අමිලා : සිස්ටර්, චතාරික කාලය කියන්නේ මොකක් ද?

සිස්ටර් : චතාරික කාලය කියන්නේ ජේසුස් ස්වාමීන් වහන්සේගේ දුක් විඳීම, මරණය සහ උත්ථානය සිහි කරන දින 40ක කාලයයි.

ඇන්ටන් : සිස්ටර්, චතාරික කාලය පටන් ගන්නේ කවදා ද?

සිස්ටර් : අළු බදාදා තමයි චතාරික කාලය ආරම්භ වෙන්නේ.

ඇන්ටන් : සිස්ටර්, චතාරික කාලයේ අපි එක්වරු ශීලය රකිනවා, චතාරික වන්දනා ගමන් යනවා. නරක වචන කියන්නේ නැහැ. දබර කරන්නේ නැහැ. බොරු කියන්නේ නැහැ. පාද නමස්කාර කරනවා.

සමාරා : අපේ අම්මා කියලා දුන්නා චතාරික කාලයේ සිකුරාදා පාද නමස්කාරයේ යන විට ඉතා ගෞරවයෙන්, භක්තියෙන් එයට සහභාගී වෙන්න ඕනෑ කියලා.

සිස්ටර් : ඔව්, දුවේ පුතේ, ජේසුස් වහන්සේ මහ බර කුරුසයක් කර තබාගෙන වැටී වැටී ඒ ගමන ගියේ අපි හැමෝට ම ගොඩක් ආදරේ නිසයි.

ළමයි : සිස්ටර්, අපි ජේසුස් වහන්සේට ගොඩක් ආදරෙයි. ඉතිං අපටත් පාද නමස්කාරය කරන්න කියලා දෙන්න.

ගීතිකාව

දේව කන්‍යා නිමල මවුනි, ඔබගේ කුමරා දැරුව වනවල් මා හදයේ සන් කළ මැනව.

පාද නමස්කාරයේ යන විට පහත සඳහන් යැදුම් කියවන්න.

ස්ථානයක් ආරම්භ කරන විට

• ක්‍රිස්තුනි, ඔබට නමස්කාර කොට ස්තුති ප්‍රශංසා කරමු.
• මක්නිසාදයත් ඔබ වහන්සේගේ ශ්‍රී කුරුසයෙන් ඔබ වහන්සේ ලෝකය ගලවා ගත් සේක.

ස්ථානයක් අවසාන කරන විට

• ස්වාමිනි, පාපි වූ අපට කරුණාකර වදාළ මැනව. අපට කරුණාකර වදාළ මැනව.
• මළා වූ ක්‍රිස්තියානින්ගේ ආත්මවල් දේව දයාබර කමින් සමාදානයේ සැතපෙන ලද්දේවා! ආමෙන්.