දෙවන පාඩමට නියමිත සීනුව නාද විය. හතර වසර සිසුහු ඉස්ලාම් පාඩම් ගුරුතුමා පැමිණෙන තෙක් උනන්දුවෙන් මග බලා සිටියහ. ගුරුතුමා සලාම් කියමින් පන්තියට ඇතුළු වූවේ ය. සිසුහු පිළිතුරු සලාම් කියා ගුරුතුමා පිළිගත්හ.

ගුරුතුමා : ආදරණීය දුවේ පුතේ, අපි පහුගිය පාඩමේ සලාතයේ වැදගත්කම ගැන ඉගෙන ගත්තා. අද සලාතයේ ෆර්ලූ හා ෂර්ත් ගැනත් ඉගෙන ගනිමු. ෆර්ලූ හා ෂර්ත් කියන්නේ මොනවා ද කියලා නුස්හී කියන්නකෝ බලන්න.

නුස්හී : අපි අපේ මද්රසාවේ ඉගෙන ගන්න කොට මුඅල්ලිම් තුමා අපට කියා දුන්නා මට මතකයි. ඉස්ලාමයේ වගකීම් ඉටු කරන විට අනිවාර්යයෙන් ම කරන්නට වුවමනා කරන දේවල්වලට "ෆර්ලූ" කියා ද, ඒ වගකීම් ඉටු කරන්නට කලින් සම්පූර්ණ වෙලා තියෙන්නට ඕන කරන කොන්දේසිවලට "ෂර්ත්" කියා ද අපි කියනවා.

ගුරුතුමා : නුස්හී කිව්වා හරි. දැන් අහ්මද් කියන්නකෝ බලන්න, සලාතයේ ෆර්ලූ හා ෂර්ත් කීය ද කියලා.

අහ්මද් : සර් ෆර්ලූ දහ නවයයි. ෂර්ත් දහයයි.

ගුරුතුමා : හොඳයි, අපි දැන් ඒ ෆර්ලූ හා ෂර්ත් මොනවා ද කියලා බලමු ද (යැයි පවසා ගුරුතුමා තමා විසින් සූදානම් කරන ලද වගු සටහන් දෙකක් බිත්තියේ එල්ලූවේ ය.)අෆ්ලල්, මුලින් ම ෂර්ත් ටික කියවන්නකෝ බලන්න.

සලාතයේ ෂර්ත් 10

1. මුස්ලිම්වරයකු වීම

2. සිහි බුද්ධිය තිබීම

3. පිරිසිදුව සිටීම (වුලූඃ/ දිය නෑම)

4. ශරීරය, ඇඳුම්, ස්ථානය යනාදිය පිරිසිදු ව තිබීම

5. වැසිය යුතු කොටස් (අව්රත්) ආවරණය වී තිබීම

6. කිබ්ලාව දෙසට හැරී සිටීම

7. තමන් කෙරෙහි සලාතය අනිවාර්ය බව දැන සිටීම

8. සලාතයේ වේලාව දැන සිටීම

9. සලාතය ඉටු කරන ආකාරය දැන සිටීම

10. ෆර්ලූ හා සුන්නත් වෙන් වෙන් ව දැන සිටීම

ගුරුතුමා : බොහොම හොඳයි. දැන් අබ්දුල්ලාහ් සලාතයේ ෆර්ලූ ටික කියවන්නකෝ බලන්න.

සලාතයේ ෆර්ලූ 19

1. "අල්ලාහ් වෙනුවෙන් සලාතය ඉටු කරමි" යැයි සිතින් නියියත් තැබීම

2. සලාතය සිටගෙන ඉටු කළ හැකි අය එසේ සිටගෙන ඉටු කිරීම

3. ආරම්භක තක්බීරය (තක්බීර් තහ්රීමා) පැවසීම

4. බිස්මි සමග සූරතුල් ෆාතිහා උසුරීම

5. රුකුඋ කිරීම

6. එහි රැඳී සිටීම

7. ඉඃතිදාලයට පැමිණීම

8. එහි රැඳී සිටීම

9. පළමු සුජූද් කිරීම

10. එහි රැඳී සිටීම

11. මැද හිඳුමට පැමිණීම

12. එහි රැඳී සිටීම

13. දෙවන සුජූද් කිරීම

14. එහි රැඳී සිටීම

15. අවසාන අත්තහියියාත්හි හිඳ ගැනීම

16. එහි දි අත්තහියාතය උසුරීම

17. අත්තයියාතයේ දී නබි සල්ලල්ලාහු අලෛහි වසල්ලම් තුමා වෙත සලවාත් පැවසීම

18. පළමු සලාම් පැවසීම

19. ඉහත අනුපිළිවෙළින් ඉටු කිරීම

ගුරුතුමා: හොඳමයි දුවේ පුතේ දැන් සලාතයේ හැම ඉරියවුවක් ගැනත්, ඒ ඉරියවුවල දී අපි උච්චාරණය කළ යුතු දේ ගැනත් මෙන්න මේ රූප රාමුවලින් අපි බලමු ද?

ගුරුතුමා: එක ඉරියව්වක ඉඳලා තවත් ඉරියව්වකට අපි යන කොට "අල්ලාහු අක්බර්" කියලත්, රුකූඋ ඉඳලා නැගිටින කොට විතරක් "සමිඅල්ලාහු ලිමන් හමිදහ්" කියලා උසුරන්නට ඕනෑ.