යාළුවෝ වැව් ඉවුරට ආවා. "අද අපි මොනව ද කරන්නේ?" ජානක ඇසුවා. "සංගීත පන්තියක් දමමු." පවනි කිවුවා. හැමෝම කැමති වුණා. "මම ගුරුතුමී වෙන්නම්." මලී අක්කා කිවුවා.

"හෝ ගාලා රැලි එනවා. වැව අද මුහුද වගේ." කසුන් කිවුවා. "මුහුදෙ නම් ලොකු නැව් යනවා නේද?" පවනි නංගි ඇහුවා. "ඔව්, ඔව්," කවුරුත් හයියෙන් කිවුවා. "මට ආසයි නැවක යන්න." කෝසල කිවුවා. "ළමයි, දැන් අපි රවුමට වාඩි වෙමු. මුහුද ගැන සින්දුවක් කියමු."

මුහුද ලස්සනයි
මුහුද හරි ලොකුයි
හො හෝ හො හෝ හො හෝ හෝව
නතර වෙන්නෙ නෑ
රැල්ල ඇදෙනවා
වැල්ලෙ වැදෙනවා
සමන් මොට්ටු වගේ වතුර බිංදු ඉහෙනවා

"මම දන්නවා සරුංගලය ගැන සින්දුවක්. කියන්න ද?" කෝසල ඇහුවා.

සුළං සැරේ වංගු හැරී
දුර අහසේ දාංගලේ
මහන්සියට ගහ මුදුනේ
හැංගුණා ද සරුංගලේ

"හරිම ලස්සනයි. අපි හැමෝම තාලෙට කියමු."

"හැන්දෑ වෙන්න ළඟයි. අපි දැන් ගෙදර යමු." 

"හෙට අපි සරුංගල් යවමු ද?" පවනි ඇහුවා. හැමෝම කැමති වුණා. යාළුවෝ සින්දු කිය කියා, කෝච්චියක් වගේ පේළියට ගෙදර ගියා.