"මනුකගේ උපන් දිනය ලබන සිකුරාදා. මනුකට තෑගි දෙන්නේ මොනවා ද?" අම්මා ඇහුවා.

"සෙල්ලම් බඩුවක් තෑගි දෙමු." මල්ලි කිවුවා.

"නෑ.. නෑ.. මනුක දැන් ටිකක් ලොකුයි. අකුරු කියවන්නත් දන්නවා. ඒ නිසා කතන්දර පොත් තෑගි දෙමු. එයා කතන්දර පොත් කියවන්න හරි ආසයි." අයියා කිවුවා.

"ඒක හොඳ අදහස. සෙල්ලම් කරනවා වගේ ම පොත් කියවන්නත් පුරුදු වෙන්න ඕනෑ. අපි කතන්දර පොත් තෑගි දෙමු." තාත්තා කිවුවා.

කතන්දර පොත් ගන්න අපි පොත් කඩේට ගියා.

හත්පණ, මඟුල් කෑම, හීන්සැරය කතන්දර පොත් ගොඩයි.

"හත්පණ පොතේ මිල කීය ද?"

"රුපියල් අසූ පහයි." කඩේ මාමා කිවුවා.

"මඟුල් කෑම පොත රුපියල් හැත්තෑවයි." අයියා පොතේ මිල බලලා කිවුවා.

"හීන්සැරය රුපියල් අනූවයි."

"මට ඕන හීන්සැරය පොතක්" අයියා කිවුවා.

අපි පොත් කීපයක් ගත්තා. කඩේ මාමා බිල් පතක් දුන්නා.

මනුකගේ උපන් දිනය ආවා. කතන්දර පොත් තෑගි ලැබුණා. මනුක හැම දෙනාට ම ස්තුති කළා. ලැබුණු කතන්දර පොත් ආසාවෙන් කියෙවුවා. මනුකට හරි ම සතුටුයි.