ප්‍රස්තා පිරුළු
ප්‍රස්තා පිරුළු
අප අතර තැනට ගැළපෙන අයුරින් පැවසෙන කියුම් ඇත.එවැනි කියුම් වලට ප්‍රස්තා පිරුළු යයි ව්‍යවහාර කෙරේ. පිරුළු මිණි ග්‍රන්ථය ඇසුරින් සකසා ගත් පිරුළු කිහිපයකි මේ.
අහසේ මාලිගා තනනවා වාගේ:
සමහරු තමන්ට මුදල් ලැබුනාම මෙබඳු දේ කරනු දක්නට ලැබේ.මෙවැනි ගෙවල් දොරවල් , යාන වාහන ගන්නවා යනාදි ලෙස සිත සිතා කල් ගෙවති.මනෝරාජ්‍යය යයි කියන්නෙත් මෙයටමය. මේ සම්බන්ධයෙන් ජනකතාවක් ද ඇත.
දිනක් එක්තරා තරුණ ගොවි මහත්තයෙක් හාන්සි පුටුවේ දිගාවි කල්පනා කරමින් උන්නේය.ඔහුගේ ගේට්ටු දෙපස කරල් වලින් බරවූ මුරුංගා ගස් දෙක මේ මොහොතේදි ඔහුට පෙණින."මෙදා මුරුංගා ගස් දෙකම කරලින් බරවී ඇත.මේ පළාතේ වෙන එක මුරුංගා ගසකවත් කරල් නැත. මුරුංගා මිළද නැගි ඇත.මෙදා මුරුංගා වලින් මට සිය ගණනක් ලැබේ. මුරුංගා විකුණා ලැබෙන මුදලින් මම එළු දෙනුන් හත් අට දෙනෙකු මිළට ගමි. ඔවුන් පැටවුන් විසි තිස් ගානක් ලබනු ඇත.එළු කිරි විකිනීමෙන් මට මසකට පවුම් හැට හත්තෑවක් ලැබේවි.
වැඩිකල් නොගොස්ම තව තව පැටවුන් ලැබීමෙන් එළුවන් සිය ගනනක් වේවි.මගේ තත්වයට සුදුසු තැනකින් තරුණියක් ආවාහ කරගමි.මේ ගමේ පලමුවෙනි ගමරාලගෙ දුව මගේ භාර්යාව වශයෙන් ගැළපේවි. ඈ කැන්දාගෙන එන මගුල් උලෙල බොහොම ලස්සනට කරන්නට ඕනෑ.නෑ මිතුරන් බඳින තොරන් හැර මගේ ගේට්ටුව ඉදිරිපිට මා විසිනුත් තොරණක් බන්ඳවන්නට ඕනෑ.ඒ තොරණ මේ පළාතේ මගුල් ගෙයකට් නොබෙන්ද තරම් ලොකුවට ලස්සනට බන්දවන්නෙමි.මේ මුරුංගා ගස් දෙක නිසා මගේ මගුල් තොරණ බඳින්නට ඉඩ නෑ.ඒ නිසා මේ ගස් දෙක කපන්නට ඕනෑ. මෙසේ මනෝ රාජ්‍යයෙහි රජ කරමින් උන් ගොවි තරුණයා පොරොව ගෙන ගොස් මුරුංගා ගස් දෙක කප බිම හෙලුවේය.ඉන් පසුවය ඔහුට සිදුවුන අලාභය ඔහුට වැටහුනේය. ඔහු සියලු යස ඉසුරු බලාපොරොත්තු වූ මුරුංගා ගස් දෙකත් ඔහුට නැති විය .
අංකුට්ටන් එල්ලුණු කතාව වාගෙයි:
අදහා ගත නොහැකි අතිශයෝක්තියක් සම්බධයෙන් කියවෙන පිරුළකි.දිනක් දිග රැවුලක් ඇති මිනිහෙක් වක්කඩකින් දිය බී ගෙදර ගියේය.මඳ වේලවකට පසු ඔහුගේ නිකට කසන්නට වූයෙන් පරීක්ෂා කර බැලූ විට අංකුට්ටන් මාලු විසි ගණනක් රැවුලේ සිට අසුවූ බව කියන ජනකතාවකි.
ආඳා මාලු ඉරට්ටෙන් කනනා වාගෙයි:
ආඳා වනාහි සර්පයකුට සමාන හැඩහුරු කමක් ඇතිමාලුවෙකි .එහෙත් උගේ මාලු රසවත් කමින් අඩු නැත. පැරැන්නෙක් ආඳා මාලු අතින් ඇල්ලීම පිළිකුල් සහිත වැඩකැයි කියා ඉරටෙක අමුනාගෙන කෑවේලු. තමන් පිළිකුල් කරන වැඩක් වෙනත් ක්‍රමයකින් කරවා ගන්නා අය සම්බන්ධයෙන් යෙදෙන පිරුළකි.
ඇතුන් යන පාරේ වටුවොත් යනවාලු:
බලවතුන් යන මග කුඩාවුන්ද යන බව මෙයින් අදහස් වේ.
ඈත තිබෙන කම්මලට වඩා ගෙදර තිබෙන කරගල හොඳලු:
ඈත තිබෙන ලොකු දෙයට වඩ ලඟ තිබෙන සුළු දෙය වූවද අගනා බව කිව් අයුරුය.
ඉණිමගේ දන ගා යන්නට බෑ:
කළ නොහැකි වැඩක් සම්බන්ධව යෙදෙන පිරුළකි.
උණ කැලය උණ කැලයෙන්ම විනාශ වේ:
උණ කැලයේ ලැව් ගිනි ඇති වූ විට මුලු කැලයමද ගිනි ගනී.තමන්ගේ විනාශය තමන්ගේම අතින් සිදුවන අවස්ථා සම්බන්ධව යෙදෙයි.
උඳු පියලි කොලය අවුවටත් එකයි වැස්සටත් එකයි:
උඳු පියලිය වූ කලී අව් වැසි දෙකෙහිම එතරම් මැලවීමක් හෝ එතරම් වැඩීමක් නැතිව පවත්නා පෑළෑටි වෙසෙසකි.මේ පිරුළෙන් දැක්වෙනුයේ දුක් සැප දෙකෙහිදීම නොවෙනස්ව විසීමේ අනුසස්ය.
ඌරන් ඉදිරියේ මුතු නොදමනු:
ඌර වනාහි කිසි චාරයක් නැති අශෝභන සත්ත්වයෙකි.ඌ ඉදිරියේ මුතු දැමිමෙන් වැඩක් නැත.ඌ එහි අගය නොදනී.යමක අගය නොදන්නාවුන්ට එය නොදිය යුතුය යනු මේ පිරුළෙන් අදහස් වේ.
එක පිට එක වදිනකොට මිරිස් ගලත් දුවනවාලු:
පිට පිට කරදර හිරිහැර වන විට කවරකු වුවත් පණ ගලවාගෙන පලා යන බැව් මෙයින් කියැවේ.
ඒ ගහේ කොස් කන්න මේ ගහේ පොල් ඕනෑ:
සමාන වන සම්බන්ධයක් ගැන කියවෙන පිරුළකි.
ඔන්චිල්ලාව ඔබ ගියොත් මොබත් ඒලු:
සකල ක්‍රියාවකම ප්‍රති විපාකයක් ඇති බව මේ පිරුළින් කියවේ.අපලයක් ඇති වුවහොත් සපලයකුත් ඇති විය යුතුය.
ඕනෑකමට කබරගොයාත් තලගොයාලු:
ඇතැම ආවාහ විවාහ වලදි නෑකම් පවා නොසලකා වුවමනාවේ තද කම නිසා කෙරෙන විවාහ මගුල් සම්බධයෙන් මෙය කියවේ.
