3 - මගේ හදට වඩින ජේසුස් වහන්සේ
පරලෝකේ මන්නාවෙනි
ජීවිත දායකයාණනි
අනන්ත වූ ප්‍රේමයෙනි
වඩිනු මාගේ ජේසුනි
"මේ මාගේ ශ්‍රී ශරීරයයි. මා සිහි කිරීම පිණිස මෙය සිදු කරන්න....."
(ශු. ලුක් 22:19)
පියතුමා : දරුවනේ, මේ චිත්‍රය කලින් දැකලා තියෙනවා ද? මේ කියමන ඔබ අසා තිබෙනවා ද?
ළමයා : ඔව් පියතුමනි, ජේසු සමිඳුන් අන්තිම රැ භෝජනය පවත්වන චිත්‍රය නේ ද?
පියතුමා : අන්න හරි දරුවනේ, ඒ තමා ජේසුස් වහන්සේ පළමුවරට දිව්‍ය සත්ප්‍රසාද වහන්සේ ස්ථාපිත කළ ආකාරය. එදා අපට උතුම් ම දවසක්. ජේසු සමිඳුන් එදා දැන හිටියා ඒ තම අවසන් රාත්‍රි භෝජනය වන බව. ඒත් ජේසුස් සමිඳුන් අප තනි නොකර සැම දා අප සමග සිටින්නට තීරණය කළා.
ළමයි : ඒ කොහොම ද පියතුමනි?
පියතුමා : එහෙම කළේ සුදෝ සුදු පූපය ඔසවා "මේ මාගේ ශ්‍රී ශරීරයයි. මෙය ගෙන අනුභව කරන්න" යනුවෙන් පවසමින් ජේසු සමිඳුන් ජීවමානව සුදු පූපය වෙතට වැඩම කිරීමෙන්.
ළමයි : පියතුමනි, අද කොහොම ද ජේසු සමිදුන් අප සමග වැඩ සිටින්නේ?
පියතුමා : දරුවනේ, ජේසුස් වහන්සේ අපට තියෙන ආදරය නිසා තමයි කුඩා පූපයක් තුළින් අප තුළට එන්න කැමති වුණේ. අද දිව්‍ය පූජාවේ දී මා පවසන ආශීර්වාද වචනවලින් පූප හා මිදිරස ක්‍රිස්තුන් වහන්සේගේ ශ්‍ රීශරීරය හා ශ්‍රී රුධිරය බවට හැරෙනවා.
ළමයි : ඉතින් පියතුමනි, අපි හැමෝම ජේසු සමිඳුන් ලබාගන්න ආසයි. එ වෙනුවෙන් අපි මොනවා ද කරන්න ඕනෑ?
පියතුමා : ඔව් දරුවනේ, ජේසු සමිඳුන් ජීවමානව ඔබගේ හදවත තුළට වඩින්න හරි ආසාවෙන් බලා ඉන්නවා. අපි සමගිවීමේ දේව ප්‍රසාද නිධානය ලබා පිරිසිදු හදවතකින් ජේසු සමිඳුන් ලබා ගැනීමට සූදානම් විය යුතුයි. ඒ බව ශුද්ධ වූ පාවුලූ තුමා මෙසේ ලියා තිබෙනවා.
ළමයි : පියතුමනි, අපි ජේසු සමිඳුන් ලබා ගත් පසු මොක ද වෙන්නේ?
පියතුමා : පුතේ, දුවේ, ජේසු සමිඳුන් අපේ ජීවිතයට, ශරීරයට සම්බන්ධ වෙනවා. දැන් ඔයා තනි වෙලා නෑ. ඔවුන් වහන්සේ ඔබ හරි මග යවනවා, නපුරෙන් ගලවා ගන්නවා. එම නිසා ඔබ තුළ ඉන්න ජේසු සමිඳුන් හොඳින් හඳුනා ගෙන අන් අයටත් උන්වහන්ස‍ෙ හඳුන්වා දෙන්නට උත්සාහ කරන්න.
දිව්‍ය සත්ප්‍රසාද වහන්සේ ලැබීමට පෙර සූදානම් විය යුතු ආකාරය
- පව්වලට සමාව ලබා ගැනීම
- සැම ඉරුදින ම හා හැකි සැම විට ම පිරිසිදුව දිව්‍ය පූජාවට සහභාගි වීම
- දිව්‍ය පූජාවට පෙර පැයක්වත් නිරාහාර ශීලය රැකීම
- පෞද්ගලිකව දිනපතා ම යාච්ඤා කිරීම
- ගෞරවයෙන් ජේසුස් වහන්සේ ලබා ගැනීම
යාච්ඤාව
ආදර ජේසු සමිඳුනි, පුංචි අපේ හදවත් තුළට
ආදරයෙන් වැඩම කිරීම ගැන අපි ඔබ වහන්සේට තුති පුදමු.
යහපත් දරුවන් ලෙස ඔබ වහන්සේට කීකරුව ජීවත් වීමට අපට
පිහිට වුව මැනව.
ආමෙන්.