔව්, දැන් කොළඹට හරියට ම 8.47ට මේ අර්ධ සූර්යග්‍රහණය දර්ශනය වෙනවා.

අනුර සී. පෙරේරා - අපේ සාකච්ඡාවට කන් යොමා ඉන්න අය ඇස්වලට ආදරයක් තියෙනවා නම් ඔබට දුන් ඒ උපදෙස් අනුව මේ අවස්ථාව දැක බලා ගන්න.

මෙහෙයුම් නිවේදක - ඒ වගේ ම මේ සූර්යග්‍රහණයට කලින් ඊයෙ පෙරෙයිදා ඉතා ම ආශ්චර්යවත් අහසක් අපට දැක ගන්න ලැබුණා. මාත්, මගේ දරුවනුත් පෙරේදා උදේ පාන්දර දර්ශනය වූ උල්කාපාත වර්ෂාව දැක ගත්තා. අනුර, ඇත්තට ම සූර්යග්‍රහණයක් අර්ධ සූර්යග්‍රහණයක් සමග උල්කාපාත වර්ෂාවක් ඇති වෙනවා ද? මොනව ද මේ උල්කාපාත...?

අනුර සී. පෙරේරා - අභ්‍යවකාශයේ ගමන් කරන දූලි අංශු පෘථීවිය හරහා ගමන් කිරීමේ දී පෘථීවියේ ආකර්ෂණයෙන් ඇද ගන්නවා. එහි දී පෘථීවියේ ඇති වන ඝර්ෂණය නිසා ඒ දූලි අංශු විවිධ වර්ණයෙන් දැවෙනවා. පෘථීවියේ ඝර්ෂණයක් සමග ඇති වී තිබෙන රසායනික ද්‍රව්‍ය සමග එකතු වී ඒවා වර්ණ ගැන්වෙනවා. උල්කාපාත කියන්නෙ ඒවාට.

මෙහෙයුම් නිවේදක - අනුර, ඇත්තට ම මේ සිදුවීම් දෙක දිනයක්, දෙකක් ඇතුළත සිදු වන ආකාරය පවා ආශ්චර්යවත් සිද්ධියක් නේ ද? උල්කාපාත වැස්සක් හා අර්ධ සූර්යග්‍රහණක්...

ආචාර්ය සුසිල් වීරරත්න - ඔව්, ඇත්තට ම මේ උල්කාපාත වර්ෂාව ඉතා ම අසිරිමත් දර්ශනයක්. සමහර උල්කා, තරුවක් වගේ ඉස්සරහට ම එනවා. සමහර ඒවා විවිධ වර්ණ විහිදුවමින් හරස් අතට යනවා, ඇතැම් උල්කාවන් අපේ ගේ ළඟට ම එනවා වගේ පෙනෙන්න ගන්නවා. ඒත් මේ හැම දේ ම කිලෝ මීටර ලක්ෂ ගාණක් ඉදිරියෙන් සිදු වන අසිරියක්, අපට පේන්නෙ මේ අපේ ගෙවල් ළඟ ම සිදු වන දෙයක් වගේ.

මෙහෙයුම් නිවේදක - ඔව්, හරි ම අපූරුයි. මේ ගිය සඳුදා... පෙරේදා පාන්දර හතරට මාත් ඒ උල්කාපාත දැක්කා. ඊයෙත් ඒ ආකර්ෂණීය දර්ශනය එසේ ම සිදු වෙනවා කියා තිබුණා. අර්ධ සූර්යග්‍රහණයකට කලින් අහසෙ මහ පෙළහරක්, ආශ්චර්යවත් දර්ශනයක් නේද? තව ඔය හිරු රාහු අල්ලනවා කියාත් මතයක් තිබෙනවා නේද, සූර්යග්‍රහණය ගැන?

අනුර සී. පෙරේරා - ඔව්, ඒ තාරකා විද්‍යාව දියුණු නැති කාලයක, අතීතයේ දී අපේ පැරණි රජවරු නක්ෂත්‍රකරුවන්ගේ ජීවිත පවා විනාශ කරලා තිබුණා, මේවා ගැන කලින් දැනුවත් කළේ නැහැ කියලා ඉර ගිල ගන්නවා කියලා මිනිස්සු ඉර බේර ගන්න වෙඩි තියලා තියෙනවා. වැඩි ඈතක නොවේ, 70 ගණන්වල ඉන්දියාවේ. ඒ උණ්ඩ නැවත ඇවිත් මිනිස්සු පවා මැරුණා.

මෙහෙයුම් නිවේදක - සූර්යග්‍රහණයක දී හෝ අර්ධ සූර්යග්‍රහණයක දී වඩ දිය බා දිය ඇති විය හැකි ද?

අනුර සී. පෙරේරා - ඔව්, උදාහරණයක් ලෙස කැලණි ගඟ අනෙක් පැත්තට ගලනවා. මුහුදේ වතුර ආපසු එනවා. මාළු බෝට්ටු ආපස්සට එනවා. ඒ වගේ වෙන්න ඉඩ තියෙනවා.

මෙහෙයුම් නිවේදක - ඔව්, මට මතකයි. එදා අර පූර්ණ සූර්යග්‍රහණයේ දී කාක්කො ඉගිලිලා ගියා. හරක් කන් ගහලා තණ උලා කන්න ගත්තා. කාක්කො කෑ ගහලා කූඩුවලට ආවා හරක් උම්බෑ ගෑවා; තරු දිලෙන්න ගත්තා. හරි අපූරු අතදැකීමක් ඒක.

අනුර සී. පෙරේරා - ඔව්, පූර්ණ සූර්යග්‍රහණයක් ඉතා ම චමත්කාර ජනක යි. තාරකා විද්‍යාඥයන් අදත් මේ සූර්යග්‍රහණ ගැන විවිධ පර්යේෂණ කරනවා. ජ්‍යෝතිෂඥයෝ තවමත් අනාවැකි කියනවා. ජීවිතයේ දී ලැබෙන මේ විරල අවස්ථාව මග නො හැර එය නරඹා සතුටු විය හැකි නම් එය වාසනාවක්.

සාකච්ඡා මණ්ඩපය

ගුවන් විදුලියේ ප්‍රධාන මැදිරිය

මෙහෙයුම් නිවේදක - පාලිත පෙරේරා මහතා

ජනප්‍රිය විද්‍යා ලේඛක හා දේශක - අනුර සී. පෙරේරා මහතා
                                       ආචාර්ය සුසිල් වීරරත්න මහතා

කාලගුණ විද්‍යාඥ - කේ. ආර්. අභයසිංහ මහතා
                                  ජී.එම්.ජී. ධර්මරත්න මහතා

එළිමහන් පටිගත කිරීම - ග්‍රහලෝකාගාර පරිශ්‍රය

නිවේදක - චන්දන තිලකරත්න මහතා

තාරකා විද්‍යාඥ - ආචාර්ය චන්දන ජයරත්න මහතා

ප්‍රචාරය වූ දිනය - 1995.10.24