පොතේ ගුරු : බොහෝ කාලයකට පෙර ආබ්‍රහම් නම් මිනිසෙක් විය. ඔහු දෙවියන් වහන්සේට කීකරු ව විසුවේ ය. දිනක් දෙවියන් වහන්සේ ඔහුට මෙසේ ඇමතු සේක.

දෙවියන් වහන්සේ : නුඹේ මව්බිම ද නුඹේ නැදෑයින් ද නුඹේ පියාගේ ගෘහය ද අතහැර දමා මා පෙන්වන දේශයට යන්න. මම නුඹ මඟින් විශාල ජාතියක් ගොඩනගන්නෙමි. මම නුඹට ආශීර්වාද කරන්නෙමි.

ආබ්‍රහම් : එසේය පියාණෙනි, ඔබ වහන්සේ පෙන්වන දේශයට යාමට මා සූදානම්. (ඔහු පිටත්ව යයි)

පොතේ ගුරු : කලකට පසු දෙවි පියාණන් වහන්සේ ආබ්‍රහම්ට දර්ශනය වී මෙසේ ද ප්‍රකාශ කළ සේක.

දෙවියන් වහන්සේ : ආබ්‍රහම් අහස දෙස බලා හැකිනම් ඔය තාරකා ගණන් කරන්න. නුඹේ දරු පරපුර ද එසේ ම වන්නේ ය.

ආබ්‍රහම් : (සතුටින්) ඔබ වහන්සේගේ වචනය මම පිළිගනිමි. මගේ මහලු වයසේ දී ඔබ වහන්සේ මට දුන් පුත්‍රයාට ඊසාක් යන නම තබමි.

පොතේ ගුරු : නැවතත් දෙවියන් වහන්සේ ආබ්‍රහම් පරීක්ෂා කරමින් ඊසාක් පූජා කරන ලෙස ප්‍රකාශ කළ සේක. එවිට ඔහු උදෑසනින්ම අවදි වී තම එකම පුත්‍රයා පූජා කරනු පිණිස රැගෙන, මොරියා දේශයට ගියේ ය.

ඊසාක් : සාන්ත වූ මේ පරිසරයේ සිසිල දැනේ කඳුකරයේ //

          දර සහ ගින්දර දෙකම තිබේ. බිලි සතෙකු අප නැතේ පියතුමනි, බිලි සතෙක් කෝ? (ගයමින් යයි)

ආබ්‍රහම් : පුතණුවනේ, පුතණුවනේ අපට අවැසි බිලි සතෙකු දෙවිඳුන් දෙනු ඇතේ. (ගයමින් පිළිතුරු දෙයි)

පොතේ ගුරු : තම එකම දරුවා පූජා කරන්නට තරම් සැරසුණු ආබ්‍රහම්ගේ විශ්වාසය දුටු දෙවියන් වහන්සේ දේව දූතයෙකු මගින් එය නතර කළ සේක. පසු කළෙක ඊසාක්ට ඒසව් හා ජාකොබ් නම් පුතුන් දෙදෙනෙකු විය. දිනක් ජාකොබ් හට දෙවියන් වහන්සේ සිහිනෙන් දර්ශනය වූ සේක.

ජාකොබ් : අරුම පුදුම සිහිනයක්නේ මම දුටුවේ. පොළොවේ තබන ලද ඉනි මඟකි. එහි මුදුන අහස දක්වා විය. දේව දූතයෝ එහි නගිමින් බසිමින් සිටියෝ ය. දෙවියන් වහන්සේ ආබ්‍රහම්ට දුන් පොරොන්දු නැවතත් මට මතක් කළ සේක.

පොතේ ගුරු : මෙසේ දෙවියන් වහන්සේ ආදි පියවරුන් මගින් ජනතාවක් තෝරා පත් කරගෙන ඔවුන්ට දුන් පොරොන්දු ඉටු කළ සේක.

ආදර දෙවි පියාණෙනි, අපේ ආදි පිය ආබ්‍රහම්ට දුන් ප්‍රබල විශ්වාසය
නමැති දීමනාව නිරතුරු ව ම අපට ද ලබා දුන මැනව.
ආමෙන්.