"මගේ පන්තියේ දුවක් සිටිනවා. ඇය හරි ම ලස්සනයි; මුහුණ හරි ම පැහැපත්; හරි ම නීරෝගීයි; දිනපතා ම පාසලට එනවා; පාඩම් වැඩ හොඳින් කරනවා; පොත් පත් හරි ම පිරිසිදුයි; පිළිවෙළයි. විභාගයේ දී හැම විෂයකට ම හොඳට ලකුණු ලබා ගන්නවා; ගුරුවරුන්ට හරි ම කීකරුයි,” යැයි පන්ති භාර ගුරුතුමිය එක දිගට ම පන්තියේ දෙමාපිය හමුවේ දී කියාගෙන ගියා ය.

"මං මේ විස්තරය කිවුවේ අපේ පන්තියේ මෙවරත් පළමුවෙනියා වුණු රන්දි දුව ගැන. අද දෙමාපිය හමුවට රන්දිගේ අම්මාත් තාත්තාත් ඇවිත් ඉන්නවනේ. අපි රන්දිගේ අම්මාගෙන් අහලා බලමු රන්දි දක්ෂ, කීකරු, නීරෝගී දුවක් වුණේ කොහොම ද කියලා.”

"රන්දි හැම දා ම උදේ පාන්දරින් ම අවදි වෙනවා. අවදි වෙලා පිරිසිදු වතුර වීදුරුවක් බොන්න පුරුදු වෙලා ඉන්නවා. ඒ නිසා එයා හරි ම නීරෝගීයි.

දිනපතා ම නාලා පිරිසිදුව ඉන්න රන්දි හරි ම කැමැතියි. ඇය උදේ ආහාරය අරගෙනමයි පාසල් එන්නේ.” රන්දිගේ අම්මා කතා කරන්නට පටන් ගත්තා.

උදේ ආහාරය නිවැරැදි වෙලාවට හොඳ පෝෂණයෙන් යුක්ත ව ගැනීමට අප පුරුදු විය යුතුයි. බත්, ධාන්‍ය වර්ගයක් හෝ අල වර්ගයක් උදේ ආහාරය ලෙස ගැනීමට අප හැමවිට ම උත්සාහ කළ යුතුයි.

"ඇය නීරෝගී නිසා දිනපතා ම පාසලට පැමිණෙනවා. ඒ වගේ ම උදෑසන පාසල ආරම්භ වීමට පෙර පාසලට ඒමටත් ඇය හරි ම කැමැතියි. උදේ ම පාසලට ඇවිත් පන්තිය හා අවට පරිසරය පිරිසිදු කිරීමටත් උදවු වෙනවා.

රන්දි පොත්පත්වල වැඩ කාලසටහනකට අනුවයි කරන්නේ. එක් එක් දිනවල විෂයයන් බෙදාගෙන පාඩම් කරනවා. ඒ නිසා හැම විෂයයක් පිළිබඳව ම අවධානය යොමු වෙනවා.

මගේ දුව ඉගෙනුමට හරි ම උනන්දුයි. ඒ නිසා දුවට හැම විෂයකට ම හොඳ ලකුණු ලැඛෙනවා. හැම දේ ම කාලය ඛෙදා ගෙන කරන නිසා රන්දිට ගෙදර දොර වැඩකටයුතුවලට උදවු කරන්නත් වෙලාව තියෙනවා. සවසට මල් පැළවලට වතුර දමන්නත් රන්දි හරි ම ආසයි.

ඒ වගේමයි රන්දි දුව උදේටත් හවසටත් බුදුන් වඳින්න අමතක කරන්නේ නැහැ. රෑ නින්දට පෙර සිත නිවන මෛත්‍රී භාවනාව කරන්නටත් ඇය පුරුදු වෙලා ඉන්නේ. ඒ නිසා ඇයට පාඩම් හොඳට මතක තියෙනවා.

පාසලට ඒමට පෙර මටයි තාත්තාටයි වඳින්න රන්දි පුරුදුවෙලා ඉන්නේ. ඇය නින්දට යන්නෙත් අම්මාටයි තාත්තාටයි වැඳලා.

ගුරුමෑණියක ලෙස ඔබතුමිය ලබා දෙන අවවාද රන්දි ගෞරවයෙන් පිළිපදිනවා. ඇය දහම් පාසලෙනුත් හොඳ ගුණදම් එකතු කරගන්නවා. දෙමාපියෝ හැටියට අපිත් දුවට පාසලේ වැඩවලට මෙන් ම අනෙක් වැඩවලටත් උදවු කරනවා.

දුව හොඳ ළමයෙක් වෙලා අනාගතය සාර්ථක කර ගනීවි යන බලාපොරොත්තුව තියෙන නිසා රන්දිගේ තාත්තාත් මමත් හරි ම සතුටින් කල් ගෙවන්නේ. අපේ දුව වගේ අනෙක් දූ පුතුණුත් යහපත් දින චරියාවකට අනුව ජීවිතය ගොඩනගා ගැනීමට යොමු වනු ඇතැයි මම බලාපොරොත්තු වෙනවා.”