උත්පත්ති 6 : 9 - 7 : 10

ගුරුතුමිය : අද අපි බයිබලයේ සඳහන් වැදගත් පුද්ගලයකු හඳුනාගන්නයි යන්නේ. මේ චරිතය ශුද්ධ බයිබලයේ චරිත අතර ඉතා ආදර්ශවත් චරිතයක්. ඒ තමයි "නෝවා" කියන දැහැමි මනුෂ්‍යයා.

ධනුෂ්ක : කාට ද ගුරුතුමී දැහැමි මනුෂ්‍යයකු කියන්නේ?

ගුරුතුමිය: දැහැමි මනුෂ්‍යයකු කියන්නේ. දෙවියන් වහන්සේ තුළ යහපත් ජීවිතයක් ගත කරන මනුෂ්‍යයකුටයි.

ඒ කාලයේ "නෝවා" කියලා ධර්මිෂ්ඨ, සත් ගුණවත් මනුෂ්‍යයෙක් ජීවත් වුණා. මේ මනුෂ්‍යයාගේ යහපත්කම නිසා දෙවියන් වහන්සේ ඔහුට ගොඩක් ආදරය කළා. ඒ නිසා ම දෙවියන් වහන්සේගේ කරුණාව ඔහුට ලැබුණා.

ඔන්න එක දවසක් නෝවාට දෙවියන් වහන්සේ කතා කරලා කිවුවා, ඉදිරියේ දී විශාල ජලගැල්මකින් මේ ලෝකය විනාශ වෙනවා කියලා. එම නිසා නෝවාට විශාල නැවක් සාදන්නැයි දෙවියන් වහන්සේ කිවුවා. එම නැවට වතුර ඇතුළු නොවන්නට "කීල්" නම් තාර වර්ගය තවරන්නැයි කීවා.

සැම වර්ගයක ම සතුන්ගෙන් ජෝඩුව බැගින් අරගෙන විශාල නැවට ඇතුළු කරන්නැයි දෙවියන් වහන්සේ පැවසුවා.

නෝවා දෙවියන් වහන්සේගේ අණට කීකරු වුණා.

කසුන් : ඇයි නෝවා කීකරු වුණේ?

ගුරුතුමිය: ඒ ඔහුගේ ධර්මිෂ්ඨකම නිසයි. ඔබ සැම දෙනාත් දෙවියන් වහන්සේ ඉදිරියේ ධර්මිෂ්ඨ ව සිටියොත් කිසි ම නපුරක් වෙන්න ඉඩ තියන්නේ නැහැ.

ගීතානි : ඉතින්... ඉතින්... ඊට පස්සේ මොකද වුණේ?

ගුරුතුමිය: නැව හදලා දින හතකට පස්සේ මේ මහා ජලගැල්ම ඇතිවුණා.
(දරුවෝ පුදුමයෙන් බලා සිටිති.)
දැන් අපි බලමු දෙවියන් වහන්සේ නෝවාට අශීර්වාද කළ හැටි.....

මේ ජල ගැල්ම දින හතළිහක් පුරා ම පැවතුණා. නෝවා තුළ තිබූ යහපත්කම අගය කළ දෙවියන් වහන්සේ ඔහු හා ඔහු සමග සිටි සියලූ දෙනා බේරා ගත්තා. ඔහු මගින් අලූත් ලොවක් බිහිකළා.

දෙවියන් වහන්සේ තුළ පුංචි ඔබත් යහපත්, ධර්මිෂ්ඨ ජීවිතයක් ගත කළොත් අලූත් ලොවක් බිහිකරන්නට දෙවියන් වහන්සේ ඔබ තෝරා ගනීවි.

දෙවියන් වහන්ස,
මාගේ මුළු ජීවිත කාලය පුරා ම ඔබ වහන්සේට කීකරු ව ජීවත්
වෙමි. යහපත් ළමයකු වී ජීවත් වන්නට පොරොන්දු වෙමි. නෝවා
මෙන් ඔබ වහන්සේ සමග සැම දා ම කතා කරන්නෙමි.
ආමෙන්.