මෙලොව ජීවත් වන මිනිස්සු විවිධාකාරව ජීවත් වී අවසන් ගමන යන්නෝ ය. සමහරු තම යහගුණාංග ආභරණ ලෙස සලකති. ඔවුහු ඊමාන්, සත්‍යය, සාධාරණත්වය, දයාව, පරිත්‍යාගය, යනාදි ගුණාංගයන්ගෙන් හෙබි යහගැත්තෝ ය. තවත් සමහරු කුෆ්ර්, අසත්‍යය, මිනිස් ඝාතන, මංකොල්ලය, ද්‍රෝහීවීම, පොරොන්දු කඩ කිරීම, රැවටීම, වංචා කිරීම යනාදී කුරිරු පව්වල යෙදී සිටි අයහපත් පුද්ගලයෝ ය.

යහපත් - අයහපත් යන දෙපිරිසට ම ජීවිතයේ සමාප්තිය ලෙස මරණය තිබීම සාධාරණ ද? එය ජීවිතයේ අර්ථය පවසයි ද? එසේ නම් මෙලොවෙහි පින් කර ජීවත් වන අයට ලැබෙන ප්‍රතිලාභය කුමක් ද? පාප ක්‍රියාවල නියැලී අනෙක් අයට දුක් දෙමින් ජීවත් වන අයට දඬුවම් නොතිබේ ද?

වරදකරුවන් අතරත් පාපී ක්‍රියාවල කොතෙකුත් වෙනස්කම් තිබෙනවා නොවේ ද? ඝාතනයක් සිදු කළ පුද්ගලයාටත්, ඝාතන රාශියක් සිදු කළ පුද්ගලයාටත් ලෝකයා දෙනු ලබන ඉහළ ම දඬුවම මරණීය දණ්ඩනයයි. මෙය සාධාරණ ද? කොහෙත් ම නැත. එසේ නම් යහපත් අයටත්, අයහපත් අයටත් ඔවුනොවුන්ගේ ක්‍රියාවන්ට අනුව ප්‍රතිඵල ලබා දීම සාධාරණ නොවේ ද? එසේ සිදු කරන දිනය, මුඃමින්වරුන් වන අපි අවසාන දිනය ලෙස විශ්වාස කරන්නෙමු.

අවසාන දිනයේ නොයෙකුත් සිදුවීම් සිදු වන්නේ ය. ඒවා අපි පෙර පාඩමේ දී උගත්තෙමු. අවසාන දිනයේ අවසානයේ දී සිදු වන සිදුවීම යහපත් අය ස්වර්ගයට පිවිසීමත්, අයහපත් පාපී අය නිරයට ඇද වැටීමත් ය. අපි ස්වර්ගය හා නිරය පිළිබඳව කෙටියෙන් විමසමු.

ස්වර්ගය

ස්වර්ගයට ජන්නතුල් ෆිර්දවුස්, ජන්නතුල් මඃවා, ජන්නතුල් අද්න්, දාරුල් හුලුද්, දාරුස් සලාම්, දාරුල් මුකාමා, ජන්නතුන් නඊම් යනාදී විවිධ නම් තිබේ.

ස්වර්ගය ඉතා උසස් ස්ථානයක් වේ. ස්වර්ගයේ තත්ත්වයන් කිහිපයක් තිබේ. එයින් ඉතා උසස් ම තැන ෆිර්දවුස් නම් වේ. එහි නබිවරුන්, සිද්දිකීන්වරුන් හා ෂුහදාවරුන් වැනි උත්තමයෝ සිටිති. අතිවිශාල මාලිගාවල ස්වර්ගවාසීහු සිටිති. ඔවුහු විවිධ වර්ගයේ පලතුරු වර්ග හා පක්ෂීන්ගේ මාංසයන් ද අනුභව කරමින් සිටිති. එම මාලිගාවට පහළින් කිරි, පැණි, මත්පැන් යනාදියෙන් යුත් වෙන වෙන ම ගංගා හඬ නගමින් ගලා යයි. පහතින් දැක්වෙන අල්කුර්ආන් වැකි මෙම අතිරමණිය දර්ශනය විදහා පෙන්වයි.

"නබිවරයාණනි, කවරෙකු විශ්වාස කොට යහ ක්‍රියා කළේ ද, ඔවුන්ට නියත වශයෙන් ම ස්වර්ගයේ සෙවණ තිබේ, යන ශුභාරංචිය පවසන්න. එහි ගංගා අඛණ්ඩව ගලා බසී. ඒවායින් ඔවුන්ට පලතුරක් කෑමට දෙනු ලැබේ. එවිට ඔවුහු කලිනුත් මෙය ම කෑවෙමු, යැයි (විස්මිතව) පවසති. එය (පෙනුමට) එක ම විදියට පෙනුණත් රසයෙන් වෙනස් වූ ඒවා ය. තව ද, පිවිතුරු භාර්යාවන් ද ඔවුන්ට හිමි වේ. ඔවුහු එහි ස්ථීරව ම සිටින්නෝ ය."(2 : 25)

ස්වර්ගවාසීන්ගේ ඇඳුම් පැලඳුම් ගැන අල්කුර්ආන් වැකි මෙසේ පවසයි.

"ස්වර්ගයේ රැඳී සිටින ඔවුන්ට රත්තරන්වලින් හා මුතුවලින් සෑදූ ආභරණ පලඳවනු ලැබේ. එහි දී ඔවුහු සේද රෙදිවලින් මැසූ ඇඳුම් ඇඳගෙන සිටිති." (22 : 23)

යහගැත්තෝ යහමග ජීවත් වූ, ඔවුන්ගේ භාර්යාවෝ, ළමයි, ස්වර්ගයේ දර්ශනීය උද්‍යාන සෙවණේ නිස්කලංකව හාන්සි වී සතුටින් සිටිති. ස්වර්ගයේ කිසි ම තැනක අසභ්‍ය වචන හෝ පාපී කතා හෝ කනට ඇසීමට නොතිබේ. සියලූ ම ස්වර්ගවාසීන්ගේ සිත්වලින් ක්‍රෝධය ඉවත් කොට ඇත. එම නිසා සියලූ දෙනා ම සිනහමුසු මුහු‚න් එකිනෙකාට සලාම් පවසමින් සහෝදරත්වයෙන් වැලඳ පිළිගනිති. ස්වර්ගයේ මුතු මැණික්, පබලූ රැස්දෙමින් අලංකාරව දිලිසෙයි. එහි ස්වර්ගවාසීන්ට හිමි වන අතිමහත් සතුට නම් පූර්ණ චන්ද්‍රයා මෙන් දිස්වන අල්ලාහු තආලා තම දෙඇස්වලින් දැකීමේ භාග්‍යය හිමි වීමය.

නිරය

නිරයට නාර්, සඊර්, ජහීම්, ජහන්නම්, ලළා, හාවියා, සකර්, හුතමා, වෛල් යනාදී විවිධ නම් තිබේ. නිරය අතිවිශාල ගිනි කන්දකි. එය ගැන පහතින් දැක්වෙන අල්කුර්ආන් වැකි පැහැදිලි කරයි.

"විශ්වාසවන්තයිනි, ඔබත් ඔබගේ පවුලේ සැමත් නිරයේ ගින්නෙන් ආරක්ෂා කරගන්න. නිරයේ ඉන්ධන වන්නේ මිනිසුන් හා ගල් ය. එහි දැඩි සිත් ඇති බල සම්පන්න මලාඉකාවරු සිටිති. අල්ලාහු තආලාගේ අණට ඔවුහු පිටුපාන්නේ නැත. ඔහුගේ අණ එලෙස ම ඔවුහු ඉටු කරති." (66 : 6)

"(පාපී වූ) ඔවුන් වතුර ඉල්ලා හඬ නගන විට අධි උෂ්ණත්වයකින් රත්කළ තඹ මෙන් ජලය ම ඔවුන්ට දෙනු ලැබේ. ඔවුන් බීමට මත්තෙන් එය ඔවුන්ගේ මුහුණු පුලූස්සා දමාලයි." (18 : 29)

"රත්වූ ජලය සමග, ඔවුන්ගේ සිරුර ගින්නෙන් පිලිස්සූ නිසා වැක්කෙරෙන සැරව සමග ම නිරයේ වාසීහු පානය කරති." (78 : 24, 25)

අල්ලාහු තආලාව ප්‍රතික්ෂේප කරන කාෆිර්වරුන්ට ගින්නෙන් නිම වූ ඇඳුම් කලින් ම සුදානම් කර තිබේ. නිරයට ගිය පසු එම ඇඳුම් ඔවුන්ට බලෙන් ම අන්දවනු ලැබේ. ඔවුන්ගේ හිසට ඉහළින් නටන උණුවතුර වක්කරනු ලැබේ. එම නිසා ඔවුන්ගේ සම, උදරයේ ඇති බඩවැල් පිලිස්සී පිපිරෙයි. ශක්තිමත් යකඩ දම්වැල්වලින් ඔවුන්ට පහර දෙති. වේදනාව දරා ගත නොහැකිව ඔවුහු නිරයෙන් පිට වී යාමට උත්සාහ කරති. නමුත් ඔවුහු නැවතත් එම ජලයට ඇද දමනු ඇත. පිලිස්සීමේ වේදනාව ඔබ තව තවත් විඳින්න යැයි ඔවුන්ට නිරයේ මුරකරුවෝ පවසති.

නිරයේ වාසීන්ට මරණයක් නැත. ඔවුන්ට කිසි දා සැනසුමක් නැත. සක්කූම් නමැති ආහාරයක් ඔවුන් හට ලබාදෙනු ලැබේ. එය තිත්ත, දුගඳ හමන පැළෑටි විශේෂයකි. නිරය වාසීන්ගේ සම ගින්නෙන් පිලිස්සී ගියත් නැවත නැවත සම අලූතින්ම ලබා දෙනු ඇත.

පාපී ක්‍රියාවල තරාතිරම අනුව නිරයේ දඬුවම්වල ප්‍රමාණය වෙනස් වේ. කාෆිර්වරු නිරයේ ස්ථීරව ම සිටිති. මුඃමින්වරුන්ගෙන් මහා පාපී ක්‍රියාවල නිරතවූවන්ට පාපීක්‍රියාව අනුව දඬුවම් කරනු ලැබේ. පසුව නබි සල්ලල්ලාහු අලෛහි වසල්ලම් තුමාණන්ගේ ෂෆාඅත් නිසා නිරයෙන් නිදහස් කරනු ලැබේ.

ලොවෙහි වෙසෙන අපි,

අල්ලාහු තආලා විශ්වාස කොට නබි සල්ලල්ලාහු අලෛහි වසල්ලම් තුමාණන් පෙන්වා දුන් ජීවන මග පිළිපදිමු;

යහපත් මිනිසුන් ලෙස ජීවත් වී සමාජයට හා රටට සේවය කර ජන්නතුල් ෆිර්දවුස් නමැති ස්වර්ගය ළඟා කර ගැනීමට උත්සාහ කරමු;

එසේ ම නිරයට මග පාදන පාපී ක්‍රියාවලින් ඈත් වී කටයුතු කරමු.