මේ ඉන්නේ අපට උදවු කරන අයයි. ඒ අය අපට කරන උදවු මොනවා දැයි අපි කතා කරමු.

දිනපතා දෙවි පියා අපට මේ වගේ අයගෙන් උදවු
ලබා දෙනවා.
අපි ඒ උදවු අගය කරන්න ඕනෑ.
ඔවුන් මතක් කර දෙවි පියාගෙන් ආසිරි පතන්න ඕනෑ.
ඔවුනට සිනහවෙන්, කරුණාවන්ත වචනයෙන්
කළගුණ පෙන්වන්න ඕනෑ.

මේ අයට වගේ දෙවි පියා අපටත් අත් පා දී තිබෙනවා.
එම අත් සහ පාදවලින් දවස පුරා අප වැඩ කරනවා.
අත්වලින් දෙවිදු වඳිනවා.
අනෙක් අයට උදවු කරනවා.
ඒ වගේ හොඳ වැඩ කරන විට අපට සතුට ලැබෙනවා.

ඒත් සමහරු අන් අයට උදවු කරන්න කැමති නැහැ.
තමා කැමති අයට විතරක් උදවු කරන අයත් ඉන්නවා.
සමහරු වැඩ කරන්න කම්මැලියි.
අනුන්ට හිංසා කරනවා.
දෙවි පියා එඒ අය ගැන දුක් වෙනවා.
ඒ නිසා දෙවි පියාණන් වහන්සේ මට දී ඇති අත්
පාවලින් මම හොඳ වැඩ කරමි.

සිසිල් සුළං රැලි පාවෙන්නේ
සතුටු සිනාවෙන් - මුව සරසාලා
සුහද කතාවෙන් - සිත් සනසාලා
දවස හොඳින් ගත කරන්න
සැමට ම සුබ සෙත සදන්න
අපට සරණ වන්න දෙවිඳුනේ//

සැමට දයාවෙන් - අතහිත දීලා
මෙත් කරුණාවෙන් - සැනසෙන ලීලා
නිරතුරු අප කල් ගෙවන්න
රට දියුණුව ඇති කරන්න
අපට සරණ වන්න දෙවිඳුනේ//