16 - අපේ පන්සලේ ශ්‍රමදානය
මේ වෙසක් මාසය. වෙසක් පෝය ළඟයි. අපේ පන්තියේ සීල-සමාදාන වැඩසටහන විහාරස්ථානයේ පවත්වන්න හැමෝම යෝජනා කළා.
“ඒ දවසට කලින් විහාරස්ථානය හා අවට පරිසරය පිරිසිදු කරන්න ඕනේ. ඒ සඳහා ශ්‍රමදානයක් පවත්වන්න අපි බලාපොරොත්තු වෙනවා,” පන්තිභාර ගුරුතුමා කීවේ ය.
“ඒක හොඳයි, අපි හරි ම ආසයි පන්සල් වත්ත පිරිසිදු කරන්න,” දිනිති කීවා ය.
“ඔව්, දූලා පුතාලා විතරක් නෙවෙයි අම්මලා තාත්තලාත් අපේ ශ්‍රමදානයට එකතු කර ගනිමු. අපි මේ ශ්‍රමදානය කණ්ඩායම් බෙදිලා, වැඩ බෙදාගෙන හොඳින් කරමු,” ගුරුතුමා යෝජන කළේ ය.
“ඔව්, පන්සලට යන පාර දෙපැත්ත ගොඩක් අපිරිසිදු වෙලා. වල් පැළෑටි වැවිලා, කාණුවල කුණු හිරවෙලා, ඒ කොටස සුද්ද කරන්න තාත්තලාට කියමු,” නිපුන් කීවේ ය.
“පන්සල් වත්තේ ගස්වල අතු පාහින්න ඕනේ කියල උපාසක මාමා මතක් කළා. ගස්වල අතු පාහින වැඩෙත් තාත්තලාටමයි පවරන්න ඕනේ,” ගුරුතුමා කීවේ ය.
“ශ්‍රමදානයට එන විට අවශ්‍ය උපකරණ අරගෙන එන්න දෙමවුපියන්ට කියන්න. පන්සල් වත්ත පිරිසිදු කිරීමේ කටයුතු අම්මලාට පවරමු. මල් ගස්වල අනවශ්‍ය අතු කපලා, මල් පෝච්චිවල පස් බුරුල් කරලා, වල් පැළෑටි ගලවන්න ඕනේ. ගස්වලට ගොම පොහොරත් දමමු,” ගුරුතුමා පැවසුවේ ය.
“අපට පුළුවන් විහාර මළුවත් බෝමළුවත් අමදින්න,” රන්දි කීවා ය.
“ඔව් දුවේ, ඒ වැඩවලට අපි වැඩිහිටි අයත් එක්ක එකතු වෙමු,” ගුරුතුමා කීවේ ය.
“තරණි දුවගෙ කණ්ඩායමට පුළුවන් මල් ආසන සෝදන්න. ඒ එක්කම මල්වට්ටි, ගිලන්පස භාජනත් සෝදා පිරිසිදු කරන්න.
ධර්ම ශාලාවේ මකුළු දැල් පිසදමා, බිම සෝදා පිරිසිදු කරන්න දිනිති දුවගේ අම්මා ඇතුළු කණ්ඩායමට භාර දෙමු.”
ශ්‍රමදාන දිනය උදා විය. මවුපියෝ ශ්‍රමදානයට අවශ්‍ය උපකරණ ද රැගෙන පන්සලට එක්වූහ.
ගුරුතුමා කළ යුතු වැඩ කටයුතු පිළිබඳව මවුපියන් දැනුම්වත් කළේ ය.
එක් එක් කණ්ඩායම ඛෙදා ගත් පරිදි වැඩවල නිරත විය.
ශ්‍රමදානය අවසානයේ හැම දෙනා ම විහාර බිමේ පිරිසිදු බව දැක සතුටු වූහ.
එතැනට වැඩම කළ ලොකු හාමුදුරුවන් වහන්සේ “බොහෝම හොඳ ශ්‍රමදානයක්. මේ පිරිස ක්‍රමානුකූලව වැඩ ඛෙදාගෙන කරන හැටි මං බලාගෙන හිටියේ. යම් කටයුත්තක් කලින් සංවිධානය කළා ම එය හොඳින් කරන්න පුළුවන්. මේ දරුවොත් හොඳින් කඩිසර ව වැඩ කළා. ඒක අගය කළ යුතුයි. දැන් පන්සල හරි ලස්සනයි. අද දින ඔබ සැම එක්වී කළ ශ්‍රමදානය මහත් පින්කමක්,” යනුවෙන් සඳහන් කර අපට පුණ්‍යානුමෝදනා කළහ.