දවසක් ගෝණෙක් වතුර බොන්න ගඟක් ළඟට ආවා. මේ ගෝණා තමන්ගේ රූපය කවදාවත් දැකලා තිබුණේ නෑ. එදා ගෝණා තමාගේ රූපය වතුරේ දැක්කා. මගේ අං තට්ටුව හරි ම ලස්සනයි, ශක්තිමත්. ආඩම්බරයෙන් හිතුවා. ඒත් කකුල් නම් හරි ම හීනියි, හරි ම කැතයි කියලා ගෝණා දුක් වුණා.

කෑම හොයා ගෙන යන සිංහයෙක් ගඟ ළඟට ආවා. ගෝණා වතුර බොනවා දැක්කා. හෙමින් හෙමින් ගෝණාට ළං වුණා. ගෝණා හොඳට ම බය වුණා.

ගෝණා පණ බේරා ගන්න හයියෙන් දිවුවා. සිංහයා ගෝණා පස්සෙන් එළෙවුවා. එකපාරට ම ගෝණාගේ ලස්සන අං තට්ටුව අත්තක පැටලූණා. ගෝණාට දුවන්න බැරි වුණා.

සිංහයා ළඟ ළඟ ම එනවා ගෝණා දැක්කා. ගෝණා දඟලන්න පටන් ගත්තා . පැටලූණු අං තට්ටුව, එක කකුලක උදව්වෙන් බේරා ගත්තා. වේගයෙන් දුවලා සිංහයාගෙන් බේරුණා.

"අං තට්ටුව ලස්සනයි. ඒත් මගේ ජීවිතය බේරා දුන්නේ මගේ කකුල්." හති අරිමින් ගෝණා හිතුවා.