නික්මයාම 16 : 11 - 15

නයනා : සීයේ, අද අපට මෝසෙස් ඉශ්‍රායෙල් සෙනඟ සමග පොරොන්දු දේශයට ගිය ගමනේ තවත් සිද්ධියක් කියා දෙන්නකෝ.

සීයා : හොඳයි, මම දුවලා පුතාලට මිසරයේ වහල් ව සිටි ඉශ්‍රායෙල් ජනතාව රතු මුහුද තරණය කළ සිද්ධිය කියා දුන්නා මතක ද?

අමර : ඔව් සීයේ. ඊට පස්සේ මොකද වුණේ?

සීයා : ඊට පස්සේ, ඉශ්‍රායෙල් සෙනඟ පාළුකරය මැදින් ගියා. පාළුකරයේ ඔවුන්ට ආහාර නොතිබුණු නිසා සෙනඟ දෙවියන් වහන්සේටත්, මෝසෙස්ටත් විරුද්ධව මැසිවිලි කියන්නට පටන් ගත්තා.

නයනා : ඉතින් ඒ සෙනඟ ආහාර සොයා ගත්තේ කොහොම ද?

සීයා : එතකොට දෙවියන් වහන්සේ මෝසෙස්ට කතා කරලා මෙහෙම කිව්වා: "ඉශ්‍රායෙල් සෙනඟගේ මැසිවිලි මට ඇසුණා. සවස ඔබට මාංසමය ආහාර ලැඛෙනවා. උදයේ ඔබට රොටි ලැඛෙනවා."

අමර : ආනේ! ඒ ආහාර කොහොම ද ලැබුණේ?

සීයා : හරි පුදුම දෙයක් සිදුවුණා. සවස් කාලයේ වටුවන් වර්ගයක් ඇවිත් කඳවුර වසා ගත්තා. ඒ වටුවන්ගෙන් සෙනඟට මාංසමය ආහාර ලැබුණා.

        උදය කාලයේ කඳවුරේ සැම තැන ම පිනි තට්ටුවක් තිබුණා. පිනි වාෂ්ප වී ගියා ම පාළුකරයේ භූමිය මත සිහින් වටකුරු හිම වැනි දෙයක් තිබුණා.

නයනා : ආ.... සවස් කාලයෙත් උදේ කාලයෙත් සෙනඟට ආහාර ලැබිලා නේද සීයේ?

සීයා : ඔව් මෝසෙස් මේ සෙනඟට කීවා, "මෙය ඔබට දෙවි පියාණන් වහන්සේ ආහාර සඳහා සැපයූ දේ" බව. ඉශ්‍රායෙල් සෙනඟ ඒ ආහාරයට 'මන්නා' යන නම තැබුවා. ඉන් ඔවුන් රොටි සාදා ගත්තා. ඒක මහා ප්‍රාතිහාර්යයක් වුණා.

අමර : දෙවි පියාණන් වහන්සේ පාළුකරයේ ඉශ්‍රායෙල් ජනතාවට මන්නා හා වටුවන්ගෙන් ආහාර සැපයූ බව නම් හරි ම පුදුමයි නේද?

සීයා : ඔව්, අපි අදහන දෙවි පියාණන් වහන්සේට කළ නොහැකි දෙයක් නෑ. උන්වහන්සේ ඉශ්‍රායෙල් සෙනඟ පමණක් නොවේ අප හැමත් එසේ ම පෝෂණය කරනවා.

දෙවි පියාණන් වහන්සේ අප ද පෝෂණය කරන සේක!

කටපාඩම් පදය
දෙවිඳුනි, අපි ඔබට තුති කරමු; ඔබේ ප්‍රබල ක්‍රියා ප්‍රකාශ
කරමු. ඔබේ නාමයට අයැද තුති කරන්නෙමු.
(ගීතාවලිය 75:1)