(නික්මයාම 2 : 1-10)

සැම හෙබ්‍රෙව් පිරිමි දරුවකු ම නයිල් ගඟට විසි කිරීමට නපුරු රජෙක් අණ කළා. අම්මා කෙනෙක් තම පුතා මාස තුනක් ගෙදර සඟවා ගෙන සිටියා. තව දුරටත් සඟවා තබා ගැනීමට නොහැකි වූ විට පන් පෙට්ටියක් ගෙන කීල් හා මැලියම් ගෑවා. බබා එම පෙට්ටියේ තැබුවා. ඉන් පසු එම පෙට්ටිය ගං ඉවුරේ බට ගස් අතර සැඟවූවා. බබාට කුමක් වේ දැයි දැන ගැනීමට බබාගේ අක්කා ඈතින් බලා සිටියා.

ගෙඟන් දිය නෑමට රජුගේ දූ කුමරිය සේවිකාවන් ද සමග පැමිණියා. පන් පෙට්ටිය දුටු රජ කුමරිය සේවිකාවක් යවා පෙට්ටිය ගෙන්වා ඇර බැලූවා. එහි කුඩා දරුවා අඬමින් සිටියා. "මේ හෙබ්‍රෙව් ජාතික දරුවෙකි," යි කුමරිය කිවුවා.

දරුවාගේ අක්කා දුව විත් "බබාට කිරි දෙන්නට කිරි මවක් ගෙනෙන්න ද?" කියා කුමරියගෙන් ඇසුවා. රජ කුමරිය ඊට කැමති වූ නිසා අක්කා, දරුවාගේ ම අම්මා කැඳවාගෙන ආවා. රජ කුමරිය දරුවාට කිරි දීමට අම්මාට භාර කළා.

දරුවා වැඩුණු පසු, රජ කුමරිය වෙත අම්මා දරුවා ගෙනාවා. දරුවා රජ කුමරිය සමග පුතෙකු සේ වැඩුණා. දරුවා කුඩා කල වතුරෙන් ගොඩ ගත් නිසා ඔහුට මෝසෙස් යයි නම තැබුවා.

දෙවියන් වහන්සේ රජ කුමරියක මගින් මෝසෙස්ට දේව රැකවරණය ලබා දුන් සේක.