18 - මේ අපේ නිවහනයි
මාපිය සමගිය උතුරයි
දරු කැල සෙනෙහස වපුරයි
එක පොකුණක පිපුණු නෙළුම්
මල් ගොමුවක සිරි පතුරයි
සමගියි දරුවන් සැම දෙන
අහසේ තරු කැට විලසින
මවට මෙන්ම පියාණන්ට
සෙනෙහස දක්වති සැම දින
කුරුලූ කැදැල්ලක පවතින
සමගිය නිවසෙහි උතුරන
අයුරු බලා වටපිට අය
තුති පැසසුම් දෙති තැන තැන
සාමය සැනසුම සපිරුණ
ලස්සන පොඩි මගෙ නිවහන
පිරිසුදුවට තබා ගන්න
අපි වෙහෙසෙමු ලෙස අපමණ
මිදුලේ මල් ගස් වවලා
අකුලේ වල් ගස් උගුලා
වත්ත පිටිය පිරිසුදුවට
තබා ගනිමු එකතුවෙලා
අමුණා ඇති එක නූලක
අගනා මුතු කැට අහුරක
සිරි පාමින් එකමුතු වී
අපි හිඳිනෙමු එක නිවසක
අපේ සොඳුරු පොඩි නිවසේ
සාමය සොම්නස ගැවසේ
හැමගේ සෙනෙහස ලබමින්
අපි මෙහි පසුවෙමු රිසිසෙ
ආදරයයි කරුණාවයි
නිවස පුරා දෝරෙ ගලයි
අපේ ඇල්ම බැල්ම ලැබෙන
පරිසරයත් සිරියාවයි