දෙවි පියාණන් වහන්සේ අපට ඉමහත් ලෙස ආදරය දක්වනවා. දෙවි පියාණන් වහන්සේට අප ආදරය කළ යුත්තේ කොහොම ද කියලා ඔවුන් වහන්සේ අපට කියලා දුන්නා. දෙවි පියාණන් වහන්සේ තෝරා ගත් ජනතාව ඊශ්‍රායෙල් ජනතාවයි. ඔවුන් මිසරයේ වහල් බවෙන් මුදවා ගෙන කිරියෙන් හා පැණියෙන් පිරුණු දේශයක් කරා ගෙන යන බවට දෙවි පියාණන් වහන්සේ පොරොන්දු වුණා. ඒ සඳහා තෝරා ගත්තේ මෝසෙස් තුමාවයි.

එය එතරම් ලෙහෙසි පහසු ගමනක් නොවේ. මේ ගමනේ දී මේ මහා සෙනඟ දෙවි පියාණන් වහන්සේ අකැමැති දේවල් කරන්නට පෙළඹුණා. මේ සියලූ දේ දුටු දෙවි පියාණන් වහන්සේ මෝසෙස් තුමාට කතා කළා. ඒ වන විට ඔවුන් සිටියේ සීනයි කන්ද පාමුල. මෝසෙස් තුමා කඳු මුදුනට නැංගා. සියලූ ජනයා යහපත් ලෙස ජීවත් විය යුතු ආකාරය ලියා ඇති දස පනත අඩංගු ගල්  පුවරු දෙක දෙවියන් වහන්සේ ඔහුට දුන්නා. සියලූ ජනතාවට මේ පනත් කියා දෙන ලෙස දෙවි පියාණන් වහන්සේ මෝසෙස් තුමාට කිවුවා. මේ තිබෙන්නේ එ ගල් පුවරු දෙකයි;

ගුරුතුමිය: ඔයාලා දන්නවා ද ඇයි ගල් පුවරු දෙකක දස පනත ලියලා දුන්නේ කියලා?

ළමයි : ටීචර්, අපි හරි ආසයි ඒ ගැන දැන ගන්න.

ගුරුතුමිය: පළමු ගල් පුවරුවේ ඇති 1, 2, 3 යන දේව පනත් මඟින් අපට කියා දෙන්නේ සියලූ ම දේට වඩා මුළුමනින්ම දෙවි පියාණන් වහන්සේට පමණක් ප්‍රේම කළ යුතු බවයි.

අනෙක් ගල් පුවරුවේ ඇති 4, 5, 6, 7, 8, 9 හා 10 යන දේව පනත්වලින් අපට උගන්වන්නේ, තමාට මෙන්ම අසල් වැසියන්ටත් ප්‍රේම කළ යුතු බවයි. ජේසුස් වහන්සේ ජීවත් වූ කාලයේ පටන් මේ දේව පනත් ප්‍රේමයේ පනත් ලෙස නම් කෙරුණා.

ළමයි : ස්තූතියි ටීචර්, අපට දේව පනත් ගැන කියා දුන්නාට.

ගුරුතුමිය: මේ පනත්වලට අනුව ජීවත් වීම දෙවි පියාණන් වහන්සේගේ කැමැත්තයි. ඒ වගේ ම දෙවි පියාණන් වහන්සේ අපට දක්වන ආදරයට අපිත් ආදරය කරන්න ඕනෑ. ඒ තමයි ප්‍රතිප්‍රේමය. ඉතිං අප ප්‍රතිප්‍රේමය දක්වන්න නම් මේ දස පනත අනුව ජීවත් විය යුතුමයි.

යාච්ඤාව
ආදර දෙවි පියාණෙනි, දේව පනත් අනුගමනය කරමින් අපේ
ජීවිත නිවැරදි කර ගන්නටත්, ඒ මගින් අප ජීවත් වන සමාජය
යහපත කරා ගෙන යන්නටත් අපට අවශ්‍ය ශුද්ධාත්ම මඟ
පෙන්වීම ලබා දුන මැනව.
ආමෙන්.