12 - සැදැහැ සිතින් බෝධි පූජාව කරමු
"අද මේ දරුවෝ බෝධීන් වහන්සේ ළඟට රැස් වුණේ ඇයි කියලා දන්නවා නේ ද?” ලොකු හාමුදුරුවෝ ඇහුවා.
"එහෙමයි හාමුදුරුවනේ, බෝධි පූජාව කරන හැටි ඉගෙන ගන්න,” සුජානි උත්තර දුන්නා.
“උසස් ම නුවණට බෝධි කියනවා. බුදුවීම කියන්නේ ඒ උසස් ම නුවණටයි. වෙසක් පුර පසළොස්වක දින ඇසතු බෝ රුක මුල දී සිදුහත් බෝසත්තුමා බුද්ධත්වයට පත් වුණා. ලොකු හාමුදුරුවෝ කිවුවා.
බුදු වීමට සෙවණ දුන් ඇසතු බෝ රුක තමයි ජය ශ්‍රී මහා බෝධීන් වහන්සේ. කළගුණ සැලකීමට බුදුරජාණන් වහන්සේ සතියක් ම බෝධීන් වහන්සේ දෙස ඇසි පිය නො හෙළා බලා සිටියා.
ඒ උතුම් බෝධීන් වහන්සේටයි අපි බෝධි පූජා පවත්වන්නේ. දැන් අපි බෝධි පූජාව කරන හැටි ඉගෙන ගනිමු.
හොඳින් පිරිසිදු වෙලා සුදු සංවර ඇඳුමින් සැරසිලා පන්සලට එන්න ඕන. සුවඳ මල්, පොල්තෙල්, පහන්තිර, හඳුන්කූරු, ගිලන්පස, ගිනිපෙට්ටියක් ආදි ද්‍රව්‍ය රැගෙන එන්න ඕන.
පන්සලට ඇවිත් බෝ මළුව, මල් ආසන ආදිය පිරිසිදු කර දෑත් සෝදා ගත යුතුයි.
පෙරා ගත් පැන් කළයක් ගෙන බෝධීන් වහන්සේ නහවන්න.
පහන්, හඳුන්කූරු පත්තු කරලා, මල් වට්ටි, දැහැත්, ගිලන්පස තැන්පත් කරලා, බෝධීන් වහන්සේට වන්දනා කරන්න.
බෝධි පූජාවෙන් පසුව පූජා ද්‍රව්‍ය ඉවත් කර මල් ආසන පිරිසිදු කිරීම හොඳ දෙයක්. බෝධි පූජාවට යොදා ගත් භාජන සෝදා නිසි තැන තැන්පත් කරන්න ඕනැ.