අරලිය ළමා සමාජයේ දරුවෝ පොසොන් පෝය නිමිති කරගෙන සෑම වසරක ම දන්සලක් සංවිධානය කරති. ළමා සමාජයේ උපදේශක අරවින්ද ගුරුතුමා මෙවර මල් දන්සලක් පැවැත්වීමට යෝජනා කළේ ය. ඒ අනුව ළමා සමාජයේ දරුවන් හා දෙමාපිය කමිටුව කැඳවා මල් දන්සල පැවැත්විය යුතු ආකාරය ඔහු පැහැදිලි කළේ ය.

අරලිය, වතුසුදු, ඉද්ද හා අටපෙති වැනි මල් වර්ග දන්සලට එකතු කර ගැනීම සමිතියේ තීරණය විය. පසුදාට මල් දන්සලට අවශ්‍ය ද්‍රව්‍ය රැස්කර ගැනීමට එක් එක් කණ්ඩායම් බෙදා ගන්නා ලදි.

පෝ දා පහන් විය.

දරුවෝ උදෑසනින් ම අවදි වී මල් නෙළීමට එක් එක් පැතිවලට මවුපියන් සමග පිටත් වූහ.

එක් කණ්ඩායමක් මල් ලබා දීම සඳහා කැන්ද කොළ රැස් කළහ. ඒවා මල් පූජාවට සුදුසු පරිදි සෝදා පිරිසිදු කිරීමට මවුපියෝ ඉදිරිපත් වූහ. කැන්ද කොළවලින් මල් පිළියෙල කිරීමට සුදුසු මල් ගොටු සකස් කිරීමට අවශ්‍ය ඉරටු ද එම කණ්ඩායම විසින් ම සකස් කර ගන්නා ලදි.

“දුවේ, පුතේ මල් ධෝවනය කරන විට පරිස්සමෙන්, මල්වල පෙති කැඩේවි. පෙති කැඩුණු මල් පූජාවට සුදුසු නැහැ.” අරවින්ද ගුරුතුමා දරුවන් දැනුම්වත් කළේ ය.

නෙළා ගත් මල්, බේසම්වලට හොඳින් ධෝවනය කරන ලදි.

ඒ මල් කූඩාවලට පුරවා විහාරස්ථානයට ඇතුළුවන දොරටුව අසල සුදු පිරුවටයක් දැමූ මේසයක් මත තැබිණ. ඒ මත සකස් කළ මල් ගොටු තබා මල් දන්සලට සුදුසු ආකාරයට සූදානම් කරන ලදි.

“පුතාලත් සවස හතර වන විට සංවර සුදු ඇඳුමින් සැරසිලා විහාරයට එන්න. අපි අනෙක් අයට ආදර්ශවත් වන විදිහට කටයුතු කරන්න ඕනේ.

අප සැදැහැවතුන්ට මල් දෙන විට ගොටුවල අලංකාර ලෙස සකස් කර ගෞරවයෙන් දෝතින් ම ලබා දෙන්න අවශ්‍ය බව ගුරුතුමා පැවසුවේ ය.

ඝණ්ඨා නාදය මැද පන්සල වෙත ඇදී එන සැදැහැවත් උදවිය මල් ලබාගෙන “බොහෝම හොඳ පින්කමක්” යනුවෙන් ප්‍රකාශ කළහ. ඔවහු අප හැමෝට ම පින් දුන්හ.

අප කළ පින්කම ගැන අපි සතුටු වුණා. මල් දන්සල අවසන් වූ පසු දන්සලට ගත් උපකරණ නිසි තැන තැබුවා. එම ස්ථානය පිරිසිදු කළා.

අපිත් සවස පූජාවට සහභාගි වුණා. ලොකු හාමුදුරුවන් වහන්සේ අප කළ පින්කම ගැන ප්‍රශංසා කළා; අගය කළා; මල් පින්කමේ ආනිශංස දේශනා කළා. ඒ අසා සතුටට පත් වූ අපි හාමුදුරුවන් වහන්සේට වැඳ නිවෙස් බලා පිටත් වුණා.