ඉහත බයිබල් පාඨයෙන් අපට පෙන්නුම් කරන්නේ ජල ගැල්මට හේතුව ලොව පුරා පැතිර ඇති මනුෂ්‍යයාගේ දුෂ්ටකම බව ය. පාපය නිසා දෙවියන් වහන්සේ ශෝක වන බවත්, එම නිසා උන්වහන්සේ දඩුවම් කරන බවත් බයිබල් කතුවරයා පෙන්නුම් කරයි. මැවිල්ලේ මුදුන්මල්කඩ වූ මනුෂ්‍යයාගේ පාපය මුළු මහත් මැවිල්ලටම විනාශකාරී ලෙස බලපාන ආකාරය නෝවා හා ජලගැල්ම තුළින් අපට පෙන්නුම් කරයි.

ඉහත බයිබල් පාඨයෙන් අපට පෙන්නුම් කරන්නේ ජල ගැල්මේ පරමාර්ථය මිනිසා විනාශ කිරීම නොව මිනිස් වර්ගයා දෙවියන් වහන්සේගෙන් ඈත් කරන අයහපත ලොවෙන් තුරන් කිරීමයි.

ඉහත රූප සටහනේ පෙන්නුම් කරන්නේ වර්තමාන සමාජය තුළ ඇති පාපී ක්‍රියා ය. මෙම පාපී ක්‍රියා මුළු මහත් මැවිල්ලට ම විනාශකාරී ලෙස බලපායි. මෙම පාපී ක්‍රියා තුරන් කිරීමට ඔබට ගත හැකි පියවර මොනවා දැයි සිතා බලන්න. අප සැම විට ම පාපී ක්‍රියා ප්‍රතික්ෂේප කළ යුතු ය.

පාපය ක්‍රම ක්‍රමයෙන් ලොව පුරා වර්ධනය වී එහි විනාශකාරී බලය තහවුරු වුවත් දෙවියන් වහන්සේ මනුෂ්‍යයාට ගැලවීමේ නව මංපෙත් විවර කළ සේක. පාපයෙන් දූෂණය වූ මැවිල්ල විනාශ කිරීමට උන්වහන්සේ තීරණය කළත්, නෝවාගේ පවුල හා සියලූ සතුන්ගේ නියෝජිතයන් බේරා ගැනීමෙන් පෙන්නුම් කරන්නේ උන්වහන්සේගේ දයා කරුණාව ය. එම නිසා නෝවා නව මැවිල්ලක ආරම්භකයා වශයෙන් තෝරා ගනු ලබයි. නෝවා තෝරා ගත්තේ ඔහුගේ යහපත්කම කරණ කොට ගෙන ය.

නෝවා මෙන් අප ද සත් ගුණවත් මිනිසුන් ලෙස ජීවත් විය යුතු ය. එසේ ම අවංකව ජීවත් විය යුතු ය. නෝවා ධර්මිෂ්ඨ ලෙස ජීවත් වූවාක් මෙන් අපත් ධර්මිෂ්ඨ ලෙස ජීවත් විය යුතු ය. එවිට අපට ද දේව කරුණාව ලැබේ.

දෙවියන් වහන්සේ නෝවාට දුන් පොරොන්දුව ඒ ආකාරයෙන් ම සඵල විය. නෝවා ජල ගැල්මෙන් බේරිණි.

නෝවා තුළ තිබූ උතුම් ගුණාංග සමුදාය නිසා දෙවියන් වහන්සේ විශේෂ සැලකිල්ලට යොමු වූ අයුරුත් උන්වහන්සේගේ මිත්‍රත්වයේ හස්තය ඔහු වෙත දිගුකළ අන්දමත් ශුද්ධ බයිබලය පැහැදිලි ව පෙන්වා දී ඇත. දෙවියන් වහන්සේගේ දයා කරුණාව ලබා ගැනීම සඳහා අප ගමන් කළ යුතු මාර්ගය සම්බන්ධයෙන් නෝවාගේ ජීවිතයෙන් ලැබෙන්නේ සර්ව කාලීන වටිනාකමක් ඇති උසස් ආදර්ශයකි.

නැවත මුළු ලොව ම ජලයෙන් විනාශ නොකිරීමට දෙවියන් වහන්සේ තීරණය කර ප්‍රතිඥාවක් දෙන සේක. එම ප්‍රතිඥාව පහත බයිබල් පාඨ තුළින් පෙන්නුම් කරයි. උන්වහන්සේගේ දයා කරුණාව ද මනාව පෙන්නුම් කරයි. එමෙන් ම එය දේව ආරක්ෂාව හා දේව සංරක්ෂණය මතු පාපයට ගොදුරු වන මනුෂ්‍යාට ද ලැබෙන බවට සහතිකයකි.

දෙවියන් වහන්සේ තමන් වහන්සේ හා මුළු මැවිල්ල සමග ගිවිසුමක් කළ සේක. "දේදුන්න" එම ගිවිසුම සනාථ කරන සංකේතයක් ලෙස දක්වයි. එය දෙවියන් වහන්සේ මිනිසා සමග කරන ඒක පාර්ශ්වික ගිවිසුමකි.

දේදුන්න වැහි කුණාටු අවසන් වීම දක්වන සලකුණක් විය. ඒ අනුව දිව්‍ය සංරක්ෂණය එමගින් සංකේතාත්මක ව ඉදිරිපත් කරයි. පුරාණ ගිවිසුමේ දේදුන්න දේව අනුකම්පාවේ, කරුණාවේ හා ප්‍රේමයේ සංකේතයක් විය. දෙවියන් වහන්සේ නැවත වරක් මුළු ලෝකය ම ජලයෙන් විනාශ නොකරන බවට දෙන පොරොන්දුව ගිවිසුමක් මගින් මිනිසා හා තම සම්බන්ධතාව යළි ගොඩනංවන සේක. දේදුන්න නෝවා සමග ගිවිසුමේ බාහිර සලකුණ ය.

දෙවියන් වහන්සේ නෝවා සමග ඇති කර ගත් ගිවිසුමේ පොරොන්දුව ඉටු කළ සේක. එමෙන් ම අප ද සැම විට ම අන් අයට දෙන පොරොන්දු ඉටු කළ යුතු ය. නිවසේ දී පාසලේ දී මීසමේ දී අන් අයට දෙන පොරොන්දු ඉටු කළ යුතු ය.