කවරෙක් අල්ලාහ් හා පරමාන්ත දිනය විශ්වාස කරයි ද, ඔහු තම
ආගන්තුකයා ගෞරවයට පත් කර සංග්‍රහ කරත්වා. (බුහාරි)
යනුවෙන් නබි සල්ලල්ලාහු අලෛහි වසල්ලම් තුමාණෝ පැවසූහ.

ආගන්තුකයන්ට සංග්‍රහ කරන ලෙසත්, ඔවුන්ට ගරු කරන ලෙසත්, ඉස්ලාම් අවධාරණය කර ඇත. එය ඊමානීය ලක්ෂණයක් ලෙස වර්ණනා කෙරේ. එම නිසා ඉස්ලාම් ආගන්තුකයන් හට සංග්‍රහ කිරීමේ පිළිවෙත් ද පෙන්වා දී ඇත.

ආගන්තුකයින්ට සලාම් කියා පිළිගැනීම, ඔවුන් සමග ගෞරවයෙන් කථා කිරීම, සුව දුක් විමසීම, ගරු කොට සැලකීම, තමන් සතු අගනා දෑ ලබා දී සිත් සතුටින් සංග්‍රහ කිරීම, ඔවුන් සමුගෙන යන විට ඔවුන් වෙනුවෙන් අල්ලාගෙන් ප්‍රාර්ථනා කර පිටත් කර යැවීම යනාදිය ඉස්ලාම් දෙසූ යහගුණාංග වේ.

එම නිසා ආදරය, අවබෝධය, සමගිය යනාදි යහගුණාංග වර්ධනය වේ. ප්‍රාර්ථනා ද හිමි වේ.

වරක් නබි සල්ලල්ලාහු අලෛහි වසල්ලම් තුමා වෙත ආගන්තුකයෙක් පැමිණියේ ය. එතුමා තම බිරින්දෑවරුන්ගේ නිවෙස්වලට ගොස් සංග්‍රහ කිරීම සඳහා ආහාර කිසිවක් තිබේ දැයි විමසා බැලුහ. සියලූ දෙනාගේ ම නිවෙස්වල ජලය හැර අන් කිසිවක් නොතිබුණි. පසු ව නබි සල්ලල්ලාහු අලෛහි වසල්ලම් තුමාණෝ අන්සාරි මිතුරන් අමතා "මා සමග සිටින මෙම ආගන්තුකයාට සංග්‍රහ කළ හැක්කේ ඔබ අතරින් කවරෙකුට දැ?" යි විමසූහ.

ඉක්මනින් ම අන්සාරි මිතුරෙක් ඉදිරිපත් වී නබි සල්ලල්ලාහු අලෛහි වසල්ලම් තුමාගේ ආගන්තුකයා තම නිවසට කැඳවාගෙන ගියේ ය. ඔහු තම බිරිඳ බලා "නබි සල්ලල්ලාහු අලෛහි වසල්ලම් තුමාගේ ආගන්තුකයාට ගරු කරන්නැ" යි කීවේ ය. එවිට ඇය, "නිවස තුළ දරුවන්ට ප්‍රමාණවත් ආහාර පමණක් තිබේ," යැයි කීවා ය. නැවත වතාවක් සැමියා "සංග්‍රහ කටයුතු සූදානම් කරන්න," යැයි පැවසූ බැවින් තම නිවැසියන්ගේ ආහාර වේල පරිත්‍යාග කර තම ආගන්තුකයාට හොඳින් සත්කාර කර ගරු කළහ. අල්ලාහු තආලා ඔවුන්ගේ මෙම පරිත්‍යාගශීලී ආගන්තුක සත්කාරය හා සංග්‍රහය අල් කුර්ආනයේ ප්‍රශංසාවට ලක් කළේ ය.

ආගන්තුකයන්ට ගරුකර සංග්‍රහ කිරීමෙන් අල්ලාහ්ගේ තෘප්තියත් දයාවත් ලබා ගනිමු.