අප දිනපතා පස්වරක් ජමාඅත් වශයෙන් මස්ජිදය තුළ සලාතය ඉටු කරනවා නොවේ ද? එවිට අපි සුදුසු ඉමාම්වරයකු (නායකයකු) අනුගමනය කර සලාතය ඉටු කරන්නෙමු. එම සලාතය් ඉමාම්තුමා සම්පූර්ණයෙන් ම පිළිපදින්නෙමු. ඉමාම්තුමාට කිසියම් වැරදීමක් සිදු වුවහොත් අවනත භාවයට හානි නොවන පරිදි ඔහු නිවැරදි කරන්නෙමු. අල්ලාහ් අපට මෙවැනි වගකීමක් අනිවාර්ය කළේ ඇයි දැයි, ඔබ සිතා බැලූවේ ද?

අපට සාමූහික ව ජීවත් වන ලෙස හා නායකයකු නියම කර ඔහුට අවනත වන ලෙස ඉස්ලාම් දහම අනිවාර්ය කර ඇත.

නබි සල්ලල්ලාහු අලෛහි වසල්ලම් තුමාණෝ මෙසේ පැවසූහ. "නුඹලාගෙන් තිදෙනෙකු එක් ව සිටියහොත්, ඉන් කෙනෙකු නායකයකු ලෙස පත් කර ගන්න."

නායකයකු පත්කර ඔහුට අවනත වීමේ පුහුණුවක් ලෙස අල්ලාහ් ජමාඅත් සලාතය අපට අනිවාර්ය කර ඇත්තේ ය.

නායකයකු පත්කර ගත් පසු ඔහුට අවනත වීම අපගේ යුතුකමකි. ඒ පිළිබඳ ව අල් කුර්ආනය මෙසේ පවසයි. "නුඹලා අල්ලාහ්ට අවනත වන්න. ඔහුගේ දූතයාට හා ඔබගේ වගකීම් දරන භාරකරුවන්ට අවනත වන්න"

වගකීම් දරන භාරකරුවන් ලෙස අල් කුර්ආනය අදහස් කරන්නේ කවුරුන් ද?

රටක නායකයා වන ජනාධිපති, ගමක නායකයා වන ග්‍රාම නිලධාරි, නිවසක නායකයා වන පියා හෝ මව, පාසලක නායකයාවන විදුහල්පති, පන්තියක නායකයා වන ගුරුතුමා හෝ පන්ති නායක, වගකීම් දරන්නනෝ වෙති.

මෙලෙස ක්‍රීඩා කරන විට, ගමනක යෙදෙන විට, කණ්ඩායම් වශයෙන් ක්‍රියාවක නියැලෙන විට හෝ එවැනි විවිධ අවස්ථාවල දී අපි නායකයන් පත් කර ගනිමු.

මෙම නායකයෝ වගකීම් දරන්නෝ වෙති. මේ අයට ද අවනතව ක්‍රියා කිරීම අල්ලාහ් අනිවාර්ය කර ඇත්තේ ය.

නායකත්වයට පත්වන්නන් කාරුණික, දයාවන්ත හා සාකච්ඡා කරන්නන් ලෙසත් තමන් යටතේ සිටින්නන්ට නිසි ලෙස මගපෙන්වන්නන් ලෙසත් සිටිය යුතු ය. එසේ ම තමන් නායකත්වයට නියම කරන ලද කාර්යයට වගකිව යුතු අය ලෙස ද සිටිය යුතු ය.

නබි සල්ලල්ලාහු අලෛහි වසල්ලම් තුමාණෝ ශ්‍රේෂ්ඨ නායකයකුට හිමි අලංකාර ආදර්ශ විදහා දැක්වූහ. නබි සල්ලල්ලාහු අලෛහි වසල්ලම් තුමාණන් අනුගමනය කළ සහාබාවරු නායකත්වයට කෙසේ අවනත විය යුතු ද යන්නට ශ්‍රේෂ්ඨතම ආදර්ශය වූහ. එසේ ම ඔවුහු අවස්ථා රැසක දී ම ශ්‍රේෂ්ඨ නායකයන් ලෙස ද සිටියහ.

නායකත්වයට අවනත වී ක්‍රියා කිරීම තුළින් අල්ලාහ් ජය හා අභිවෘද්ධිය ඇති කරන්නේ ය. එනිසා අපි සෑම අවස්ථාවක දී ම නායකත්වයට අවනත ව ක්‍රියා කරමු. එසේ ම අවස්ථාවක් උදා වන විට නායකත්වය පිළිගෙන ක්‍රියා කිරීමට නායකත්ව ගුණාංග වර්ධනය කර ගනිමු.