1 - බෝසත් කුමරුට පිය රජතුමාගේ දෙවන වැඳුම
කිඹුල්වත්පුරය උත්සව සිරියෙන් බැබළුණා. ගොවිතැන් වැඩ පටන් ගන්න කාලය එළැඹුණා. වප්මඟුල් උත්සවයට ගොවියෝ සූදානම් වුණා. සුද්ධෝදන මහ රජතුමා පුංචි සිදුහත් කුමරු රැගෙන පිරිස සමග උත්සවයට පැමිණියා.
සිදුහත් කුමරු කිරිමවුවරුන්ට භාර දී රජතුමා නැකතට කුඹුරට බැස්සා. ජනතාව ප්‍රීති ඝෝෂා කළා. උත්සවයේ වැඩ ඇරඹුණා.
කිරිමවුවරු දඹගසක් යට තැනූ යහනාවක පුංචි සිදුහත් කුමරු තැබුවා. කුමරුට නින්ද ගියා. උත්සවය බලන්න ආසා හිතුණු කිරිමවුවරු කුඹුරට ගියා. කුමරු ඇහැරුණා. ළඟ කවුරුත් නැති බව දැන ගත්තා. පළඟක් බැඳ ආනාපාන සති භාවනාව කළා. හිත හොඳට ම සංසුන් වුණා. සමාධිගත වුණා. ආපසු පැමිණි කිරිමවුවරු මෙය දැක පුදුම වුණා.
රජතුමාත් පුංචි සිදුහත් කුමරුගේ භාවනා විලාසය දැක පුදුම වුණා. රජතුමාගේ නෙතින් සතුටු කඳුළු වැටුණා. සෙනෙහස දරාගන්න බැරි වුණා. “පුතුනි, ඔබට මේ මාගේ දෙවන වැඳුම”යි කියා පුත් කුමරුට වැන්දා.
