දෙසට කඳුකරේ
නගමි ඇස් මගේ
එනු ඇතේ එතැනිනේ
උදව් පිහිට මා සොයා
අහස හා පොළොව හා
මැව්ව සමිඳුනේ
මගේ සහයට ඔබ මැ වඩින්නේ

දෙපා හැපී නොවැටෙන ලෙස එතුමෝ ඔබ රකිත්වා
ඔබේ මුරකරු එතුමාණෝ ඔබ නිති මුර කරත්වා
එතුමන් නෑ කවදාවත් නිදි කිර කිර සිටින්නේ
ඊස්රයෙලූන් රකින්නෝ නොනිදති කිසි දිනෙක හෝ

සුරකු, ඔබට ඔබට හෙවණ, සුරිදෝ වෙති නිති පතා
රැකවරණය ඔබට දෙන සෙ, ඔබ සුරතේ සිටින්නේ
රෑ යාමේ සඳුගෙන් වන විපතින් ඔබ මුදන්නෝ
දිවා හිරුගෙ උවදුරින් ද එතුමෝ ඔබ රකින්නෝ

ඔබට වදින හැම නපුරින් සුරිදෝ ඔබ රකින්නෝ
ඔබගේ වන ආත්මය ද රකිති ඔවුන් වහන්සේ
යන එන ගමනත් ඔබගේ සුරිඳුන් හට බාර වේ
ගෙවමින් යන දැනුත් මේ අදත්, හෙටත් නිති දිනේ

(කිතුනු ගී 76)

ඉහත ගීතිකාව මෙනෙහි කරමින් ගායනා කරන්න. එය ගීතාවලිය 121 ඇසුරෙන් ලියවුණු තෙහිලි ගීයකි.

ගීතාවලිය යනු යාච්ඤාමය ගීතිකා 150ක එකතුවකින් යුත් ශුද්ධ බයිබලයෙහි පොතකි. මෙහි එන සෑම ගීතිකාවක් ම තත් සහිත වාද්‍ය භාණ්ඩයක් සමග ගායනා කළ ඒවා ය. මෙම ගීතිකා බොහොමයක් දෙවියන් වහන්සේගේ යහපත්කම නිසා පිරී ඉතිරී යන සතුටකින් හා ප්‍රශංසාවකින් ගායනා කරන ලද ඒවා ය. එහෙත් දුක, විලාපය හා මනස්ථාපනය යනාදිය ඇති ව ගයන ලද ගීතිකා ද ඇත. තවත් සමහර ගීතිකා ලෙඩ-දුක් හා ජීවිතයේ අමිහිරි අත්දැකීම් පිළිබඳ ව ය. ගීතාවලිය ශුද්ධ බයිබලයේ අනෙක් පොත්වලට වඩා දෙවි සමිඳාණන් වහන්සේ වෙත යොමු කෙරුණු ඉශ්රායෙල් ජනතාවගේ ජීවිතය හා සම්බන්ධ අත්දැකීම් ආශ්‍රයෙන් ම ලියා ඇත.

"ඉශ්රායෙල් ජනතාවගේ යැදුම් පොත" හා "ගී කළඹ" ලෙස හඳුන්වනු ලබන ගීතාවලිය ශුද්ධ බයිබලයෙහි යාච්ඤා පොත ලෙස ද හැඳින්වේ.

සාම්ප්‍රදායික ව දාවිත් රජතුමා ගීතාවලියෙහි කර්තෘ ලෙස පිළිගනු ලබයි. එහෙත් මෙම ගීතිකාවල දක්නට ලැඛෙන භාෂා ශෛලියේ විවිධත්වය, අන්තර්ගතය හා සම්බන්ධ කාලය පිළිබඳ සලකා බැලිමේ දී කර්තෘත්වය පිළිබඳ එකඟතාවක් නොමැති බව පෙනේ. ගීතාවලියට පසුබිම් වී ඇත්තේ ඉශ්රායෙල් ජනතාවගේ ජනවන්දනාව (නමස්කාරය) බව පොදු පිළිගැනීමයි.

ගීතාවලිය නිර්මාණය වී ඇත්තේ කාණ්ඩ පහක එකතුවකිනි. (පංච පුස්තකය ද පොත් පහකින් සමන්විත ය.)

පළමුවන කාණ්ඩය - ගීතාවලිය 1-41
දෙවන කාණ්ඩය - ගීතාවලිය 42-72
තෙවන කාණ්ඩය - ගීතාවලිය 73-89
සිව්වන කාණ්ඩය - ගීතාවලිය 90-106
පස්වන කාණ්ඩය - ගීතාවලිය 107-150

මෙම සැම කාණ්ඩයක් අවසානයෙහි ම ඇති වගන්තිය (වගන්ති) යාච්ඤාමය ස්වරූපයක් ගනියි. දෙවි සමිඳාණන් වහන්සේට කරන ප්‍රශංසාවකින් සැම පොතක් ම අවසන් වේ.

උදා :-

ගීතාවලිය 41:13
ගීතාවලිය 72:19
ගීතාවලිය 89:52
ගීතාවලිය 106:48
ගීතාවලිය 150

ගීත වර්ගීකරණය

1. ප්‍රශංසා ගීතිකා

දෙවියන් වහන්සේගේ මැවීම හා ගැලවීමේ ක්‍රියාවලියත් ඔවුන් වහන්සේගේ ගුණාංග වන යහපත්කම, කරුණාව, දයාව, උදාරත්වය, රාජකීයත්වය වැනි ලක්ෂණ වර්ණනා කරමින් ස්තූති කරන්නටත් නිර්මාණය කළ ගීතිකා මෙහි අඩංගු වේ.
උදා :- ගීතාවලිය 8, 112, 145-150

2. විලාප ගීතිකා

කරදර හා ආපදා අවස්ථාවල සහනය පතා දෙවියන් වහන්සේට ආයාචනා කරන ගීත මේ නමින් හැඳින්වේ. මේවා කොටස් දෙකකි.

1. පෞද්ගලික විලාප ගීතිකා - 3, 5, 6, 7, 13, 14
2. සාංඝික හෝ ජාතික ආයාචනා - 44, 74, 79, 80, 83

3. තුති දීමේ ගීතිකා

දෙවියන් වහන්සේගෙන් ලද වරප්‍රසාද හෝ දීමනා වෙනුවෙන් කෘතවේදීතාව ප්‍රකාශ කරන ගීතිකා වේ.

උදා :- ගීතාවලිය 18, 105-116

4. ප්‍රඥා ගීතිකා

ධර්මිෂ්ඨ ජීවිතයක් ගත කිරීම සඳහා ජනතාවට යහ මග පෙන්වන ඉගැන්වීම් මෙම ගීතවල අන්තර්ගත වේ.

උදා :- ගීතාවලිය 1, 73-133

5. රාජකීය ගීතිකා

රාජාභිෂේක හා රාජකීය විවාහ මංගල්‍ය අවස්ථාවල දී භාවිත කරන ගීත මෙලෙස හැඳින්වේ.

උදා :- ගීතාවලිය 2, 45-72

6. සියොන් ගීතිකා හෙවත් වන්දනා ගීතිකා

"සියොන්" යනුවෙන් හැඳින්වෙන්නේ ජෙරුසලම ය. ජෙරුසලමේ ශ්‍රී විභූතිය ගැන මෙම ගීතිකාවලින් ප්‍රකාශ වේ. ජෙරුසලම කරා යන වන්දනා ගමන්වල දී භාවිත වී ඇත.

උදා :- ගීතාවලිය 46, 48,122-125

7. විශ්වාසයේ ගීතිකා

මෙම ගීතිකා දෙවිඳුන් කෙරෙහි අචල විශ්වාසය ප්‍රකාශ කරයි. දෙවියන් වහන්සේ මත යැපෙමින් මෙම ගීත ගායනා කරයි.

උදා :-ගීතාවලිය 23, 62

ගීතාවලිය යාච්ඤාව පිළිබඳ නිධානයකි. ගීතාවලිය ඉශ්රායෙල් ජනතාව තම ජන ජීවිතය තුළ දෙවි සමිඳාණන් වහන්සේ අත්දුටු බවට ඇති හොඳ ම සාක්ෂියකි. ඔවුන්ගේ ජීවිතයේ සැම සිදුවීමක් සමග ම බැඳුණු අත්දැකීම් දෙවියන් වහන්සේ වෙත ඉදිරිපත් කෙරෙයි.

ගීතාවලියෙහි ගීතිකා ක්‍රිස්තුන් වහන්සේගේ ඉගැන්වීම්වල දී භාවිත කර ඇත. කන්ද උඩ දේශනාවේ දී ගීතාවලිය උපුටා ගෙන ඇත. 6:9, 24:3-4 හා 37:11 උදාහරණ වේ. තව ද කුරුස ගසේ දී ජේසුස් වහන්සේ ගීතාවලිය 22:1 භාවිත කර ඇත.

සතුට, ජයග්‍රහණය වෙනුවෙන් දෙවියන් වහන්සේට ප්‍රශංසා කරන අපි වේදනාවේ දී කරදරයේ දී දෙවිඳුන්ට කන්නලව් කරන්නෙමු; උන්වහන්සේගේ පිහිට පතන්නෙමු. පාපයට වැටුණු විට මනස්ථාපනය වන්නෙමු. දෙවිඳුන් සොයා නැවත හැරෙන්නෙමු. සමාව යදින්නෙමු. මෙවැනි සියලූ අත්දැකීම් අප යාච්ඤාවට ගොනු කරනුයේ ගීතාවලියෙහි ගීත ආශ්‍රයෙනි.

ජනවන්දනාවේ උතුම් ම අංගයක් වූ දිව්‍ය පූජාවේ දී ද දේව වචනයට පිළිතුරක් ලෙස යොදා ගනු ලබන්නේ ගීතාවලියෙන් ගන්නා ලද ගීතිකා ය. එමෙන් ම යාම යැදුම හා සැඳෑ යාම යැදුම සඳහා ද ගීතාවලිය නැති ව ම බැරි ය.

එහෙයින් ගීතාවලිය එදා මෙන් ම අදත් ජනවන්දනාවේ දී භාවිත වේ. එය බැතිමතුන්ගේ සිත් සතන් දෙවිඳුන් වෙත එසවීමට උපකාර වන යැදුම් පොතකි.