සංඝමිත්තා රහත් තෙරණිය මිහිඳු මහ රහතන් වහන්සේගේ නැඟණියයි, ධර්මාශෝක මහ රජතුමාගේ දියණියයි.

ලක්දිව භික්ෂුණී පැවිද්ද ඇති කිරීම සඳහා සංඝමිත්තා තෙරණිය ලංකාවට වැඩම කළා.

බුදුරජාණන් වහන්සේ බුදු වන අවස්ථාවේ දී සෙවණ දුන්නේ ජය ශ්‍රී මහා බෝධීන් වහන්සේ ය. එහි දක්ෂිණ ශාඛාව ලක්දිවට වැඩම කරවීමට ධර්මාශෝක රජතුමා කටයුතු කළා.

සංඝමිත්තා තෙරණිය ජයශ්‍රී මහා බෝධීන් වහන්සේගේ දක්ෂිණ ශාඛාව රන් පාත්‍රයක රෝපණය කරවා මෙරටට වැඩම කළා.

දේවානම්පිය තිස්ස රජතුමා සංඝමිත්තා තෙරණිය පිළිගැනීමට දඹකොළපටුන වරායට ගියා.

ජය ශ්‍රී මහා බෝධි ශාඛාව රැගත් නැව වරායට ළඟා වූවා.

රජතුමා තමාගේ කරවටක් දක්වා දියට බැස්සා. බෝධි ශාඛාව සහිත රන් පාත්‍රය මහත් ගෞරවයෙන් පිළිගත්තා.

අලංකාර මණ්ඩපයක බෝධීන් වහන්සේ සහිත රන් පාත්‍රය වඩා හිඳවූවා. තුන් දිනක් ම මහත් උත්සව පැවැත්වූවා.

විසිතුරු ලෙස සැරසූ අලංකාර රථයකින් ශ්‍රී මහා බෝධීන් වහන්සේ අනුරාධපුරයට වැඩම කර වූවා. මග දිගට පූජා උත්සව පැවැත්වූවා.

එදින උඳුවප් පුර පසළොස්වක පොහොය දිනයයි. මහමෙවුනා උයනේ ජය සිරි මහා බෝධි ශාඛාව රෝපණය කළා.

අනුරාධපුරයේ උඩ මළුවේ ජය සිරි මහා බෝ හාමුදුරුවෝ වැඩ සිටිනවා. එය අපේ පූජනීය වස්තුවකි.

සංඝමිත්තා තෙරණින් වහන්සේ නිසා ලංකාවේ කාන්තාවන්ට භික්ෂුණී පැවිද්ද ලැබුණා.

සංඝමිත්තා රහත් තෙරණින් වහන්සේ අපි සැම දා ගෞරවයෙන් සිහිපත් කරමු.