ශ්‍රී ලංකාවේ කිරි නිෂ්පාදනයේ සාම්ප්‍රදායක පසුබිම.
ශ්‍රී ලංකාවේ කිරි නිෂ්පාදනයේ සාම්ප්‍රදායක පසුබිම.
අතීත කාලයේ සිට මුදවන ලද කිරි සහ වෙනත් කිරි නිපැයුම් සඳහා කිරි නිෂ්පාදනය සම්බන්ධයෙන් රුහුණ කීර්තියක් උසුලනු ලැබීය. කෙසේ වෙතත් දශක දෙක තුනක කාල පරාසය තුළ දකුණේ එළ හා මී ගව ගොවීන් කෙරේ මහත් අහිතකර බලපෑම් ඇති කරමින් දකුණු ශ්‍රී ලංකාවේ කිරි නිෂ්පාදනය නොයෙකුත් හේතූන් නිසා පරිහානියට පත්වෙමින් පවතී. රටේ ගොවි ආර්ථිකයට ඉමහත් ලෙස දායක වන මිලියන හතරක් පමණ වන සුළු පරිමාණයේ ගොවීන් මත දකුණේ කිරි නිෂ්පාදනය රඳා පවතී. හම්බන්තොට දිස්ත්‍රික්කයේ සිදුකරන ලද සමීක්ෂවණයකින් හෙලිවූයේ සතුන් ඇති කිරීමේ යෙදී සිටින පවුල් අතරින් 76% ක් සතුව එළ ගවයන් ද 33% සතුව මී ගවයන්ද ඇත. එළ ගව පට්ටි අතරින් 90% ක පමණ එක් පට්ටියක සතුන් දහයකට අඩු ප්රීමාණයක් ඇති අතර 46% ක පමණ එක් පට්ටියක සතුන් පස්දෙනෙකුට වඩා අඩුවෙන් සිටී.දකුණු පළාතේ එළ හා මී ගවයන් ඉතා අඩු පහසුකම් යටතේ ඇති කරනු ලැබේ. දේශීය සතුන්ගෙන් ලැඛෙන කිරි ප්‍රමාණය ඉතා අඩු වීම හේතුවෙන් පියස්සක් සහිත කිරි මඩු සහ සෙසු අත්‍යවශය පහසුකම් සහිත ගව මඩු දැක ගැනීම ඉතා දුෂ්කරය. අඩු පහසුකම් ඇති නිදැල්ලේ තණ කැවීමේ ක්‍රමයට ේශීය සතුන් හැඩගැසී ඇති බැවින් අසල පිහිටි ලඳු කැලෑ, වනපෙත් සහ පුරන් බිම් තුළ සතුන් තණ කවමින් නිතරම පිරිවැය හා දුක්ගැහැට අවම කරගැනීමට ගොවීහු වෙර දරති. සාම්ප්‍රදායක කිරි කර්මාන්තයට අදාලව තණ කැවීමේ ක්‍රම කිහිපයක් ඇත.
- වනපෙත් තුළ තණ කැවීම
- ගම පදනම්ව තණ කැවීම
- වනපෙත් හා ගම පදනම්ව තණකැවීම
වන පෙත් තුළ තණ කැව විශාල එළ හා මී ගව පට්ටි හිමි ගොවීහු ජනාවාසයන්ගෙන් දූරස්ථව පිහිටි රක්ෂිදත වන භූමි තුළ සතුන් ඇති කරති. ස්වභාවික තෘණ භූමි තුළ සතුන් තණ කවන අතර උදෑසන කරි දෙනුන්ගෙන් දොවාගන්නා කිරි ගවගාල් වෙත පැමිණෙන කිරි එකතු කරන්නන්ට ගොවීන් විසින් අලෙවි කරනු ලබයි. ස්වභාවික වන රක්ෂිතයන් පිහිටා ඇති හම්බන්තොට දිස්ත්‍රික්කයේ උඩවලව, සූරිය වැව සහ කිරි ඉබ්බන් ආර වැනි ප්‍රදේශයන්හි මෙම ක්‍රමය පොදුවේ භාවිතා වේ. උඩවලව හා බුන්දල වන රක්ෂි තයන්හි විශාල එළ හා මී ගව පට්ටි තණ බුදිනු දැක ගත හැකිය.
ගම පදනම්ව තණ කැවීම' කුඩා හා මධ්‍යම පරිමාණයේ එළ හා මී ගව පට්ටි ඇති ගොවීහු තම සතුන් තණ කැවීම පිණිස වන රක්ෂිතයන් වෙත ගෙන නොයති. ගම තුළ පිහිටි මාර්ග දෙපස සහ ලඳූ කැලෑ හා පුරන් බිම් තුළ දිවා කාලයේ තණ කැවීමෙන් අනතුරුව රාත්‍රී කාලයේ සතුන් ගාල්කර තැබීමට තම නිවෙස් ආසන්නයේ ඉදිකළ ගව ගාල් මොවුන් සතුය.
වනපෙත් හා ගම පදනම්ව තණ කැවීම මධ්යතම හා විශාල ප්රණමාණයේ ගව පට්ටි හිමි ගොවීහු මෙම ක්ර මය භාවිතා කරති. කුඹුරු පුරන්ව ඇති කාලයට වී අවිශිෂ්ටයන් සහිත කුඹුරුවල සතුන් මුදාහරින අතර වගා කන්නය තුළ තණ කෑම සඳහා සතුන් අසල පිහිටි වන රක්ෂිතතයන් කරා ගෙන යති. හම්බන්තොට දිස්ත්රිඳක්කයේ සූරියවැව සහ කිරි ඉබ්බන්ආරප්ර්දේශයේ විවිධ පෝෂණ ක්‍රමයන්හි ව්‍යාප්තිය.
පෝෂණ ක්‍රමය එළ ගව පට්ටි ප්‍රතිශතය මී ගව පට්ටි ප්‍රතිශත
වනය පදනම් කරගත්. 0.0% 21.2%
ගම පදනම් කරගත්. 82.8% 21.2%
වනය හා ගම පදනම් කරගත්. 17.2% 51.6%
මූලාශ්‍රය-රුහුණු විශ්වවිද්‍යාලයේ ක්ෂේත්‍ර සමීක්ෂණ . එළ ගව පට්ටි ගම මත පදනම්ව තිබිම සමග සසදා බැලීමේදී වනය පදනම් කරගෙන තණ කැවිමේ ක්‍රමය මූලික වශයෙන් මී ගව පට්ටි සම්බන්ධයෙන් භාවිතාවන බව.
පශ්චාත් යටත් විජිත අවධිය තුළ ශ්‍රී ලංකාවේ කිරි හා කිරි ආශ්‍රීත නිෂ්පාදන පරිභෝජනය. සැම වසරක ම ජුනි 01 දින ජගත් කිරි දිනය වශයෙන් ප්‍රකාශයට පත් කර ඇත. ශ්‍රී ලංකාව ද කිරි නිෂ්පාදනයේ ස්‌වයංපෝෂිතභාවය කරා ගමන් කරන මේ අවස්‌ථාවේ දී ශ්‍රී ලංකාවේ කිරි නිෂ්පාදනය හා පරිභෝජනය පිළිබඳව කරුණු විමසා බැලීම කාලෝචිත වේ.
කිරි පරිපූර්ණ ආහාරයක්‌ ලෙස පෝෂණවේදීන් විසින් සලකනු ලබයි. එය ශරීරයට අවශ්‍ය කරන්නා වූ සියලු ම පාහේ පෝෂ්‍ය පදාර්ථයන් ගෙන් යුක්‌ත ආහාරයක්‌ බවට සනාථ කොට ඇත. තවත් අතකින් බලන කල කිරි වනාහි ආහාරය සඳහා ම නිෂ්පාදනය වන්නා වූ ද්‍රව්‍යයක්‌ ලෙස හැඳින්විය හැකි ය. වඩාත් නිවැරැදිව පවසන්නේ නම් ආහාරයක්‌ ලෙස භාවිත කිරීම සඳහා ම නිපදවෙන එක ම ද්‍රව්‍යය කිරි බව ද පැවසිය හැකි ය. මේ ගැන තවදුරටත් පැහැදිලි කළ හැක්‌කේ මේ අයුරිනි. අප ආහාරයට ගන්නා බත් නිපදවනුයේ වීවලිනි. වී හටගන්නේ ගොයම් ශාකය ප්‍රචලිත වීම සඳහා ය. ඇට, කරල්, වැනි එළවළු හා ධාන්‍ය වර්ග නිපදවනුයේ ද තම ශාක වර්ගයන් ප්‍රචාරණය සඳහා ය. පලා වර්ග නිපදවනුයේ ප්‍රභාසංශ්ලේෂණය ම`ගින් එම ශාකවලට අවශ්‍ය ආහාර ද්‍රව්‍ය නිපදවීම සඳහා ය. ඒ කිසිවක්‌ බිහි වී ඇත්තේ ආහාරය අරමුණු කොටගෙන නො වන බව මින් පැහැදිලි ය. ආහාරයක්‌ ලෙස කිරිවල උචිතභාවය මෙයින් පැහැදිලි වේ.
කිරි හා කිරි ආශ්‍රිත නිෂ්පාදන පරිභෝජනය මිනිස්‌ ශිෂ්ටාචාරය හා සමාන්තරව දිවෙන්නකි. මිසරයේ ඇති නටබුන් අධ්‍යයනයේ දී සොයාගෙන ඇති කරුණුවලට අනුව මීට වසර 5000කට පෙර යුගයේ දී පවා මිනිසා කිරි පානයට පෙලඹී ඇත. ආදී යුගයේ දී එඬේරුන් කිරි පානය කළ අතර, ක්‍රමයෙන් කිරිවලින් විවිධ ආහාර වර්ග සකසමින් ඒවා කල් තබා ගැනීමට ද මිනිසා පෙලඹී ඇත.
විවිධ රටවල මිනිස්‌සු විවිධ ප්‍රමාණයන් ගෙන් කිරි ආහාරයට ගනිති. යුරෝපීය රටවල මිනිසුන් ගේ ඒකපුද්ගල වාර්ෂික කිරි පරිභෝජනය ලීටර 300ක් පමණ වේ. ඉන්දියාවේ ඒකපුද්ගල වාර්ෂික කිරි පරිභෝජනය ලීටර 70ක් වන නමුදු, ශ්‍රී ලංකාවේ එය ලීටර් 48කි. වෛද්‍ය නිර්දේශයන් අනුව පුද්ග ලයකු දිනකට කිරි මිලි ලීටර් 200ක් පරිභෝජනය කළ යුතු ය. එනයින් බලන කල ශ්‍රී ලංකාවේ ඒකපුද්ගල වාර්ෂික කිරි පරිභෝජනය ලීටර් 72ක් විය යුතු ය. ශ්‍රී ලංකිකයන් දැනට පරිභෝජනය කරනුයේ කොතරම් අඩු කිරි ප්‍රමාණයක්‌ දැයි මෙයින් පැහැදිලි වේ.
ශ්‍රි ලංකාවේ දේශීය කිරි නිෂ්පාදනය සුළු වශයෙන් ඉහළ ගිය තත්ත්වයක්‌ මීට කලකට පෙර දක්‌නට තිබුණ ද, එහි ශීඝ්‍ර වර්ධනයක්‌ මෑත යුගයේ දක්‌නට ඇත. වසර 2000 දී ශ්‍රී ලංකාවේ දේශීය කිරි නිෂ්පාදනය ලීටර් මිලියන 181ක් වූ අතර, 2005 වසරේ දී එය ලීටර් මිලියන 192.7ක් විය. පසුගිය වසරේ එනම්, 2012 වසරේ දී අපගේ වාර්ෂික කිරි නිෂ්පාදනය ලීටර් මිලියන 299ක් විය. එය දැනට ශ්‍රී ලංකාවේ වාර්තා වී ඇති ඉහළ ම නිෂ්පාදනය වේ.
කිරි නිෂ්පාදනය ඉහළ නැංවීම සඳහා වර්තමාන රජය ඉහළ ප්‍රමුඛත්වයක්‌ ලබා දී ඇත. ඒ අනුව විවිධ අවස්‌ථාවල දී නිෂ්පාදකයා ගෙන් කිරි මිල දී ගන්නා මිල ඉහළ දැමීමෙන් නිෂ්පාදකයාට වාසිදායක තත්ත්වයක්‌ උදා කර දීම නිෂ්පාදනයේ මේ වර්ධනයට සෘජු ව ම බලපා ඇති බව පෙනේ.
කිරි නිෂ්පාදනයෙන් අප රට ස්‌වයංපෝෂිත කිරීම සඳහා පශු සම්පත් හා ග්‍රාමීය ප්‍රජා සංවර්ධන අමාත්‍යංශයේ මූලිකත්වයෙන් විවිධ පියවර ගෙන ඇත.
දේශීය ගවයින් ගේ කිරි නිෂ්පාදනය ඉතා පහළ මට්‌ටමක පවතී. එබැවින් කිරි නිෂ්පාදනය ඉහළ නැංවීම සඳහා හොඳ වර්ගයේ එනම්, අධික නිෂ්පාදනයක්‌ සහිත ගවයන් බෝ කළ යුතු ව ඇත. මෑතක දී රජය විසින් කිරි ගවයන් 2000ක් ආනයනය කරන ලද්දේ මෙලෙස නිෂ්පාදනය වැඩි ගව ගහණයක්‌ බෝ කර ගැනීමේ අරමුණ ඉටුකර ගැනීම සඳහා ය.
කාලයක්‌ තිස්‌සේ ක්‍රියාත්මක කරන ලද කෘත්‍රිම සිංචන සේවයෙන් දැනට ආවරණය වනුයේ මෙරට ගව ගහණයෙන් 10%ක පමණ ප්‍රමාණයක්‌ බැවින් කෘත්‍රිම සිංචන සේවය ශක්‌තිමත් කොට වැඩි සතුන් සංඛ්‍යාවක්‌ ආවරණය කිරීමට ඉක්‌මන් පියවර ගත යුතු ව ඇත. කෘත්‍රිම සිංචන සේවය වඩාත් ආකර්ෂණීය කිරීම සඳහා ලිංග නිර්ණය කරන ලද ශුක්‍ර භාවිත කිරීම මේ වර්ෂයේ දී හඳුන්වා දෙන ලදී. නුදුරු අනාගතයේ දී එහි ප්‍රතිඵල දක්‌නට ලැබීමත් සමග කෘත්‍රිම සිංචන සේවය සඳහා වැඩි ඉල්ලුමක්‌ අපේක්‍ෂිත ය.
කිරි ගවයන්ට අවශ්‍ය නිසි පෝෂණය ලබා දීම නිෂ්පාදනය වැඩි කිරීම සඳහා දෙවනුව ගැනෙන වැදගත් ම කාර්යයයි. මේ සඳහා රජය නව තෘණ ප්‍රභේද හඳුන්වා දී ඇත. ඒවායින් වැඩි පෝෂණයක්‌ සහිත තෘණ වැඩි ප්‍රමාණයක්‌ ලබාගත හැකි ය. තව ද ගවයන් ගේ පෝෂණය සඳහා යොදා ගන්නා ඉරිඟු වර්ග කොට, ඒවායින් සයිලේඡ් නිපදවා ගව ආහාර වශයෙන් භාවිත කිරීම දැනටමත් රජයේ ගොවිපළ කිහිපයක ක්‍රියාත්මක කෙරේ. ඉදිරියේ දී මේ ක්‍රමය ගොවීන් වෙත හඳුන්වා දීමට අපේක්‍ෂිත ය.
තෘණ වගාව ප්‍රචලිත කිරීම සඳහා සැම වසරක ම ඔක්‌තෝබර් 30 වැනි දින "තෘණ වගා ප්‍රවර්ධන දිනය" වශයෙන් සලකා කටයුතු කිරීමට මේ අමාත්‍යංශය පියවර ගෙන ඇත. එමෙන් ම වී වගා කිරීම ලාභදායී නො වන කුඹුරුවල තණකොළ වගා කිරීම සඳහා අවශ්‍ය ආධාර උපකාර සැපයීමට ද කටයුතු සලසමින් පවතී. මේ සඳහා තිබූ නීතිමය බාධක දැනටමත් ම`ගහරවා ඇත.
ශ්‍රී ලංකාවේ දිනකට නිෂ්පාදනය වන්නා වූ කිරි ලීටර මිලියන 01ක ප්‍රමාණයෙන් 50%ක ප්‍රමාණයක්‌ ජාතික මට්‌ටමේ කිරි එකතු කිරීම් ජාල හරහා ප්‍රධාන කිරි කර්මාන්ත ශාලාවලට එක්‌රැස්‌ වන බව සමීක්ෂණ තොරතුරුවලින් පෙනේ. ඉතිරි 50% ප්‍රමාණය දියර කිරි, ප්‍රාදේශීයව නිෂ්පාදනය වන්නා වූ යෝගට්‌, මුදවාපු කිරි යනාදි වශයෙන් පරිභෝජනයට ගැනේ. ජාතික මට්‌ටමේ කිරි කර්මාන්ත ශාලාවලට එකතු වන ප්‍රමාණය සැකසීමට යොදා ගැනේ.
දැනට ශ්‍රී ලංකාව තුළ කිරි එකතු කිරීම, ශීත කිරීම, ප්‍රවාහනය හා සැකසීම සඳහා ඇති පහසුකම් කිරි නිෂ්පාදනය වැඩි වීමත් සමග ම නුදුරු අනාගතයේ දී ම වැඩි විය යුතු බව අප ගේ අදහසයි. ඒ අනුව කිරි ශීතකරණ මධ්‍යස්‌ථාන සඳහා අවශ්‍ය අමතර ශීතකරණ ටැංකි යනාදිය ස්‌ථාපනය කිරීමට පියවර ගෙන ඇත.
වල ධාරිතාව දැනට නිපදවන්නා වූ කිරි ප්‍රමාණය සැකසීම සඳහා ප්‍රමාණවත් වුව ද, ඉදිරි වසර කිහිපය තුළ අපේක්‍ෂිත වර්ධනයක්‌ සමග සලකා බලන කල ප්‍රමාණවත් නො වනු ඇත. විශේෂයෙන් රාජ්‍ය ආයතනයක්‌ වන මිල්කෝ ආයතනයේ කිරි නිෂ්පාදන ධාරිතාව වැඩි කිරීම කෙරෙහි අවධානය යොමු කර ඇත. දැනට එම සමාගම සතු කර්මාන්තශාලාවල ඇති යන්ත්‍රසූත්‍ර බොහොමයක්‌ වසර 50ක් පමණ පැරැණි ඒවා බැවින්, අපේක්‍ෂිත පරිදි කාර්යක්‍ෂමතාවක්‌ අපේක්‍ෂා කළ නොහැකි ය. එම සමාගම සතු පොළොන්නරුව, අඹේවෙල හා දිගන කර්මාන්ත ශාලා නවීකරණය කොට ධාරිතාව වැඩි කිරීමට දැනටමත් පියවර ගෙන ඇත, ඉදිරි සති කිහිපය තුළ එම වැඩිදියුණු කිරීම් ආරම්භ වනු ඇත. කොළඹ පිහිටි කර්මාන්ත ශාලාව වඩාත් සුදුසු ප්‍රදේශයකට ගෙන ගොස්‌ වැඩි පහසුකම් හා නවීන යන්ත්‍රසූත්‍ර සමග පවත්වාගෙන යැමට ද සැලසුම් කොට ඇත.
පෞද්ගලික අංශයේ කර්මාන්ත ශාලා ද විවිධ පියවර ගනිමින් තම සැකසීමේ ධාරිතාව වැඩි කර ගැනීමට කටයුතු කරමින් සිටිනු දක්‌නට ලැබීම සතුටට කරුණකි. මෙවැනි වැඩිදියුණු කිරීම් සඳහා අවශ්‍ය වන යන්ත්‍රොaපකරණ ආනයනය කිරීමේ දී තීරුබදු සහන සැලසීමට ද රජය පියවර ගෙන ඇත.
ප්‍රධාන පෙළේ කිරි නිෂ්පාදකයන් විසින් කිරි ගොවීන් සඳහා වසරකට ගෙවනු ලැබ ඇති මුදල රුපියල් මිලියන 10,000ක් ඉක්‌මවා ගොස්‌ ඇත.
ප්‍රාදේශීයව නිපදවන කිරි ප්‍රාදේශීයව සකස්‌ කොට අලෙවි කිරීම තුළින් ප්‍රවාහනයට යන වියදම් හා කාලය ඉතිරි කරගත හැකි බැවින් ප්‍රාදේශීය මට්‌ටමින් මධ්‍යම පරිමාණ කිරි සැකසුම්හල් පිහිටුවීමේ අවශ්‍යතාව හඳුනාගෙන ඇත. මෙය පෞද්ගලික අංශය හරහා ක්‍රියාත්මක කිරීම වඩා උචිත වනු ඇත. එවැනි කර්මාන්ත සඳහා අවශ්‍ය යන්ත්‍රොaපකරණවල වියදම්වලින් කොටසක්‌ රජය ම`ගින් දැරීමට අවශ්‍ය කටයුතු සම්පාදනය කිරීමට මේ අමාත්‍යංශය දැනටමත් පියවර ගෙන ඇත. එම`ගින් මධ්‍යම පරිමාණ මට්‌ටමින් කිරි සැකසීමේ කර්මාන්තය සඳහා පෞද්ගලික අංශය නැඹුරු වනු ඇත.
ශ්‍රී ලංකාවේ දේශීය කිරි නිෂ්පාදනය වැඩි වීමත් සමග ම කිරිපිටි ආනයනයේ අඩු වීමක්‌ අපේක්‍ෂා කෙරේ. කිරිපිටි හා කිරි ආශ්‍රිත නිෂ්පාදන ආනයනය සඳහා අප විසින් වසරකට වැය කරනු ලබන මුදල රුපියල් බිලියන 30කට ආසන්න වේ. දේශීය කිරි නිෂ්පාදනය වැඩි දියුණු කිරීමේ මූලික අරමුණ වන්නේ විදේශයට ඇදී යන මේ මුදල් සම්භාරය දේශීය කිරි ගොවියා අතට පත් කිරීමත්, එම`ගින් ආහාර සුරක්‍ෂිතභාවය ළඟා කර ගැනීමත් ය. පසුගිය කාලයේ කිරිපිටි ආනයනය පිළිබඳ සංඛ්‍යාලේඛන පරීක්‍ෂා කිරීමේ දී දක්‌නට ඇත්තේ 2011 වසර දක්‌වා දේශීය කිරි නිෂ්පාදනය වැඩි වෙමන් පැවතිය ද කිරිපිටි ආනයනය අඩු වී නොමැති බව ය. එහෙත් 2012 වර්ෂයේ දී ආනයනය කරන ලද කිරිපිටි ප්‍රමාණය 2011 වර්ෂයේ ආනයනය කළ ප්‍රමාණයට වඩා මෙටි්‍රක්‌ ටොන් 6000කින් අඩු වීම සුබ ලකුණක්‌ සහ සතුටට කරුණකි.
දේශීය කිරි නිෂ්පාදනයෙන් 95%කට ආසන්න ප්‍රමාණයක්‌ සපයනු ලබන්නේ දිවයින පුරා විසිරී සිටින 220,000ක් පමණ වූ කුඩා පරිමාණ කිරි නිෂ්පාදකයන් විසිනි. ඔවුනට අවශ්‍ය ප්‍රධාන යෙදවුම් වන්නේ ආහාරයෙන් උසස්‌ හොඳ වර්ගවල ගවයන්, දියුණු කරන ලද හොඳ වර්ගවල තණකොළ ඇතුළු ගව ආහාර, කාර්යක්‍ෂම පශු වෛද්‍ය හා උපදේශන සේවා හා අලෙවි පහසුකම් යනාදියයි. දැනට ක්‍රියාත්මක වැඩපිළිවෙළ තුළින් මේ සියලු ම කාරණා වැඩිදියුණු කිරීම සඳහා පියවර ගෙන ඇත. එමෙන් ම දැනට කිරි සඳහා නිෂ්පාදකයන්ට ගෙවන ලීටරයට රු 50ක් වන මුදල ද ආකර්ෂණීය කරවා ගැනීමටත්, එම`ගින් අපේක්‍ෂිත පරිදි දේශීය කිරි නිෂ්පාදනය ඉහළ නංවා, ස්‌වයංපෝෂිත තත්ත්වය උදා කර ගැනීමටත් හැකි වනු ඇත.
කිරි පරිභෝජනය පිළිබඳ කරුණු විමසා බැලීමේ දී පෙනී යන්නේ ඉන්දියාව වැනි රටවලට සාපේක්‍ෂව ශ්‍රි ලාංකික ජනතාව දියර කිරි පරිභෝජනයට එතරම් නැඹුරු වීමක්‌ නො දක්‌වන බවයි. විශේෂයෙන් ම තරුණ පරපුර අතර දියර කිරි පරිභෝජනය එතරම් ප්‍රචලිත නැත. කිරිවලින් සැකසූ ආහාර හෝ කිරිපිටි ලෙස කිරි පරිභෝජනය කිරීම ආර්ථික වශයෙන් මෙන්ම පෝෂණීය වශයෙන් ද අවාසි සහගත ය. එබැවින් දියර කිරි පරිභෝජනයට ජනතාව නැඹුරු කරවීම අවශ්‍ය ම කටයුත්තක්‌ සේ මතු ව ඇත. එහෙත් අවාසනාවකට මෙන් මිනිසුන් ගේ ආහාර රටාවන් වෙනස්‌ කිරීම කල්ගත වන ක්‍රියාවලියක්‌ බැවින් මෙම`ගින් ක්‍ෂණික ප්‍රතිඵල අපේක්‍ෂා කළ නොහැකි ය.
පාරිභෝගිකයනට පහසුවෙන් මිල දී ගත හැකි පරිදි දියර කිරි අලෙවිය ව්‍යාප්ත කිරීමට විවිධ පියවර වරින්වර ගෙන ඇති නමුදු, එය සාර්ථක මට්‌ටමකට ළඟා වී නැත. දියර කිරි අලෙවිය ව්‍යවසායක මට්‌ටමින් පවත්වාගෙන යැම සඳහා හොඳ ඉල්ලුමක්‌ ඒ සඳහා තිබිය යුතු ය. එම ඉල්ලුම ගොඩනැෙ`ගන තෙක්‌ අලෙවි පහසුකම් සැලසීම වියදම් සහිත කරුණකි. කෙසේ වුව ද ඉල්ලුමේ ක්‍රමික වර්ධනයක්‌ සමග දියර කිරි මිල දී ගැනීමේ පහසුකම් සැලසීමට අඛණ්ඩව කටයුතු කෙරෙනු ඇත
කිරි පරිභෝජනය වැඩි කිරීමත්, විශේෂයෙන් ම දියර කිරි පරිභෝජනයට නැඹුරු වීමත් අප රටේ සමස්‌ත ජනතාව ගෙන් අපේක්‍ෂා කරන දෙයකි. එය එලෙසින් ම සිදු වන්නේ නම් කිරිවලින් ස්‌වයංපෝෂී තත්ත්වයක්‌ කරා මේ කර්මාන්තය ගෙන යැම වඩාත් පහසු වනු ඇත. විවිධ පැණි බීම වර්ග සඳහා වැය කරන මුදල් කිරි පානය කිරීම සඳහා වැය කරන්නේ නම් එය ශරීරයටත්, මුදල් පසුම්බියටත් හිතකර බව අවධාරණය කළ යුතු කරුණකි. එමෙන් ම වසරක්‌ පාසා විදේශ කිරි ගොවියා හා විදේශීය වෙළෙන්දන් වෙත ඇදී යන රුපියල් බිලියන 30කට ආසන්න වන මුදල අප රටේ රඳවාගෙන දේශීය කිරි නිෂ්පාදකයා වෙත ලබා දීමට රජය ප්‍රමුඛ අදාළ රාජ්‍ය ආයතන ගන්නා උත්සාහයට රුකුලක්‌ වනු ඇත.
මුලාශ්‍ර:විදුසර පුවත්පත-2013/06/05- ශ්‍රී ලංකාවේ කිරි නිෂ්පාදනය හා පරිභෝජනය- කේ. එම්. ටී. කෑදරගම ලේකම්, පශු සම්පත් හා ග්‍රාමීය ප්‍රජා සංවර්ධන අමාත්‍යංශය
