අහසේ පියාසර කරන ගුවන් යානා ඔබ ඕනෑ තරම් දැක ඇති. එහෙත් ගුවන් යානය මුලින් ම නිර්මාණය කළේ කවුරුන් දැ යි ඔබ දන්නවා ද? ඒ තමයි විල්බර් රයිට් සහ ඕවිල් රයිට්. ලෝකය ම ඔවුන් හඳුනන්නේ රයිට් සහෝදරයන් ලෙසිනුයි.

ගුවන් යානය නිපදවා ලෝකය ම පුදුමයට පත් කළ රයිට් සහෝදරයන්ගේ ළමා කාලය ඉතා දුක්ඛිත එකක් විය. ඔවුන්ට කුඩා අවධියේ දී නිසි පාසල් අධ්‍යාපනයක් නොලැබිණි. ජීවත් වූයේ ද සතුන්ගේ ඇටකටු පොහොර කම්හලකට විකුණා ලැබුණු සුළු ආදායමෙනි.

රයිට් සහෝදරයන්ගේ පියා ඔවුන් පුංචි කාලයේ දී කඩදාසි සහ රබර් පටිවලින් සෙල්ලම් අහස් යානා තනා දුන්නේ ය. ඔවුහු ඒවා ඉහළ යවා ඉමහත් සේ ප්‍රීති වූහ. දවසේ වැඩි වෙලාවක් ගෙවූයේ සෙල්ලම් ගුවන් යානා සමග ය. අහසේ පියාඹන කුරුල්ලන් දෙස බලා සිටීම ද ඔවුන්ගේ විනෝදාංශයක් විය. මේ නිසා ම අපූරු සිතුවිල්ලක් රයිට් සහෝදරයන්ගේ සිතට ඇතුළු විය. ඒ, ඉහළ අහසේ පියාසර කරන ගුවන් යානයක් තැනීමේ සිහිනය යි.

රයිට් සහෝදරයෝ තමන් නිපදවූ ගුවන් යානයත් රැගෙන රේල් පාරකට ගියහ. රේල් පාරේ දී ගුවන් යානය ගුවන්ගත කෙරිණි. රේල් පීලි මත අඩි හතළිහක් පමණ ඇදී ගිය යානය ඉහළට නැංගේ ය. තත්පර දොළහක් ඉහළ තිබූ යානය නැවත බිමට පැමිණියේ ය. ඒ 1903 අවුරුද්දේ දෙසැම්බර් මාසයේ 17 වන දා ය. මිනිසකු රැගත් ගුවන් යානයක් ඉහළට ගිය පළමු වන අවස්ථාව එය යි. රයිට් සහෝදරයන්ගේ සතුට නිම් හිම් නැති විය.

රයිට් සහෝදරයෝ තම වික්‍රමය නැරඹීමට ඇමරිකාවේ යුද්ධ හමුදාවට ආරාධනා කළහ. එවර ගුවන් යානය විනාඩියකට වඩා වැඩි කාලයක් ගුවනේ පියාසර කළේ ය. හමුදා නිලධාරීහු ප්‍රීතියෙන් ඔල්වරසන් දුන්හ. ගුවන් යානය නිපදවූ වීරයන් ලෙස රයිට් සහෝදරයන්ට සැලකුම් ලැබිණි. ඔබ අද ඉහළ අහසේ පියාඹන ගුවන් යානා දකින්නේ විල්බර් රයිට්ගේ සහ ඕවිල් රයිට්ගේ මේ හපන්කම නිසා ය.