ශු. මාක් 6 : 46 , ලුක් 6 : 12
ශු. මතෙව් 18 : 19 - 20

අපට දෙවියන් වහන්සේ සමග සම්බන්ධ විය හැකි හොඳ ම මාර්ගය තමයි යාච්ඤාව. යාච්ඤාව තනි ව ම කරන්නත් පුළුවන්. ඒ වගේ ම අන් අය සමග එකතු ව සාමූහික ව කරන්නත් පුළුවන්.

ජේසුස් වහන්සේ මේ ලෝකයේ ජීවත් වූ කාලයේ දිනපතා යාච්ඤා කිරීමට පුරුදු ව සිටි සේක. එතුමා කඳු මුදුනේ දීත්, පාළුකරයේ දීත් තනි ව ම යාච්ඤා කළ සේක.

එමගින් දෙවියන් වහන්සේ සමග සම්බන්ධතාව නොකඩවා තබා ගත් සේක.

එසේ ම ජේසුස් වහන්සේ අපට, එක්සත් ව යාච්ඤා කරන්නට ද උගන්වා තිබේ. දෙදෙනෙක් හෝ තුන් දෙනෙක් එක් ව ජේසුස් වහන්සේගේ නාමයෙන් රැස් ව සිටිත් ද උන්වහන්සේ ඒ මැද වැඩ
සිටිනා බව ජේසුස් වහන්සේ ම පැවසූ සේක.

මෙසේ දෙදෙනෙක් හෝ කිහිප දෙනෙක් පියාණන් වහන්සේගෙන් අයදින දේ සඳහා උන්වහන්සේ සවන් දෙන බවට ද දේව වචනයේ පොරොන්දුවක් දී තිබේ.

අපි දිනපතා තනි ව ම ද අන් අය සමග ද යාච්ඤාවේ යෙදෙමු!

කටපාඩම් පදය
ඔබ අතරෙන් යමෙක් දුක් විඳින්නේ නම් ඔහු යාච්ඤා
කෙරේවා! යමෙක් ප්‍රීතියෙන් සිටින්නේ නම් ඔහු තුති
ගී ගයාවා!
යාකොබ් 5:13