උත්පත්ති 50 : 15 - 21

ශුද්ධ බයිබලයේ සඳහන් වන ජෝසෙප් අපට ඉතා ම යහපත් ආදර්ශයක් හා මඟපෙන්වීමක් ගෙන දෙන චරිතයකි. ජෝසෙප්ට ඔහුගේ සහෝදරයන් නිතර ම නපුරුකම් කළෝ ය. සහෝදරයන් විසින් ජෝසෙප් වෙනත් දේශයකට විකුණන ලදි. එහෙත් දෙවියන් වහන්සේ ඔහු ආරක්ෂා කර මිසරයේ (ඊජිප්තුවේ) යුවරජ බවට පත් වන්නට සැලසූ සේක.

කලකට පසු සාගත කාලයක් පැමිණුනි. ඔහුගේ සහෝදරයන්ට ජෝසෙප් සිටි දේශයට එන්නට සිදුවිය. ජෝසෙප්ගේ පියා වූ ජාකොබ්ගේ මරණයෙන් පසු ව, ජෝසෙප් ඔවුන්ගෙන් පළිගනීවි යැයි ඔහුගේ සහෝදරයෝ මහත් සේ බිය වූහ. මෙසේ බිය වූ සහෝදරයෝ පණිවුඩකරුවකු ලවා ජෝසෙප්ට පණිවුඩයක් යවමින්, දන්වා සිටියේ පියා මැරෙන්ට කලින් ඔවුන් කළ වැරදිවලට සමාව දෙන ලෙසට යි.

මෙම පණිවුඩය දැනගත් ජෝසෙප් මහත් සේ දුක් වී හඬන්නට විය. තමා සහෝදරයන්ට කරදරයක් කරන්නට කිසි විටකත් නොසිතූ බැවින් ජෝසෙප් දුක් විය.

ජෝසෙප් තම සහෝදරයන් කැඳවා සහෝදරයන් තමාට කළ වැරැද්ද සම්පූර්ණයෙන් අමතක කරමින් මෙසේ සමාව දුන්නේ ය.

ජෝසෙප් සහෝදරයන්ට මෙසේ කීවේ ය.
"බිය නොවන්න. දෙවියන් වහන්සේට හිමි තැන මට ගත හැකි ද? ඔබ නම් මට සතුරුකම් කළාහු ය. එහෙත් බොහෝ මිනිසුන්ගේ ජීවිත ගැලවීම සඳහා දෙවියන් වහන්සේ මා තෝරා ගත් සේක. එම නිසා බිය නොවන්න. මා ඔබට සමාව දී පිළිගෙන හමාර ය. මම ඔබේ සියලූ පවුල් ගැන බලා ගන්නෙමි."

ජෝසෙප්ගේ ජීවිතය තුළින් අපගේ ජීවිතයට ගත හැකි ආදර්ශ

ජෝසෙප්

• තම සහෝදරයන් කළ වැරැදි අමතක කළේ ය.
• සහෝදරයන්ට සමාව දුන්නේ ය.
• සහෝදරයන්ට සමාව දී ඔවුන් රැකබලා ගත්තේ ය.

ජෝසෙප් මෙන් මම ද

• මා හට වැරැදි කරන අයගේ වැරැදි අමතක කරමි.
• මට වැරැදි කරන අයට සමාව දෙමි.
• මට වැරැදි කළ අයට සමාව දී රැක බලා ගන්නෙමි.

ආදර දෙවි පියාණෙනි,
මා හට වැරැදි කළ අයට ඒ වැරැදි අමතක කර සමාව දෙන්නට
මම පොරොන්දු වෙමි. ඔවුන් රැකබලා ගන්නෙමි. පුංචි මට ද
ජෝසෙප් මෙන් වන්නට පිහිට වුව මැනවි.
ආමෙන්.